អ្វីទៅជាស្តង់ដាគណនេយ្យ?
ស្ដង់ដាគណនេយ្យ ជាធាតុផ្សំដ៏សំខាន់មួយក្នុងក្របខ័ណ្ឌគណនេយ្យ និងការរាយការណ៍ហិរញ្ញវត្ថុ ព្រមទាំងជួយសម្រួលដល់ក្រុមហ៊ុន/សហគ្រាស និងថ្នាក់ដឹកនាំរបស់ក្រុមហ៊ុន ដើម្បីកំណត់ឱ្យបានច្បាស់លាស់ពីស្តង់ដាដែលក្រុមហ៊ុនបានប្រើប្រាស់សម្រាប់ការរៀបចំរបាយការណ៍ហិរញ្ញវត្ថុ។
ស្តង់ដាគណនេយ្យ គឺជាឯកសារគោលនយោបាយមូលដ្ឋានមួយ និងជាសំណុំទូទៅនៃគោលការណ៍បទដ្ឋាន នីតិវិធីកំណត់អំពីការអនុវត្តជាមូលដ្ឋាន ព្រមទាំងជាគោលនយោបាយគណនេយ្យហិរញ្ញវត្ថុ។ ស្តង់ដាគណនេយ្យត្រូវបានរៀបចំឡើងដោយអ្នកជំនាញផ្នែកគណនេយ្យ ឬរាជរដ្ឋាភិបាលដែលដើរតួនាទីជានិយតកររៀបចំស្តង់ដា ដូចជាក្រុមប្រឹក្សាស្ដង់ដាគណនេយ្យហិរញ្ញវត្ថុ (FASB) និងក្រុមប្រឹក្សាស្តង់ដាគណនេយ្យអន្ដរជាតិ (IASB)។ ស្តង់ដាគណនេយ្យនឹងមានបង្ហាញពីទិដ្ឋភាពនៃការទទួលស្គាល់ ការកត់ត្រាការវាស់វែងការកែសម្រួល និងការបង្ហាញពីប្រតិបត្តិការគណនេយ្យដែលមាននៅក្នុងរបាយការណ៍ហិរញ្ញវត្ថុ។
ស្ដង់ដារគណនេយ្យនឹងជួយពង្រឹងដល់តម្លាភាពនៃការរាយការណ៍ហិរញ្ញវត្ថុជាសកល និងផ្ដល់ជាបទដ្ឋានមួយច្បាស់លាស់សម្រាប់ការអនុវត្ដគណនេយ្យដោយផ្ដល់ភាពងាយស្រួល និងមានទំនុកចិត្តសម្រាប់ក្រុមហ៊ុន/សហគ្រាស វិនិយោគិននិងអ្នកប្រើប្រាស់របាយការណ៍ហិរញ្ញវត្ថុទាំងអស់។ ការកំណត់ឱ្យមានស្តង់ដាគណនេយ្យនេះ នឹងធ្វើឱ្យប្រទេសនានានៅលើពិភពលោកអាចអនុវត្តរួមគ្នានូវពាក្យបច្ចេកទេស ទម្រង់ និងការគណនាតួលេខនៅក្នុងរបាយការណ៍ហិរញ្ញវត្ថុទាំងមូល ដូចជាតួលេខដែលបង្ហាញក្នុងរបាយការណ៍ស្ថានភាពហិរញ្ញវត្ថុ និងរបាយការណ៍លទ្ធផលជាដើម។
ហេតុអ្វីបានជាស្តង់ដាគណនេយ្យមានសារៈសំខាន់?
ការអនុវត្ដស្តង់ដាគណនេយ្យផ្ដល់អត្ថប្រយោជន៍សម្រាប់ក្រុមហ៊ុន និងវិនិយោគិនរួមមាន៖
១. ស្តង់ដារួមតែមួយ៖
ផ្ដោតលើការតម្រូវឱ្យក្រុមហ៊ុន/សហគ្រាស អនុវត្តដូចគ្នានូវការកត់ត្រាគណនេយ្យដោយស្របតាមក្របខ័ណ្ឌគណនេយ្យពាក់ព័ន្ធផ្សេងៗ។ ក្រុមហ៊ុន/សហគ្រាស គួរប្រកាន់ឱ្យបានខ្ជាប់ខ្ជួននូវរាល់ការកត់ត្រាគណនេយ្យដែលបានធ្វើឡើងស្របតាមស្តង់ដា ដូចៗគ្នា។ នៅពេលដែលការរៀបចំរបាយការណ៍ហិរញ្ញវត្ថុអនុលោមតាមស្តង់ដាតែមួយ ធ្វើឱ្យភាគីពាក់ព័ន្ធងាយស្រួលក្នុងការពិនិត្យ និងប្រៀបធៀបលទ្ធផលហិរញ្ញវត្ថុរបស់ក្រុមហ៊ុនប្រកបដោយទំនុកចិត្ត។
២. ការពង្រឹងទំនុកចិត្តលើរបាយការណ៍ហិរញ្ញវត្ថុ៖
ភាគីពាក់ព័ន្ធទាំងអស់របស់ក្រុមហ៊ុនអាចទទួលបានព័ត៌មានអំពីស្ថានភាពក្រុមហ៊ុនបានតាមរយៈរបាយការណ៍ហិរញ្ញវត្ថុ ហើយភាគីពាក់ព័ន្ធទាំងនេះអាចធ្វើការសម្រេចចិត្តទៅបានក៏តាមរយៈការបង្ហាញ ឬទិន្នន័យហិរញ្ញវត្ថុដែលក្រុមហ៊ុនបានរៀបចំនេះដែរ។ បន្ថែមពីនេះ វិនិយោគិនសក្ដានុពលមួយចំនួនធំអាចធ្វើការសម្រេចចិត្តវិនិយោគតាមរយៈការទទួលបានព័ត៌មានពីរបាយការណ៍ហិរញ្ញវត្ថុដូចគ្នា។
៣.ការផ្ដល់ជាជំនួយសម្រាប់សវនករ៖
ស្តង់ដាគណនេយ្យបានបញ្ចូលគ្នារាល់គោលនយោបាយ ច្បាប់និងបទប្បញ្ញត្តិគណនេយ្យនៅក្នុងទម្រង់សរសេរតែមួយ ដែលគោលនយោបាយទាំងនោះត្រូវតែអនុវត្តតាម។ ករណីសវនករពិនិត្យឃើញថាគោលនយោបាយទាំងនោះត្រូវបានអនុវត្តន៍តាមត្រឹមត្រូវ សវនករអាចបញ្ជាក់បានថារបាយការណ៍ហិរញ្ញវត្ថុដែលបានរៀបចំឡើងនោះគឺមានភាពត្រឹមត្រូវ។ ដោយឡែក ករណីការកត់ត្រា ឬការរាយការណ៍គណនេយ្យបានធ្វើឡើងដោយមិនស្របតាមស្តង់ដាដែលមានជាធរមាន សវនករអាចធ្វើការវិនិច្ឆ័យបានថា ទិន្នន័យដែលបានបង្ហាញក្នុងរបាយការណ៍ហិរញ្ញវត្ថុអាចមានបញ្ហា។
៤. អនុលោមភាពតាមបទប្បញ្ញត្ដិ៖
និយតកររបស់រាជរដ្ឋាភិបាលកំណត់ថា រាល់ក្រុមហ៊ុន/សហគ្រាសត្រូវតែអនុវត្តតាមស្តង់ដាគណនេយ្យដែលមានជាធរមាន។ ការអនុវត្តតាមស្តង់ដាគណនេយ្យផ្ដល់ជាអត្ថប្រយោជន៍ជូនដល់វិនិយោគិន ឬម្ចាស់អាជីវកម្ម តាមរយៈការការពារពីកំហុសឆ្គងដែលអាចកើតមានឡើងក្នុងក្រុមហ៊ុន/សហគ្រាស។ ជាមួយគ្នានេះការអនុវត្តតាមស្តង់ដាក៏ជួយពង្រីកនូវតម្លាភាពប្រតិបត្តិការអាជីវកម្មដែលជាកត្តាមួយពង្រឹងដល់ទីផ្សាររបស់ក្រុមហ៊ុន/សហគ្រាសឱ្យកាន់តែមានប្រសិទ្ធភាពខ្ពស់។
ស្តង់ដាគណនេយ្យសម្រាប់ក្រុមហ៊ុនបោះផ្សាយលក់មូលបត្រជាសាធារណៈនៅកម្ពុជាក្រុមប្រឹក្សាជាតិគណនេយ្យ (NAC) ជានិយតកររបស់រាជរដ្ឋាភិបាលក្នុងការគ្រប់គ្រង ពង្រឹង និងជំរុញដល់ការអភិវឌ្ឍវិជ្ជាជីវៈគណនេយ្យ និងសវនកម្ម ព្រមទាំងជាសេនាធិការឱ្យក្រសួងសេដ្ឋកិច្ច និងហិរញ្ញវត្ថុលើបេសកកម្មគ្រប់គ្រង និងអភិវឌ្ឍវិស័យគណនេយ្យ និងសវនកម្មតាមរយៈការរៀបចំការអនុវត្ត ការត្រួតពិនិត្យ និងការវាយតម្លៃនូវគោលនយោបាយ ក្របខ័ណ្ឌច្បាប់ និងបទប្បញ្ញត្តិពាក់ព័ន្ធ។
យោងតាមប្រកាសលេខ ០៦៨ ស.ហ.វ/ប្រ.ក ចុះថ្ងៃទី ៨ ខែមករា ឆ្នាំ ២០០៩ ស្ដីពីការដាក់ឱ្យប្រើស្តង់ដារបាយការណ៍ទាក់ទងនឹងហិរញ្ញវត្ថុកម្ពុជាបានចែងថា “រាល់ក្រុមហ៊ុន/សហគ្រាស ក្នុងព្រះរាជាណាចក្រកម្ពុជា ត្រូវតែអនុវត្តតាមទាំងស្រុងនូវស្តង់ដារបាយការណ៍ទាក់ទងនឹងហិរញ្ញវត្ថុអន្ដរជាតិ (IFRSs)” ដែលចេញដោយក្រុមប្រឹក្សាស្តង់ដាគណនេយ្យអន្ដរជាតិ (IASB) ដោយរួមទាំងការបកប្រែ និងការកែសម្រួលស្តង់ដា។
កាលពីថ្ងៃទី ២៨ ខែ សីហា ឆ្នាំ ២០០៩ ក្រុមប្រឹក្សាជាតិគណនេយ្យ (NAC) បានចេញសេចក្ដីជូនដំណឹងលេខ ០៩៧/០៩ ស.ហ.វ-ក.ជ.គ ស្ដីពីការដាក់ឱ្យប្រើស្តង់ដារបាយការណ៍ទាក់ទងនឹងហិរញ្ញវត្ថុអន្តរជាតិនៃកម្ពុជា (CIFRS) និងស្តង់ដារបាយការណ៍ទាក់ទងនឹងហិរញ្ញវត្ថុអន្ដរជាតិនៃកម្ពុជាសម្រាប់សហគ្រាសធុនតូច និងមធ្យម (CIFRS for SMEs)។
បន្ថែមលើនេះយោងតាមប្រកាសរបស់ក្រសួងសេដ្ឋកិច្ច និងហិរញ្ញវត្ថុលេខ ១០១ ស.ហ.វ.ប្រ.ក ចុះថ្ងៃទី ២៤ ខែកុម្ភៈ ឆ្នាំ ២០១១ ស្ដីពីការដាក់ឱ្យប្រើស្តង់ដារបាយការណ៍ទាក់ទងនឹងហិរញ្ញវត្ថុសម្រាប់ក្រុមហ៊ុនបោះផ្សាយលក់មូលបត្រជាសាធារណៈបានចែងថា៖ “ក្រុមហ៊ុនបោះផ្សាយលក់មូលបត្រជាសាធារណៈត្រូវអនុវត្តតាមរបាយការណ៍ទាក់ទងនឹងហិរញ្ញវត្ថុអន្ដរជាតិនៃកម្ពុជា (CIFRS) ដូចមានកំណត់ក្នុងប្រកាសលេខ ០៦៨ ស.ហ.វ/ប្រ.ក របស់ក្រសួងសេដ្ឋកិច្ច និងហិរញ្ញវត្ថុចុះថ្ងៃទី ៨ ខែមករា ឆ្នាំ ២០០៩ ស្ដីពីការដាក់ឱ្យប្រើស្តង់ដារបាយការណ៍ទាក់ទងនឹងហិរញ្ញវត្ថុកម្ពុជា (ស.រ.ហ.ក) និងសេចក្ដីជូនដំណឹងលេខ ០៩៧/០៩ សហវ/ក.ជ.គ ចុះថ្ងៃទី ២៨ ខែ សីហា ឆ្នាំ ២០០៩ ស្ដីពីការដាក់ឱ្យប្រើស្តង់ដារបាយការណ៍ទាក់ទងនឹងហិរញ្ញវត្ថុអន្ដរជាតិនៃកម្ពុជា និងស្តង់ដារបាយការណ៍ទាក់ទងនឹងហិរញ្ញវត្ថុអន្ដរជាតិនៃកម្ពុជាសម្រាប់សហគ្រាសធុនតូច និងមធ្យម (CIFRS for SMEs)។ ក្នុងន័យនេះ រាល់ក្រុមហ៊ុន/សហ គ្រាស ដែលមានគោលបំណង ឬចង់បោះផ្សាយលក់មូលបត្រជាសាធារណៈក្នុងព្រះរាជាណាចក្រកម្ពុជាត្រូវតែអនុវត្តតាមស្តង់ដា និងបទប្បញ្ញត្តិពាក់ព័ន្ធដទៃទៀតដែលមានជាធរមានក្នុងព្រះរាជាណាចក្រកម្ពុជា៕
រៀបរៀងដោយ៖ គណៈកម្មការមូលបត្រកម្ពុជា នាយកដ្ឋានគ្រប់គ្រងការបោះផ្សាយលក់មូលបត្រ
អ៊ីមែល៖ issuance@secc.gov.kh
ទូរស័ព្ទ៖ 023 885 611