ទីក្រុងគូឡាឡាំពូៈ លោក ស៊ី ជីនភីង ប្រធានាធិបតីចិនកាលពីថ្ងៃព្រហស្បតិ៍បានចាត់ទុកប្រទេសខ្លួនជាចំណុចស្នូលសម្រាប់ពាណិជ្ជកម្មសេរីសកលដោយប្តេជ្ញារក្សាសេដ្ឋកិច្ចដែលមានទំហំធំទូលាយ និងព្រមានប្រឆាំងនឹងការគាំពារនិយមនៅក្នុងសេដ្ឋកិច្ចសកលដែលបានរងផលប៉ះពាល់ដោយសារការរីករាលដាលជំងឺរាតត្បាតកូវីដ ១៩។
ដោយមានការចុះហត្ថលេខាលើកតិកាសញ្ញាពាណិជ្ជកម្មធំជាងគេបំផុតនៅលើពិភពលោកកាលពីចុងសប្តាហ៍លោកស៊ីបាននិយាយថា៖ «អាស៊ីប៉ាស៊ីហ្វិកឈានមុខគេក្នុងការជំរុញកំណើនសេដ្ឋកិច្ចពិភពលោក» នៅក្នុងពិភពលោកដែលរងការវាយប្រហារដោយបញ្ហាប្រឈមជាច្រើនរួមទាំងវីរុសកូរ៉ូណា។
លោកបានសន្យាចំពោះភាពបើកចំហដល់វិស័យពាណិជ្ជកម្ម និងបដិសេធនូវលទ្ធភាពនៃការបំបែកនៃសេដ្ឋកិច្ចចិន ដែលបានលើកឡើងនៅក្នុងការធ្វើអត្ថាធិប្បាយរបស់លោកចំពោះគោលនយោបាយពាណិជ្ជកម្មអរិភាពនៃគោលនយោបាយរបស់រដ្ឋបាលលោក ដូណាល់ ត្រាំ ដែលបានធ្វើឱ្យប៉ះពាល់ដល់ប្រទេសចិន ជាមួយនឹងពន្ធ និងការរឹតត្បិតបច្ចេកវិទ្យា។
វេទិកាកិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក (APEC) បានប្រជុំតាមអនឡាញនៅឆ្នាំនេះ ដោយសារការរីករាលដាលវីរុសកូរ៉ូណា ដោយជួបប្រជុំប្រទេសទាំង ២១ រួមទាំង អាមេរិក និងចិន និងមានសេដ្ឋកិច្ចធំបំផុតទាំង ២ និងមានចំណែកប្រហែល ៦០ ភាគរយនៃ GDP ពិភពលោក។
វាមិនទាន់ច្បាស់ភ្លាមៗទេថាតើ លោក ត្រាំ ដែលឈឺចាប់ដោយសារការចាញ់ឆ្នោតនឹងត្រូវចូលរួមកិច្ចប្រជុំកំពូលនេះ ឬបញ្ជូនប្រតិភូជាន់ខ្ពស់ក្នុងរដ្ឋបាលរបស់គាត់នោះ។
នៅក្នុងសុន្ទរកថាមួយដែលលើកឡើងពីភាពជោគជ័យលើសេដ្ឋកិច្ច «ភាពធន់និងភាពរឹងមាំ» នៃសេដ្ឋកិច្ចរបស់ចិនក្នុងការត្រឡប់មកវិញក្រោយវិបត្តិវីរុសដែលបានលេចចេញជាលើកដំបូងនៅកណ្តាលទីក្រុងវូហាន លោក ស៊ី បានព្រមានដល់បណ្តាប្រទេសដែលប្រកាន់មាំលើរបាំងពាណិជ្ជកម្មថា នឹង រងរបួសដោយខ្លួនឯងវិញ។
លោកនិយាយថា៖ «ភាពបើកចំហធ្វើឱ្យប្រទេសវិវឌ្ឍទៅមុខ ខណៈដែលការគាំពារធ្វើឱ្យវាថយក្រោយ»។
លោកបន្ថែមថា៖ «ប្រទេសចិន នឹងធ្វើកិច្ចសហប្រតិបត្តិការយ៉ាងសកម្មជាមួយប្រទេសនានា តំបន់ និងសហគ្រាសទាំងអស់ដែលចង់ធ្វើដូច្នេះ។ យើងនឹងបន្តលើកស្ទួយភាពបើកទម្លាយ និងកិច្ចសហប្រតិបត្តិការ»។
នៅក្នុងតំបន់ APEC ការនាំចេញរបស់អូស្ត្រាលីរួមមានសាច់គោ ស្រា និងស្រូវសាលីត្រូវបានរំខានដល់ទីផ្សារធំបំផុតរបស់ពួកគេដោយសារតែមានការជជែកវែកញែកខាងការទូតជុំវិញការឈានដល់ចំណុចកំពូលនៃជំងឺរាតត្បាតក៏ដូចជាការប្រឆាំងនឹងការចោទប្រកាន់របស់ចារកម្មទៅវិញទៅមក៕ RR