.jpg)
កំពង់ផែព្រះសីហនុ នាពេលកន្លងមក។ ហេង ជីវ័ន
ភ្នំពេញៈ កំពង់ផែស្វយ័តក្រុងព្រះសីហនុ (PAS) ដែលចុះបញ្ជីនៅផ្សារមូលបត្រកម្ពុជា (CSX) បានរាយការណ៍កំណើនប្រាក់ចំណូលដ៏រឹងមាំជាមួយនឹងកំណើន ១៧,៥ ភាគរយ កាលពីឆ្នាំមុនធៀបនឹងឆ្នាំ ២០១៨។
យោងតាមរបាយការណ៍ប្រចាំឆ្នាំបានមកពីក្រសួងសាធារណការ និងដឹកជញ្ជូនដែលបានចេញផ្សាយកាលពីម្សិលមិញ ប្រាក់ចំណូលសរុបរបស់កំពង់ផែនេះបានកើនឡើងដល់ប្រហែល ៨០ លានដុល្លារសម្រាប់ឆ្នាំ ២០១៩ កើនឡើង ១៧,៥ ភាគរយធៀបនឹងប្រហែល ៦៨ លានដុល្លារកាលពីឆ្នាំ ២០១៨។
លោក Jong Weon Ha អ្នកយុទ្ធសាស្ដ្រទីផ្សារ និងជាប្រធានប្រតិបត្តិការ CSX បានឲ្យដឹងថា កំណើនរបស់ PAS នឹងផ្ដល់ផលវិជ្ជមានលើការជួញដូរមូលបត្ររបស់កំពង់ផែនេះហើយនឹងទាក់ទាញក្រុមវិនិយោគិនកាន់តែច្រើនថែមទៀត។
លោកបន្តថា៖ «រាល់កំណើនវិជ្ជមានរបស់ក្រុមហ៊ុនបានជះឥទ្ធិពលទៅលើទីផ្សារភាគហ៊ុន។ ក្រុមវិនិយោគិនពឹងផ្អែកលើព័ត៌មានដើម្បីធ្វើការសម្រេចចិត្តថា តើចំនួនប៉ុន្មានដែលពួកគេមានបំណងចំណាយ ឬការលក់ភាគហ៊ុន។ ឧទាហរណ៍កំណើនប្រាក់ចំណូលរបស់ PAS នឹងផ្ដល់ចក្ខុវិស័យអំណោយផលសម្រាប់ក្រុមហ៊ុននេះ អាស្រ័យហេតុនេះអាចជំរុញតម្លៃកើនឡើងតាមរយៈការបង្កើនតម្រូវការភាគហ៊ុន»។
លោកបន្តថា មានកម្លាំងជាច្រើនដែលទាក់ទាញវិនិយោគិនកាន់តែច្រើនវិនិយោគលើកំពង់ផែ ដូចជា PAS ជាសហគ្រាសរដ្ឋដែលប្រតិបត្តិការកំពង់ផែសមុទ្រទឹកជ្រៅតែមួយគត់នៅក្នុងប្រទេស កម្ពុជា ដោយបង្ហាញភាពល្អប្រសើរហិរញ្ញវត្ថុដ៏រឹងមាំជាមួយនឹងប្រាក់ចំណូល និងប្រាក់ចំណេញសុទ្ធកើនឡើងធៀបនឹងរយៈពេលដូចគ្នាកាលពីឆ្នាំមុន។
លោកបានបន្ថែមថា៖ «ដោយមិនរាប់បញ្ចូលភាគហ៊ុនចំនួនច្រើនដែលជួញដូរតាមរយៈវិធីសាស្ដ្រជួញដូរតាមការចរចា (NTM) កាលពីខែឧសភា តម្លៃជួញដូរជាមធ្យមរបស់ PAS នៅតែត្រូវចាត់ទុកថាខ្ពស់ធៀបនឹងក្រុមហ៊ុនចុះបញ្ជីផ្សេងទៀតកាលពីឆ្នាំ ២០១៩»។
តាមរបាយការណ៍ចំនួនកុងតឺន័រដែលផ្ទុកនៅកំពង់ផែ SAP បានកើនឡើង ១៧ ភាគរយ ដែលកើនឡើងដល់សរុប ៦៣៣ ០៩៩ TEU ត្រឹមចុងឆ្នាំ ២០១៩ ធៀបនឹង ៥៤១ ២២៨ TEU កាលពីឆ្នាំ ២០១៨៕LA
