ក្រុងបាងកកៈ ទំហំនៃការទិញដែលចុះខ្សោយដោយសារប្រាក់ចំណូលគ្រួសារកាន់តែទាបក្នុងវិស័យកសិកម្ម និងមិនមែនកសិកម្ម បានរារាំងដល់ការស្ទុះងើបឡើងវិញនៃសេដ្ឋកិច្ចប្រកបដោយភាពទូលំទូលាយ។ នេះបើយោងតាមមន្ត្រីជាន់ខ្ពស់ម្នាក់នៅធនាគារកណ្តាលថៃ។
លោក Don Nakornthab នាយកជាន់ខ្ពស់ទទួលបន្ទុកគោលនយោបាយសេដ្ឋកិច្ច និងរូបិយវត្ថុបានថ្លែងថា អំណាចទិញ ជាពិសេសសម្រាប់ប្រជាជននៅក្នុងផ្នែកប្រាក់ចំណូលទាប នៅតែមានភាពទន់ខ្សោយនៅឡើយកាលពីខែកុម្ភៈ ខណៈប្រាក់ចំណូលគ្រួសារបានធ្លាក់ចុះធៀបនឹងរយៈពេលដូចគ្នាកាលពីឆ្នាំមុន។
លោកថ្លែងថាបើទោះជាការផ្គត់ផ្គង់ផលិតផលកសិកម្មក្នុងខែកុម្ភៈបានកើនឡើងក៏ដោយ ក៏តម្លៃជាពិសេសតម្លៃដូងប្រេង និងកៅស៊ូបានធ្លាក់ចុះពី ៤០-៥០ ភាគរយបើធៀបនឹងរយៈពេលដូចគ្នាកាលពីឆ្នាំមុន។
ប្រាក់ចំណូលពីវិស័យកសិកម្មបានថយចុះចាប់តាំងពីឆមាសទី ២ ឆ្នាំមុន ហើយប្រាក់ចំណូលពីវិស័យមិនមែនកសិកម្ម ដោយមិនរាប់បញ្ចូលអ្នករកបានប្រាក់ចំណូលមធ្យម និងកម្លាំងពលកម្មដែលទទួលបានប្រាក់ខែក៏ធ្លាក់ចុះផងដែរ។
លោក Don បានមានប្រសាសន៍ថា៖ «ការស្ទុះងើបឡើងវិញនៃសេដ្ឋកិច្ច នៅតែមិនទាន់មានតុល្យភាព ហើយការប្រើប្រាស់ក្នុងស្រុកនៅតែខ្សោយ»។
លោកបានបន្ថែមថា៖ «យើងត្រូវបន្តពិនិត្យតាមដានស្ថានភាពនេះបន្តទៀត។ សេចក្តីថ្លែងការណ៍នាពេលថ្មីៗនេះរបស់គណៈកម្មាធិការគោលនយោបាយរូបិយវត្ថុ ក៏បានឲ្យដឹងផងដែរថា វាជាបញ្ហារចនាសម្ព័ន្ធ។ ទោះជាយ៉ាងណា ការប្រើប្រាស់ឯកជនត្រូវបានរំពឹងថានឹងមានភាពប្រសើរឡើងហើយរំពឹងថានឹងកើន ៣,៣ ភាគរយនៅឆ្នាំនេះ»៕ KC