.jpg)
អាជីវករលក់បន្លែនៅជិតផ្សារដើមគរ កាលពីថ្ងៃទី ១៨ មេសា ២០២១។ ហ៊ាន រង្សី
ភ្នំពេញ៖ កម្ពុជា និងវៀតណាមចាប់ផ្តើមដំណើរការនាំចូលបន្លែឡើងវិញ បន្ទាប់ពីភាគីវៀតណាមបានសម្រេចផ្អាកការនាំចេញបន្លែកាលពីថ្ងៃចន្ទ។
ការបើកឲ្យមានការនាំចូលបន្លែស្របពេលការផ្គត់ផ្គង់បន្លែក្នុងស្រុកកំពុងប្រឈមនឹងការដឹកជញ្ជូន ដោយសារវិធានការបិទខ្ទប់ទីក្រុងភ្នំពេញ និងក្រុងតាខ្មៅ ដើម្បីទប់ស្កាត់ការរាតត្បាតជំងឺកូវីដ ១៩។
លោក សែ ឈុនទ្រី ប្រធានច្រកទ្វារព្រំដែនអន្តរជាតិជ្រៃធំ (ខេត្តកណ្តាល) បានឲ្យដឹងថា នៅថ្ងៃទី ២១ ខែមេសានេះ វៀតណាមបានអនុញ្ញាតឲ្យនាំបន្លែចូលមកកម្ពុជាជាធម្មតាវិញហើយ បន្ទាប់វៀតណាមផ្អាករយៈពេល ២ ថ្ងៃ ក្រោយពីផ្សារដើមគរ និងផ្សារនាគមាសដែលផ្សារបោះដុំបន្លែធំជាងគេត្រូវបានបិទបណ្តោះអាសន្ន ក្រោយពីរកឃើញអាជីវករឆ្លងជំងឺកូវីដ ១៩។
លោកឲ្យដឹងថា៖ «ឥឡូវគាត់បើកឲ្យនាំចូលវិញហើយ នៅថ្ងៃនេះ (២១) គាត់បានជូនដំណឹងមកយើងកាលពីរសៀលថ្ងៃអង្គារ ហើយកិច្ចការនេះខ្ញុំក៏បានរាយការណ៍ជូនលោកអភិបាលខេត្តរួចហើយដែរ»។
លោក ឈុនទ្រី ឲ្យដឹងថា ការនាំចូលបន្លែចម្រុះពីវៀតណាមតាមច្រកព្រំដែនជ្រៃធំជាមធ្យម ២០ តោន ក្នុង ១ ថ្ងៃ ដើម្បីផ្គត់ផ្គង់មកទីផ្សារនៅកម្ពុជា។
លោកនិយាយថា៖ «បន្លែនាំចូលពីវៀតណាមគេបោះដុំឲ្យខ្មែរយើងដែលមកចាំដឹកនៅច្រកព្រំដែនជារៀងរាល់ព្រឹកសម្រាប់ចែកចាយបន្តនៅទីផ្សាស្រុកយើង»។
កម្ពុជាចាំបាច់នាំចូលបន្លែពីប្រទេសជិតខាងប្រមាណ ២០ ភាគរយ ដើម្បីបំពេញតម្រូវការក្នុងស្រុក ព្រោះកម្ពុជាអាចផលិតផ្គត់ផ្គង់ឲ្យទីផ្សារក្នុងស្រុកបានចន្លោះពី ៧៥ ទៅ ៨០ ភាគនៃតម្រូវការសរុប ១ លានតោន ក្នុង ១ ឆ្នាំ។ នេះបើតាមសេចក្តីប្រកាសព័ត៌មានរបស់ក្រសួងកសិកម្ម រុក្ខាប្រមាញ់ និងនេសាទ។
សេចក្តីប្រកាសព័ត៌មានឲ្យដឹងថា កម្ពុជាមិនមែននាំចូលបន្លែគ្រប់មុខនោះទេ ពោលគឺនាំចូលប្រភេទបន្លែតំបន់ត្រជាក់មួយចំនួនដែលពិបាកដាំដុះបាននៅកម្ពុជា និងនៅរដូវវស្សាដែលមិនមានលក្ខណៈអំណោយផលសម្រាប់ផលិតកសិកម្ម។
កញ្ញា ប៊ុន សៀង ប្រធានក្រុមហ៊ុន Natural Agriculture Village ដែលជាអ្នកផ្គត់ផ្គង់បន្លែបោះដុំក្នុងស្រុកប្រាប់ ភ្នំពេញ ប៉ុស្តិ៍ថា ចាប់តាំងពីបិទផ្សារដើមគរ និងនាគមាស ការបោះដុំបន្លែបានធ្លាក់ចុះដោយសារការរឹតបន្តឹងការធ្វើចរចារណ៍ដែលមិនអាចដឹកបន្លែពីបណ្តាខេត្តចូលមករាជធានីភ្នំពេញ។
កញ្ញានិយាយថា៖ «ខ្ញុំសូមសំណូមពរឲ្យអាជ្ញាធរពាក់ព័ន្ធជួយសម្រួលដល់ការដឹកជញ្ជូន ដើម្បីអាចដឹកបន្លែដាក់នៅតាមផ្សារទំនើបនានានៅទីក្រុងភ្នំពេញ»។
អាជីវករលកបន្លែនៅផ្សារដើមគ មុនការរីករាលដាលជំងឺកូវីដ។ រូបថត ភ្នំពេញ ប៉ុស្តិ៍
សេចក្តីប្រកាសព័ត៌មានក្រសួងកសិកម្មបន្ថែមថា បច្ចុប្បន្ននេះ កម្ពុជាមិនមែនកង្វះផលិតផលបន្លែក្នុងស្រុកនោះទេ ផ្ទុយទៅវិញកសិករដាំបន្លែ និងបណ្តុំកសិករជាច្រើនកំពុងប្រមូលផលបន្លែ ប៉ុន្តែពិបាកដឹកមកលក់នៅទីក្រុងភ្នំពេញដោយសារវិធានការបិទខ្ទប់ ដើម្បីទប់ស្កាត់ការឆ្លងរាលដាលជំងឺកូវីដ ១៩។
សេចក្តីប្រកាសព័ត៌មានបញ្ជាក់ថា៖ «នៅផ្សារអ៊ីអន ផ្សារភូមិកសិកម្មធម្មជាតិ និងហាងផ្សារខ្មែរបន្លែធម្មជាតិលក់បន្លែសុវត្ថិភាពមួយចំនួនទៀត កំពុងកង្វះបន្លែលក់មិនគ្រប់គ្រាន់ដោយសារមានការបិទផ្លូវពិបាកដឹកមកទីក្រុងភ្នំពេញ»។
នាយកមជ្ឈមណ្ឌលសិក្សាគោលនយោបាយ លោក ចាន់ សុផល បានសរសេរនៅលើទំព័រហ្វេសប៊ុកផ្លូវការរបស់លោកកាលពីថ្ងៃពុធថា តម្រូវការបន្លែស្រស់នឹងកើនឡើង ក្រោយពេលប្រជាពលរដ្ឋបានបរិភោគមីកញ្ចប់ ត្រីខកំប៉ុង ឬអាហារក្រៀម អស់មួយ ឬពីរសប្តាហ៍ ដូច្នេះគួរមានការជំរុញឱ្យមានការលក់បន្លែ ត្រី សាច់ ដោយរ៉ឺម៉កចល័តតាមភូមិនៅក្នុងរាជធានីភ្នំពេញ និងទីក្រុងដែលត្រូវបានបិទខ្ទប់។
លោកសរសេរថា៖ «ខ្ញុំយល់ថា អាជ្ញាធរគួរអនុញ្ញាតឱ្យអាជីវករបែបនេះ ធ្វើការចល័តបានដោយសេរី។ អាជ្ញាធរគួររៀបចំបង្កើតផ្សារលក់ដុំជាបណ្តោះអាសន្នថែមទៀត ក្រៅពីនៅទីក្រុងតាខ្មៅ ដើម្បីអាជីវករអាចទៅទិញទំនិញយកមកជិះលក់តាមភូមិ និងដើម្បីជាទីផ្សារសម្រាប់លក់បន្លែរបស់កសិករផង»៕
