ក្រុងប៉ារីសៈ ប្រព័ន្ធផ្ទេរប្រាក់ SWIFT បានក្លាយជាឆ្អឹងខ្នងនៃហិរញ្ញវត្ថុអន្តរជាតិយ៉ាងស្ងៀមស្ងាត់ ខណៈតួនាទីរបស់ប្រព័ន្ធនេះ ក្នុងការដាក់ទណ្ឌកម្មឡើងវិញរបស់អាមេរិកទៅលើអុីរ៉ង់ បានបង្ហាញចេញឡើង។
នៅសប្តាហ៍មុន ក្រុមហ៊ុន SWIFT បានប្រកាសថា ខ្លួនបានផ្អាកធនាគារអុីរ៉ង់ជាច្រើនពីសេវាកម្មរបស់ខ្លួនបន្ទាប់ពីសហរដ្ឋអាមេរិកបានដាក់ទណ្ឌកម្មឡើងវិញ លើអុីរ៉ង់ទាក់ទងនឹងកម្មវិធីអាវុធនុយក្លេអ៊ែរ។
ក្រុមហ៊ុនរបស់ប្រទេស បែលហ្ស៊ិក មួយនេះមិនត្រូវបានគេស្គាល់ទូលំទូលាយឡើយក្នុងចំណោមសាធារណជនទូទៅ ហើយកម្រធ្វើការផ្សព្វផ្សាយណាស់ ប៉ុន្ដែប្រព័ន្ធផ្ញើសារដ៏មានសុវត្ថិភាពរបស់ក្រុមហ៊ុននេះ គឺជាកូនសោគន្លឹះមួយសម្រាប់ធនាគារនានាក្នុងការ ផ្ទេរប្រាក់ក្នុងចំណោមធនាគារទាំងនោះ។ ដូច្នេះហើយវាផ្តល់ឲ្យក្រុមហ៊ុននេះនូវទីតាំងដ៏សំខាន់មួយក្នុងប្រព័ន្ធហិរញ្ញវត្ថុអន្តរជាតិ។
បើគ្មានសេវាកម្មរបស់ SWIFT ទេ ធនាគារអុីរ៉ង់នឹងជួបការលំបាកក្នុងការធ្វើអាជីវកម្មជាមួយនឹងអតិថិជនណាដែលត្រៀមខ្លួនប្រឆាំងនឹងទណ្ឌកម្មអាមេរិកដើម្បីរក្សាទំនាក់ទំនងជាមួយទីក្រុងតេអេរ៉ង់។
បង្កើតឡើងក្នុងឆ្នាំ ១៩៧៣ SWIFT ដែលមកពីពាក្យថា Society for Worldwide Interbank Financial Telecommunication តាមពិតទៅមិនគ្រប់គ្រងការផ្ទេរមូលនិធិណាមួយដោយខ្លួនឯងទេ។
ប៉ុន្តែប្រព័ន្ធផ្ញើសាររបស់ SWIFT ដែលបង្កើតនៅទសវត្សឆ្នាំ ១៩៧០ គឺដើម្បីជំនួសឲ្យការ ពឹងផ្អែកលើម៉ាស៊ីនផ្ញើសារ Telex ផ្តល់ឲ្យធនាគារនូវមធ្យោបាយក្នុងការទាក់ទងបានឆាប់រហ័សប្រកបដោយទំនុកចិត្តនិងមានតម្លៃថោក។
ធនាគារប្រើប្រាស់ប្រព័ន្ធផ្ញើសារ SWIFT នេះដើម្បីផ្ញើសារដែលមានស្តង់ដារអំពីការផ្ទេរប្រាក់ក្នុងចំណោមធនាគារទាំងនោះ និងការផ្ទេរប្រាក់សម្រាប់អតិថិជន និងការបញ្ជាទិញឬលក់ទ្រព្យសកម្មជាដើម។
ស្ថាប័ននានានឹងទទួលបាននូវអ្វីដែលត្រូវបានគេហៅថាកូដ SWIFT ឬក៏លេខសម្គាល់អត្តសញ្ញាណពាណិជ្ជកម្ម (BIC) ដែលជាលេខកូដមានចាប់ពី ៨ ទៅដល់ ១១ ខ្ទង់ ក្នុងនោះ រួមមាន ឈ្មោះ និងប្រទេស ដើមផងដែរ។
ក្រុមហ៊ុន SWIFT បានឲ្យដឹងតាមរយៈគេហទំព័ររបស់ខ្លួនថា៖ «សេវាផ្ញើសាររបស់ SWIFT ត្រូវបានប្រើប្រាស់ និងទទួលបានការទុកចិត្តពីស្ថាប័នហិរញ្ញវត្ថុជាង ១១,០០០ ស្ថាប័នក្នុងប្រទេសជាង ២០០ ជុំវិញពិភពលោក»។
ក្រុមហ៊ុនឲ្យដឹងទៀតថា៖ «រួមជាមួយនឹងតួនាទីរបស់យើងក្នុងការធ្វើស្តង់ដារនីយកម្ម SWIFT អាចធានាបាននូវការប្រាស្រ័យទាក់ទងហិរញ្ញវត្ថុប្រកបដោយសុវត្ថិភាព រលូន និងដោយស្វ័យប្រវត្តិរវាងអ្នកប្រើប្រាស់»។
លោក Guntram Wolff នាយកក្រុមបង្កើតគោលនយោបាយ Bruegel ដែលមានមូលដ្ឋាននៅទីក្រុងប្រ៊ុចសែល បានមានប្រសាសន៍ថា៖ «វាពិតជាបណ្តាញសកលលោកសម្រាប់ផ្ទេរព័ត៌មានរវាងធនាគារនៅជុំវិញពិភពលោក។ វាជាសេវាទូរគមនាគមន៍មួយដែលជួយឲ្យការចំណាយឈានទៅដល់ធនាគារត្រឹមត្រូវ»។
លោក Wolff ថ្លែងថា៖ «មានការប៉ុនប៉ងមួយចំនួនក្នុងការ បង្កើតបណ្តាញប្រកួតប្រជែង ឬជំនួសនានា ប៉ុន្តែនៅតែមានការពិបាកខ្លាំង ក្នុងការធ្វើវា» ដោយសារគ្រប់គ្នាកំពុងប្រើប្រាស់ SWIFT ដែលធ្វើឲ្យវាស្ទើរតែក្លាយជាបណ្តាញផ្តាច់មុខទៅហើយ៕ AFP/ NS