ភ្នំពេញៈ គណៈប្រតិភូក្រុមប្រឹក្សាធុរកិច្ចអាមេរិក-អាស៊ាន ធ្វើបេសកកម្មពាណិជ្ជកម្មចំនួន ២ ថ្ងៃ នៅកម្ពុជា ដើម្បីពិភាក្សាពីឱកាសវិនិយោគ និងពាណិជ្ជកម្ម។ នេះបើយោងតាមទំព័រហ្វេសប៊ុកស្ថានទូតអាមេរិកប្រចាំកម្ពុជា។
គណៈប្រតិភូចំនួន ២៩ នាក់ មកពីក្រុមហ៊ុនចំនួន ១៥ នេះគឺជាគណៈប្រតិភូក្រុមប្រឹក្សាធុរកិច្ច អាមេរិក-អាស៊ានធំបំផុត ដែលបានមកធ្វើទស្សនកិច្ចនៅកម្ពុជា។
កាលពីថ្ងៃចន្ទ គណៈប្រតិភូនេះ បានជួបពិភាក្សាជាមួយក្រសួងពាណិជ្ជកម្ម និងក្រសួងប្រៃសណី៍យ និងទូរគមនាគមន៍ ដើម្បីពង្រឹងកិច្ចសហប្រតិបត្តិការទ្វេភាគីលើវិស័យធុរកិច្ច និងវិនិយោគរវាងប្រទេស កម្ពុជា និងអាមេរិក។ នេះបើតាមទំព័រហ្វេសប៊ុកផ្លូវការរបស់ក្រសួងពាណិជ្ជកម្មកម្ពុជា។
ក្នុងជំនួបកាលពីថ្ងៃទី ៨ កក្កដា លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មថ្លែងថា គណៈប្រតិភូក្រុមប្រឹក្សាធុរកិច្ចអាមេរិក-អាស៊ាន បានពិភាក្សាពីការអនុវត្តស្តង់ដារថយន្តអាស៊ាន នីតិវិធីនាំចូលសម្ភារបរិក្ខារពេទ្យ និងគ្រឿងម៉ាស៊ីនសម្រាប់បម្រើវិស័យអាកាសចរណ៍ ការទប់ស្កាត់សកម្មភាពរត់ពន្ធផលិតផលកូកាកូឡាឆ្លងដែន ពាណិជ្ជកម្មអេឡិចត្រូនិក និងការអភិវឌ្ឍសេដ្ឋកិច្ចឌីជីថល។
លោកថ្លែងថា៖ «ក្រសួងពាណិជ្ជកម្មប្តេជ្ញាចិត្ត ក្នុងការបន្តលើកស្ទួយបរិយាកាសធុរកិច្ច និងវិនិយោគព្រមទាំងកិច្ចសម្រួលពាណិជ្ជកម្ម ដើម្បីទាក់ទាញការវិនិយោគបន្ថែមពីបរទេស»។
តាមលោក ប៉ាន សូរស័ក្តិ តំណាងសាជីវកម្មធំៗរបស់អាមេរិកទាំងនោះរួមមានក្រុមហ៊ុន Conoco Phillips, Ford, General Electric (GE), Chevron, Coca-Cola, Facebook, Amazon Web Service, Oracle, Google, Master Card និង Visa Card។
លោកបន្តថា៖ «គណៈប្រតិភូក្រុមប្រឹក្សាធុរកិច្ចនេះបង្ហាញសុទិដ្ឋិនិយមចំពោះទីផ្សារកម្ពុជា និងមានបំណងបណ្តាក់ទុនបន្ថែម ដើម្បីជំរុញកំណើនសេដ្ឋកិច្ច និងពាណិជ្ជកម្មនៃប្រទេសទាំង ២»។
គណៈប្រតិភូក្រុមប្រឹក្សាធុរកិច្ចអាមេរិក-អាស៊ាន ក៏បានជួបជាមួយលោក ត្រាំ អ៊ីវតឹក រដ្ឋមន្ត្រីក្រសួងប្រៃសណីយ៍ និងទូរគមនាគមន៍ផងដែរ ដើម្បីពិភាក្សាវិស័យធុរកិច្ចឌីជីថល។
លោក ត្រាំ អ៊ីវតឹក ថ្លែងថា៖ «គណៈប្រតិភូក្រុមប្រឹក្សាធុរកិច្ចអាមេរិក-អាស៊ាន បានបង្ហាញពីលទ្ធភាពរបស់ក្រុមហ៊ុនបច្ចេកវិទ្យាអាមេរិកចូលដោះស្រាយបញ្ហាប្រឈមក្នុងវិស័យបច្ចេកវិទ្យាកម្ពុជា»។
គិតត្រឹមខែ មេសា ឆ្នាំ ២០១៩ ទំហំពាណិជ្ជកម្មទ្វេភាគីកម្ពុជា-អាមេរិក មានទំហំជាង ១,៦ ពាន់លានដុល្លារ កើនឡើង ២៣,៧១ ភាគរយ បើធៀបទៅនឹងរយៈពេលដូចគ្នាកាលពីឆ្នាំមុន។ នេះបើតាមទំព័រហ្វេសប៊ុកក្រសួងពាណិជ្ជកម្ម។
ផលិតផលទាក់ទងទៅនឹងការធ្វើដំណើរពីកម្ពុជាដូចជា កាបូបដៃ កាបូបយួរ ឬវ៉ាលិសជាដើម ត្រូវបានរាប់បញ្ចូលជាផលិតផលទទួលបានប្រព័ន្ធអនុគ្រោះពន្ធពីអាមេរិក (GSP) តាំងពីខែ កក្កដា ឆ្នាំ ២០១៦ ដែលចាប់ពីពេលនោះមកការនាំចេញរបស់កម្ពុជាទៅអាមេរិកមានការកើនឡើងយ៉ាងខ្លាំងជាប្រចាំឆ្នាំ។ ផលិតផលសម្លៀកបំពាក់ និងស្បែកជើងផលិតពីកម្ពុជា មិនទាន់រាប់បញ្ចូលក្នុងប្រព័ន្ធ GSP របស់អាមេរិកទេ។
កាលពីឆ្នាំ ២០១៨ កម្ពុជាជាប្រទេសដែលបាននាំចេញទំនិញទៅអាមេរិកច្រើនលំដាប់ទី៥៧ ខណៈកម្ពុជាជាទីផ្សារទី១០៤ របស់អាមេរិក។ ការនាំចេញរបស់កម្ពុជាទៅអាមេរិកកាលពីឆ្នាំ ២០១៨ មានតម្លៃជាទឹកប្រាក់ ៣,៨ ពាន់លានដុល្លារ ខណៈកម្ពុជាបាននាំចូលទំនិញពីអាមេរិកមានតម្លៃជាង ៤៤៧ លានដុល្លារ។
កាលពីខែមិថុនា គណៈប្រតិភូមួយក្រុមនៃតំណាងពាណិជ្ជកម្មសហរដ្ឋអាមេរិក (USTR) និងក្រសួងការបរទេសអាមេរិកក៏បានមកកម្ពុជាដើម្បីពិភាក្សាពីបញ្ហាពាណិជ្ជកម្មទ្វេភាគីផងដែរ៕LA