.jpg)
ប្រាក់ចំណូលរដ្ឋាករទឹកភ្នំពេញធ្លាក់ចុះច្រើនកាលពីឆ្នាំមុន។ រូបថត ភ្នំពេញ ប៉ុស្តិ៍
ភ្នំពេញ: រដ្ឋាករទឹកស្វយ័តភ្នំពេញ (រ.ទ.ស.ភ) ដែលចុះបញ្ជីគ្រប់គ្រងដោយរដ្ឋ និងជាក្រុមហ៊ុនបោះផ្សាយមូលបត្រកម្មសិទ្ធិនៅលើផ្សារមូលបត្រកម្ពុជា (CSX) បានរាយការណ៍ពីការធ្លាក់ចុះយ៉ាងច្រើនកាលពីឆ្នាំ ២០១៩ នៃប្រាក់ចំណូលសរុបប្រាក់ចំណេញប្រតិបត្តិការ និងប្រាក់ចំណេញសុទ្ធធៀបនឹងរយៈពេលដូចគ្នាកាលពីឆ្នាំ ២០១៨។
យោងតាមរបាយការណ៍ហិរញ្ញវត្ថុរបស់ រ.ទ.ស.ភ ដែលបានដាក់ជូនទៅ CSX កាលពីថ្ងៃចន្ទក្នុងឆ្នាំសារពើពន្ធ ២០១៩ ប្រាក់ចំណូលរបស់ រ.ទ.ស.ភ បានធ្លាក់ចុះ ១៨,៣៣ ភាគរយមកនៅត្រឹមជាង ២១៦ លានរៀលធៀបនឹងជាង ២៦៥ លានរៀលកាលពីឆ្នាំ ២០១៨ ខណៈប្រាក់ចំណេញប្រតិបត្តិការបានធ្លាក់ចុះយ៉ាងខ្លាំងជាង ៤៥ ភាគរយមកជិត ៥២ លានរៀលធៀបនឹងជិត ៩៥ លានរៀល និងប្រាក់ចំណេញសុទ្ធបានធ្លាក់ចុះ ៥៤,៧៧ ភាគរយពីចំនួនជិត ៧៤ លានរៀលមកនៅជាង ៣៣ លានរៀល។
ក្រុមហ៊ុនបានឲ្យដឹងក្នុងរបាយការណ៍របស់ខ្លួនថា៖ «មូលហេតុនៃការថយចុះនៃចំណូល ចំណេញប្រតិបត្តិការ និងចំណេញសុទ្ធដោយសារ ១. ការកត់ត្រាលើសនៃចំណូលបង្គរ ២. ការកើនឡើងនៃចំណូលផ្សេងៗ ដោយសារ រ.ទ.ស.ភ បានកត់ត្រាផលចំណេញ ដែលកើតឡើងពីការទូទាត់នៃកាតព្វកិច្ចសោធនិវត្តន៍ចំនួន ៣២,៩ ពាន់លានរៀលនៅក្នុងឆ្នាំ ២០១៨»។
លោក Jong Weon Ha អនុប្រធានក្រុមហ៊ុនផ្សារមូលបត្រកម្ពុជា (CSX) បានឲ្យដឹងថា ការធ្លាក់ចុះប្រាក់ចំណេញសុទ្ធ ៥៤ ភាគរយកាលពីឆ្នាំ ២០១៩ សម្រាប់ រ.ទ.ស.ភ មិនមែនដោយសារតែការធ្លាក់ចុះខ្លាំងនៃការលក់នោះទេ ប៉ុន្តែដោយសារតែការធ្លាក់ចុះប្រាក់ចំណូលផ្សេងទៀត។
លោកថ្លែងថា៖ «តម្លៃភាគហ៊ុនបច្ចុប្បន្នរបស់ រ.ទ.ស.ភ មានតម្លៃទាបរួចទៅហើយ អាស្រ័យហេតុនេះ ខ្ញុំមិនរំពឹងថានឹងមើលឃើញការធ្លាក់ចុះខ្លាំងទៀតទេ ហើយតម្លៃនេះនឹងត្រឡប់ទៅរកការកើនឡើងវិញស្របតាមការអភិវឌ្ឍផ្សារហ៊ុន និងសេដ្ឋកិច្ច»។
លោក Jong Weon Ha លើកឡើងថា ក្រុមវិនិយោគិនជាច្រើនបានយល់ថា រ.ទ.ស.ភ ជាភាគហ៊ុនគួរឲ្យទាក់ទាញខ្លាំងបំផុត ដោយសារតែវាត្រូវបានគ្រប់គ្រងដោយរដ្ឋជាមួយនឹងកំណើនប្រាក់ចំណូលស្ថិរភាពបំផុត។
លោកបន្តថា វិនិយោគិន ថែមទាំងមើលឃើញភាគហ៊ុននេះកាន់តែទាក់ទាញនៅក្នុងវិបត្តិសេដ្ឋកិច្ច ដោយសារទឹកគឺជាតម្រូវការមូលដ្ឋានរបស់ប្រជាជន ហើយការប្រើប្រាស់ទឹករបស់ប្រជាជននឹងមិនធ្លាក់ចុះនោះទេ ទោះបីជាប្រាក់ចំណូលធ្លាក់ចុះក៏ដោយ។ ទោះយ៉ាងណា ប្រាក់ចំណូលបានពី រ.ទ.ស.ភ ភាគច្រើនមកពីការប្រើប្រាស់ពាណិជ្ជកម្ម»។
លោកពន្យល់ រ.ទ.ស.ភ យកថ្លៃទឹកគឺតិចបំផុតចំពោះការប្រើប្រាស់លក្ខណៈគ្រួសារ និងកាន់តែទាបចំពោះអ្នកដែលប្រើប្រាស់ទឹកគិតជាលីត្រក្នុង ១ ខែ។ នេះគឺដោយសារគោលនយោបាយកាត់បន្ថយភាពក្រីក្ររបស់រដ្ឋាភិបាល។
រ.ទ.ស.ភ គឺជាក្រុមហ៊ុនចុះបញ្ជីដំបូងគេលើ CSX ចាប់តាំងពី ២០១២។ ភាគហ៊ុនរបស់ក្រុមហ៊ុនបានបិទការជួញដូរក្នុងតម្លៃ ៥ ៥៦០ រៀលក្នុង ១ ហ៊ុន ជាមួយនឹងទំហំជួញដូរ ៧ ០២៨។ នេះបើតាមទិន្នន័យពី CSX៕ LA
