.jpg)
ក្រុងប៉េកាំងៈ ចិនបានក្លាយជាប្រទេសដែលទទួលបានការវិនិយោគផ្ទាល់ពីបរទេស (FDI) ច្រើនបំផុតនៅលើពិភពលោក ក្នុងឆមាសទី ១ ឆ្នាំ ២០១៨ ដោយទាក់ទាញបានលំហូរវិនិយោគប្រមាណ ៧០ ពាន់លានដុល្លារ។
តួលេខនេះត្រូវបានបង្ហាញក្នុងឯកសារតាមដាននិន្នាការវិនិយោគធំបំផុត ដែលបានចេញផ្សាយកាលពីថ្ងៃចន្ទដោយអង្គការសន្និសីទពាណិជ្ជកម្ម និងការអភិវឌ្ឍសហប្រជាជាតិ (UNCTAD)។
យោងតាមអង្គការ UNCTAD ការវិនិយោគផ្ទាល់ពីបរទេសក្នុងពិភពលោកបានធ្លាក់ចុះ ៤១ ភាគរយក្នុងអំឡុងឆមាសទី ១ នេះ មកនៅត្រឹមប្រមាណ ៤៧០ ពាន់លានដុល្លារអាមេរិក ពីចំនួន ៧៩៤ ពាន់លានដុល្លារក្នុងរយៈពេលដូចគ្នាកាលពីឆ្នាំ ២០១៧។
ការធ្លាក់ចុះនេះជាចម្បងដោយសារទំហំទឹកប្រាក់ដ៏ច្រើនរបស់ក្រុមហ៊ុនមេរបស់អាមេរិក ដែលបានបង្គរទុកប្រាក់ចំណេញពីបរទេសរបស់ខ្លួនពីក្រុមហ៊ុនបុត្រសម្ព័ន្ធរបស់ខ្លួននៅបរទេស បន្ទាប់ពីមានកំណែទម្រង់ពន្ធនៅអាមេរិក។
លោក James Zhan នាយកផ្នែកវិនិយោគ និងសហគ្រាសរបស់អង្គការ UNCTAD បានថ្លែងក្នុងអំឡុងសនិ្នសីទមួយ ក្នុងទីក្រុងហ្សឺណែវថា៖ «រូបភាពដ៏ធំនៃលំហូរFDI ពិភពលោក នៅតែមានភាពស្រអាប់ ដែលមានភាពខុសគ្នាបន្តិចពីអ្វីដែលយើងបានព្យាករនាពេលកន្លងមក»។
ទោះយ៉ាងណា លោក Zhan បានកត់សម្គាល់ថា៖ «លំហូរវិនិយោគទៅកាន់ប្រទេស ចិន បន្តកើនឡើង បើទោះជាមានការកើនឡើងភាពតានតឹងពាណិជ្ជកម្ម និងកំណើនចំណាយផលិតកម្មក៏ដោយ»។
អង់គ្លេសជាប់ចំណាត់ថ្នាក់ទី ២ ដោយលំហូរវិនិយោគកើនដល់ ៦៦ ពាន់លានដុល្លារខណៈអាមេរិកមាន ៤៦ ពាន់លានដុល្លារ៕ P.Daily/KC
