ភ្នំពេញៈ NagaWorld ដែលទទួលបានសិទ្ធិវិនិយោគលើកាស៊ីណូផ្តាច់មុខនៅទីក្រុងភ្នំពេញបង្ហាញប្រាក់ចំណូលដុលពីការលេងល្បែង (GGR) របស់ខ្លួនចំនួន ២០ ភាគរយ រហូតដល់ជាង ១,២៩ ពាន់លានដុល្លារក្នុងរយៈពេល ៩ ខែ នៃឆ្នាំ ២០១៩ នេះ។ នេះបើតាមគេហទំព័រ GGRAsia ដែលយោងឯកសាររបស់ក្រុមហ៊ុនផ្ញើទៅផ្សារហ៊ុនហុងកុងកាលពីថ្ងៃពុធសប្តាហ៍មុន។
យោងតាមរបាយការណ៍ក្រុមហ៊ុន NagaCorp បានបន្ថែមថាខ្លួនបានកត់ត្រាប្រាក់ចំណូលពីលេងល្បែងសុទ្ធចំនួន ៦១៦,៣ លានដុល្លារ ក្នុងរយៈពេល ៩ ខែ គិតត្រឹមថ្ងៃទី ៣០ ខែ កញ្ញា ដោយកើនឡើង ២៨,៥ ភាគរយ ធៀបនឹងរយៈពេលដូចគ្នាកាលពីឆ្នាំមុន។
របាយការណ៍ឲ្យដឹងថា៖ «លទ្ធផលហិរញ្ញវត្ថុក្នុងរយៈពេល ៩ ខែគិតត្រឹមថ្ងៃទី ៣០ ខែ កញ្ញា ឆ្នាំ ២០១៩ បង្ហាញថាក្រុមហ៊ុននេះបន្តដំណើរកំណើនរបស់ខ្លួន»។ ក្រុមហ៊ុនបន្តថា៖ «កំណើនចំនួនអាជីវកម្មថ្នាក់វីអាយភីត្រូវបានជំរុញដោយលំហូរចូលយ៉ាងខ្លាំងជាបន្តនៃការមកដល់របស់ក្រុមពាណិជ្ជករ ភ្ញៀវទេសចរ ជាពិសេសនៅ NagaWorld ២ ដែលមានអតិថិជនលំដាប់ខ្ពស់ច្រើន»។
ក្រុមហ៊ុនបានឲ្យដឹងថា ស្ថិរភាពនយោបាយនៅប្រទេសកម្ពុជា ការកែលម្អបរិយាកាសប្រតិបត្តិការកំណើនអាជីវកម្មនៅ Naga ២ កំណើនភ្ញៀវទេសចរ ការពង្រីកអាជីវកម្មវីអាយភីស្ថិតក្នុងចំណោមហេតុផលសម្រាប់លទ្ធផលកំណើនក្នុងរយៈពេល ៩ ខែដំបូងឆ្នាំ ២០១៩ នេះ។
ភ្ញៀវទេសចរ និងអ្នកលេងល្បែងមកចិនដីគោកត្រូវបានមើលឃើញថា ជាអតិថិជនមានប្រាក់ច្រើនបំផុតរបស់តំបន់អាស៊ីប៉ាស៊ីហ្វិកដែលបានមកកម្ពុជា។
គម្រោង Naga 3 ដែលមានទីតាំងស្ថិតនៅអតីតតំបន់អគារប៊ុលឌិង បានចាប់ផ្តើមធ្វើតេស្តដី និងជ្រើសរើសក្រុមហ៊ុនសាងសង់បុកគ្រឹះក្នុងតំបន់ ដែលមានលក្ខណសម្បត្តិគ្រប់គ្រាន់ដែលនឹងត្រូវបានតែងតាំងក្នុងពេលឆាប់ៗ។ នេះបើយោងតាមក្រុមហ៊ុន។ ក្រុមហ៊ុនបានឲ្យដឹងថា៖ «រយៈពេលនៃការបុកគ្រឹះត្រូវបានរំពឹងថានឹងមានរយៈពេលចន្លោះពី ១៨ ខែ ទៅ ២៤ ខែ»៕