.jpg)
រដ្ឋមន្ត្រីថាមពលអេមីរ៉ាតអារ៉ាប់រួម អារ៉ាប៊ីសាអ៊ូឌីត និងរុស្ស៊ី ក្នុងកិច្ចប្រជុំនៅថ្ងៃអាទិត្យ។ AFP
ក្រុងអាប៊ុយដាប៊ីៈ បណ្ដាប្រទេសផលិតប្រេងធំៗ បានឲ្យដឹងកាលពីថ្ងៃអាទិត្យថា ការផ្គត់ផ្គង់ប្រេងឆៅនៅឆ្នាំក្រោយ នឹងលើសពីតម្រូវការ ដោយអំពាវនាវឲ្យមានយុទ្ធសាស្ដ្រថ្មី ផ្អែកលើការកែប្រែផលិតកម្ម។
លោក Khalid al-Falih រដ្ឋមន្ដ្រីក្រសួងថាមពលនៃអារ៉ាប៊ីសាអ៊ូឌីត ដែលជាប្រទេសផ្គត់ផ្គង់ឈានមុខគេក្នុងពិភពលោកបានឲ្យដឹងថា ប្រទេសរបស់លោកនឹងកាត់បន្ថយការផលិតត្រឹម ៥ សែនបារ៉ែលក្នុង ១ ថ្ងៃ។
រុស្ស៊ីដែលជាប្រទេសផលិតឈានមុខគេទី ២ ក្នុងពិភពលោកបានឲ្យដឹងថា ប្រទេសនេះនឹងប្ដេជ្ញាចិត្តឲ្យមានកិច្ចព្រមព្រៀងថ្មីណាមួយ ក្នុងចំណោមបណ្ដាប្រទេសផលិតប្រេងទាំងនេះដើម្បីកាត់បន្ថយទិន្នផល។
ដោយជួបកិច្ចប្រជុំនៅទីក្រុងអាប៊ុយដាប៊ី ដើម្បីពិនិត្យមើលរបៀបក្នុងការទប់ស្កាត់ការធ្លាក់ចុះតម្លៃប្រេង បណ្ដាប្រទេសផលិតទាំងនោះបានឲ្យដឹងថា ពួកគេ «បានពិនិត្យឡើងវិញលើការផ្គត់ផ្គង់ប្រេងនៅពេលបច្ចុប្បន្ន និងមូលដ្ឋានតម្រូវ ហើយបានកត់សម្គាល់ថា ចក្ខុវិស័យឆ្នាំ ២០១៩ ចង្អុលបង្ហាញពីកំណើនការផ្គត់ផ្គង់ខ្ពស់ជាងតម្រូវការរបស់ពិភពលោក»។
ប្រទេសទាំងនេះបានឲ្យដឹងនៅក្នុងសេចក្ដីប្រកាសព័ត៌មានមួយនៅចុងកិច្ចប្រជុំនេះថា អាស្រ័យហេតុនេះ ប្រទេសទាំងអស់ នឹងពិចារណាពី «ជម្រើសលើការកែតម្រូវផលិតកម្មឆ្នាំ ២០១៩ ថ្មី ដែលអាចទាមទារឲ្យមានយុទ្ធសាស្ដ្រថ្មី ដើម្បីធ្វើឲ្យមានតុល្យភាពទីផ្សារ»។
លោក Suheil al-Mazrouei រដ្ឋមន្ដ្រីថាមពលអេមីរ៉ាតអារ៉ាប់រួម ដែលជាម្ចាស់ផ្ទះកិច្ចប្រជុំនេះបានឲ្យដឹងថា បណ្ដាប្រទេសផលិតទាំងនេះកំពុងរៀបចំកាត់បន្ថយទិន្នផល។
លោកថ្លែងថា៖ «យុទ្ធសាស្ដ្រថ្មីមួយ ចាំបាច់ត្រូវបង្កើតឡើងថា តើវាជាការកាត់បន្ថយការផលិត ឬអ្វីមួយផ្សេងទៀត ប៉ុន្តែវានឹងមិនមែនការបង្កើន ការផលិតនោះទេ»។
សេចក្ដីសម្រេចចិត្តមួយត្រូវបានរំពឹងថានឹងធ្វើឡើងនៅពេលកិច្ចប្រជុំរបស់រដ្ឋមន្ដ្រីរបស់ប្រទេសដែលជាសមាជិករបស់អង្គការប្រទេសនាំចេញប្រេង OPEC និងរដ្ឋមន្ដ្រីបណ្ដាប្រទេសដែលមិនមែនជាសមាជិករបស់អង្គការ OPEC នៅទីក្រុងវីយែន នៅថ្ងៃទី ៥ ខែធ្នូ ដើម្បីវាយតម្លៃទីផ្សារថាមពលពិភពលោក។
លោក Falih បានឲ្យដឹងថា ពួកគេនឹងសម្រេចចិត្តនៅពេលនោះថា តើត្រូវកែតម្រូវការផលិត និងតើត្រូវកម្រិតត្រឹមប៉ុន្មាន?
តម្លៃប្រេងបានធ្លាក់ចុះ ១ ភាគ ៥ នៃតម្លៃរបស់ខ្លួនក្នុងរយៈពេល ១ ខែប៉ុណ្ណោះ បន្ទាប់ពីការកើនឡើងដល់កម្រិតខ្ពស់រយៈពេល ៤ ឆ្នាំកាលពីដើមខែតុលា ដែលជំរុញដោយកត្តារួមផ្សំជាច្រើនដែលផ្ដោតលើការផ្គត់ផ្គង់កាន់តែខ្ពស់ និងការបារម្ភអំពីការធ្លាក់ចុះតម្រូវការ។
រដ្ឋមន្ដ្រីក្រសួងថាមពលមកពីរុស្ស៊ី អូម៉ង់ កូវ៉ែត និងអាល់ហ្សេរី ស្ថិតក្នុងចំណោមប្រទេសដែលបានចូលរួមក្នុងកិច្ចប្រជុំរយៈពេល ១ ថ្ងៃនេះ។
លោក Falih ថ្លែងថា អារ៉ាប៊ីសាអ៊ូឌីតបូមប្រេង ១០,៧ លានបារ៉ែលក្នុងមួយថ្ងៃចាប់ពីខែតុលាមក។
មុនពេលកិច្ចប្រជុំនេះ លោកបានទទួលស្គាល់ថា រហូតមកដល់ពេលនេះ មិនមានកិច្ចព្រមព្រៀងថ្មី ដើម្បីកាត់បន្ថយការផលិតក្នុងចំណោមបណ្ដាប្រទេសជាសមាជិក និងមិនមែនជាសមាជិករបស់អង្គការ OPEC នោះទេ ដែលប្រទេសទាំងនេះបាន ចុះកិច្ចព្រមព្រៀងមួយកាលពីចុងឆ្នាំ ២០១៦ ដើម្បីកាត់បន្ថយទិន្នផលត្រឹម ១,៨ លានបារ៉ែលក្នុង ១ ថ្ងៃ ដើម្បីដោះស្រាយវិបត្តិការផលិតលើសតម្រូវការ។
លោក Falih ថ្លែងថា៖ «មិនទាន់មានការព្រមព្រៀងនៅឡើយទេក្នុងចំណោមប្រទេសផលិតប្រេងស្តីពីការកាត់បន្ថយការផលិត»។
តម្លៃប្រេងឆៅ Brent បានធ្លាក់ចុះមកនៅក្រោម ៧០ ដុល្លារក្នុង ១ បារ៉ែលកាលពីថ្ងៃសុក្រ ខណៈប្រេងឆៅប្រភេទ WTI នៅទីក្រុងញូវយ៉ក បានធ្លាក់ចុះនៅក្រោម ៦០ ដុល្លារក្នុងមួយបារ៉ែល ដែលជាកម្រិតទាបរយៈពេល ៩ ខែ៕ AFP/LA
