The Phnom Penh Post Search

Search form




Logo of Phnom Penh Post newspaper Phnom Penh Post - ប្រទេស​អាស៊ាន ៤ ឯកភាព​បង្កើត​ផ្លូវ​អាកាស​ថ្មី​មួយ

ប្រទេស​អាស៊ាន ៤ ឯកភាព​បង្កើត​ផ្លូវ​អាកាស​ថ្មី​មួយ

យន្តហោះ​របស់​ក្រុមហ៊ុន​អាកាស​ចរណ៍​កម្ពុជា​អង្គរ​អ៊ែរ​ចុះ​ចត​នៅ​ព្រលាន​យន្ត​ហោះ​អន្តរជាតិ​ភ្នំពេញ​កន្លង​មក។
យន្តហោះ​របស់​ក្រុមហ៊ុន​អាកាស​ចរណ៍​កម្ពុជា​អង្គរ​អ៊ែរ​ចុះ​ចត​នៅ​ព្រលាន​យន្ត​ហោះ​អន្តរជាតិ​ភ្នំពេញ​កន្លង​មក។ ហេង ជីវ័ន

ប្រទេស​អាស៊ាន ៤ ឯកភាព​បង្កើត​ផ្លូវ​អាកាស​ថ្មី​មួយ

ភ្នំពេញៈ ​​ប្រទេស​កម្ពុជា​ ឡាវ ​ថៃ​ និង​វៀតណាម​បាន​យល់​ព្រម​ថា​នឹង​ចាប់​ផ្ដើម​ផ្លូវ​អាកាស​ថ្មី​មួយ​ក្នុង​បំណង​កាត់​បន្ថយ​ការ​ចំណាយ​លើ​ប្រេង​ឥន្ធនៈ ​និង​សន្សំ​ពេលវេលា​សម្រាប់​ការ​ដឹក​ជញ្ជូន​ផ្នែក​អាកាស​ចរណ៍​ក្នុង​ចំណោម​ប្រទេស​ទាំង​នេះ​។ នេះ​បើ​តាម​អ្នក​នាំ​ពាក្យ​រដ្ឋ​លេខាធិការ​ដ្ឋាន​អាកាស​ចរណ៍​ស៊ីវិល​ (SSCA)​។

លោក ​ស៊ិន ​ចាន់​សេរីវុត្ថា​ អ្នក​នាំ​ពាក្យ​ SSCA ​ថ្លែង​ថា​ កិច្ច​ព្រម​ព្រៀង​ស្ដី​ពី​ផ្លូវ​អាកាស​ថ្មី​នេះ​ត្រូវ​បាន​ចុះ​ហត្ថ​លេខា​កាល​ពី​សប្តាហ៍​មុន​នៅ​ខេត្ត​សៀមរាប​បន្ទាប់​ពី​កិច្ច​ប្រជុំ​ទ្វេ​ភាគី ​និង​ពហុ​ភាគី​ជាច្រើន​នៅ​ក្នុង​ចំណោម​ប្រទេស​ទាំង​នេះ។

លោក​លើក​ឡើង​ថា​៖ «​ផ្លូវ​អាកាស​ថ្មី​នេះ​អនុញ្ញាត​ឲ្យ​ក្រុម​ហ៊ុន​អាកាស​ចរណ៍​ហោះ​ហើរ​នៅ​រយៈ​កម្ពស់​១១​គីឡូ​ម៉ែត្រ​នៅ​លើ​ផ្លូវ​ពីរ​សម្រាប់​ឲ្យ​ក្រុមហ៊ុន​ហោះ​ហើរ​ទៅ​មក​នៅ​ពេល​ជាមួយ​គ្នា​។ ការ​តភ្ជាប់​ផ្លូវ​អាកាស​នេះ​ធ្វើ​ឲ្យ​ចម្ងាយ​ហោះហើរ​កាន់​តែ​ជិត​ជាង​មុន ដែល​កាត់​បន្ថយ​ការ​ចំណាយ​លើ​ប្រេង​ឥន្ធនៈ សន្សំ​ពេលវេលា​ហើយ​កាន់​តែ​មាន​សុវត្ថិភាព​ជាង​ផ្លូវ​អាកាស​ចាស់​»។ ផ្លូវ​ហោះ​ហើរ​ពី​មុន​គឺជា​ផ្លូវ​ហោះ​ហើរ​មួយ​ដែល​ក្រុមហ៊ុន​អាកាស​ចរណ៍​ចាំបាច់​ត្រូវ​រង់ចាំ។

លោក​បន្ត​ថា​៖ «​ផ្លូវ​ហោះ​ហើរ​នេះ​ផ្ដល់​អត្ថប្រយោជន៍​ដល់​ឧស្សាហកម្ម​អាកាស​ចរណ៍​របស់​ប្រទេស​នីមួយៗ​។ ​វា​ក៏​ជា​តម្រូវ​ការ​របស់​អង្គការ​អាកាស​ចរណ៍​ស៊ីវិល​អន្តរជាតិ​ផង​ដែរ​សម្រាប់​សមាជិក​ដើម្បី​ប្រើប្រាស់​បច្ចេកវិទ្យា​ដែល​អាច​កាត់​បន្ថយ​ការ​ចំណាយ​ និង​ជួយ​សង្គ្រោះ​បរិស្ថាន​»។

លោក អាង គឹមអៀង ប្រធាន​សមាគម​ភ្នាក់ងារ​ទេសចរណ៍​កម្ពុជា បាន​ថ្លែង​ថា​គំនិត​ផ្តួច​ផ្ដើម​នេះ​នឹង​ជំរុញ​ដល់​ភ្ញៀវ​ទេសចរ​កាន់​តែ​ច្រើន​ធ្វើ​ដំណើរ​ក្នុង​ចំណោម​ប្រទេស​ទាំង​នេះ​។

លោក​បញ្ជាក់​ថា​៖ «​ពេល​ការ​ចំណាយ​ត្រូវ​បាន​កាត់​បន្ថយ ក្រុមហ៊ុន​អាកាស​ចរណ៍​នឹង​កាត់​បន្ថយ​តម្លៃ ​ហើយ​ភ្នាក់ងារ​ទេសចរណ៍​នឹង​ធ្វើ​ការងារ​ជាច្រើន​ដើម្បី​ផ្សព្វ​ផ្សាយ​ទេសចរណ៍​កញ្ចាប់។ ភ្ញៀវ​ទេសចរ​នឹង​ចូល​មក​ប្រទេស​កម្ពុជា​ដោយ​សារ​តែ​សំបុត្រ​យន្ត​ហោះ​នឹង​មាន​តម្លៃ​កាន់​តែ​ទាប ហើយ​ពេលវេលា​ធ្វើ​ដំណើរ​នឹង​ត្រូវ​បាន​កាត់​បន្ថយ​»។

លោក ស៊ិន ​ចាន់​សេរីវុត្ថា ​ថ្លែង​ថា​ គំនិត​ផ្តួច​ផ្ដើម​ដូច​គ្នា​នេះ​មាន​បំណង​ដើម្បី​អនុវត្ត​ជាមួយ​បណ្ដា​ប្រទេស​តំបន់​ទន្លេ​មេគង្គ​ដែល​រួម​មាន​ខេត្ត​ពីរ​របស់​ប្រទេស​ចិន​ កម្ពុជា ​ឡាវ ​មីយ៉ាន់ម៉ា វៀតណាម​ និង​ថៃ។

បណ្ដា​ភាគី​ពាក់​ព័ន្ធ​ក៏​គ្រោង​នឹង​ពង្រីក​ផ្លូវ​ហោះហើរ​មួយ​ដូច​គ្នា​នេះ​ក្នុង​ចំណោម​បណ្ដា​ប្រទេស​ជា​សមាជិក​អាស៊ាន​ផង​ដែរ​ដែល​ក្រោយ​មក​នឹង​តភ្ជាប់​ទៅ​កាន់​បណ្ដា​ប្រទេស​ជា​ច្រើន​នៅ​ក្នុង​តំបន់​អឺរ៉ុប​។

តាម​ទិន្នន័យ​ពី​ក្រសួង​ទេសចរណ៍ កម្ពុជា​ទទួល​បាន​ទេសចរ​បរទេស​ជាង ១,៣ ​លាន​នាក់​មក​ពី​ឡាវ មីយ៉ាន់​ម៉ា វៀតណាម និង​ថៃ​កាល​ពី​ឆ្នាំ​មុន ធ្លាក់​ចុះ ១០​ភាគរយ​ធៀប​នឹង​ជាង ១,៤​លាន​នាក់​កាល​ពី​២០១៣៕PB

អត្ថបទគួរចាប់អារម្មណ៍