ក្រុងសេអ៊ូលៈ ប្រធានក្រុមហ៊ុន LG Group បានទទួលមរណភាពហើយក្នុងវ័យ ៧៣ ឆ្នាំ។ នេះបើយោងតាមមន្ត្រីក្រុមហ៊ុនអេឡិចត្រូនិកដ៏ធំរបស់ប្រទេសកូរ៉េខាងត្បូងមួយនេះកាលពីថ្ងៃអាទិត្យ។
លោក Koo Bon-moo ត្រូវបានគេទទួលស្គាល់ដោយសារការពង្រីកអាណាចក្រអាជីវកម្មនេះដែលភាគច្រើនផ្តោតលើគ្រឿងអេឡិចត្រូនិកប្រើប្រាស់ អេក្រង់ និងសារធាតុគីមីដែលត្រូវបានបង្កើតឡើងដោយជីតារបស់លោកក្នុងឆ្នាំ ១៩៤៧។
ក្នុងរយៈពេលជាង ២០ ឆ្នាំនៃការដឹកនាំរបស់លោក Koo ក្នុងនាមជាមន្ត្រីប្រតិបត្តិកំពូលរបស់ក្រុមហ៊ុន LG Group ការលក់បានកើនឡើងយ៉ាងខ្លាំង ដោយក្រុមហ៊ុននេះបានកត់ត្រាប្រាក់ចំណូលចំនួន ១៦០ ពាន់ពាន់លានវ៉ុន (១៤៨ ពាន់លានដុល្លារអាមេរិក) ពីការលក់កាលពីឆ្នាំមុនពោលគឺកើនឡើងធៀបនឹងប្រាក់ចំណូលប្រមាណ ៣០ ពាន់ពាន់លានវ៉ុនក្នុងឆ្នាំ ១៩៩៤។
ទីភ្នាក់ងារព័ត៌មាន Yonhap របស់កូរ៉េខាងត្បូងបានដកស្រង់សម្តីមន្ត្រីក្រុមហ៊ុននេះខណៈថ្លែងថា សហគ្រិនរូបនេះបានចូលសម្រាកនៅមន្ទីរពេទ្យកាលពីសប្តាហ៍មុន បន្ទាប់ពីបានឆ្លងកាត់ការវះកាត់ខួរក្បាល។
លោក Koo ត្រូវបានគេរាយការណ៍ថាលោកបានស្នើសុំឲ្យកូនប្រុសចិញ្ចឹមរបស់លោកគឺលោក Koo Kwang-mo ទទួលតំណែងបន្តពីរូបលោកដើម្បីដឹកនាំក្រុមហ៊ុនដ៏ធំដែលត្រូវបានគ្រប់គ្រងដោយគ្រួសារមួយនេះ។
លោក Koo Kwang-mo វ័យ ៤០ ឆ្នាំគឺជាកូនប្រុសច្បងរបស់ប្អូនប្រុសលោក Koo Bon-moo តែត្រូវបានសហគ្រិនរូបនេះយកមកចិញ្ចឹមក្នុងឆ្នាំ ២០០៤ បន្ទាប់ពីលោកបានបាត់បង់កូនប្រុសបង្កើតរបស់លោកដោយសារគ្រោះថ្នាក់ចរាចរណ៍ក្នុងទសវត្សរ៍ឆ្នាំ ១៩៩០៕ BP