.jpg)
ផ្ទាំងផ្សាយពាណិជ្ជកម្មរបស់ក្រុមហ៊ុន Goolge នៅប្រទេសឥណ្ឌា។ រូបថត AFP
ក្រុងសានហ្រ្វានស៊ីស្កូៈ ក្រុមហ៊ុន Alphabet ដែលជាក្រុមហ៊ុនមេរបស់ក្រុមហ៊ុន Google កាលពីថ្ងៃចន្ទបានរាយការណ៍ពីកំណើនប្រាក់ចំណេញខ្ពស់ប្រចាំត្រីមាស ដែលត្រូវបានជំរុញដោយកំណើនខ្ពស់ផ្នែកផ្សព្វផ្សាយពាណិជ្ជកម្មឌីជីថល។
ក្រុមហ៊ុន Alphabet បានឲ្យដឹងក្នុងរបាយការណ៍ស្តីពីប្រាក់ចំណេញ ដែលមានកម្រិតខ្ពស់ជាងការព្យាករខ្លាំងថា ប្រាក់ចំណេញនៅត្រីមាសទីមួយឆ្នាំ ២០១៨ បានកើនឡើងជាង ៧០ ភាគរយធៀបនឹងរយៈពេលដូចគ្នាកាលពីឆ្នាំមុន ដល់ ៩,៤ ពាន់លានដុល្លារ។
ប្រាក់ចំណូលនៅក្រុមហ៊ុនអ៊ីនធឺណិត ដែលមានមូលដ្ឋាននៅរដ្ឋកាលីហ្វ័រញ៉ាក្នុងអំឡុងត្រីមាសទីមួយក្នុងឆ្នាំនេះ មានចំនួន ៣១,១ ពាន់លានដុល្លារ កើនឡើង ២៦ ភាគរយធៀបនឹងរយៈពេលដូចគ្នាកាលពីឆ្នាំមុន។
ភាគហ៊ុនរបស់ក្រុមហ៊ុន Alphabet បានកើនឡើងបន្តិចនៅពេលជួញដូរក្រៅម៉ោង បន្ទាប់ពីសេចក្តីប្រកាសពីរបាយការណ៍ប្រាក់ចំណេញនេះ។
ប្រាក់ចំណេញនៅត្រីមាសទីមួយ រួមទាំងប្រាក់ចំណូលម្តងម្កាលដែលមានចំនួន ៣ ពាន់លានដុល្លារពីការវិនិយោគលើភាគហ៊ុនរបស់ក្រុមហ៊ុននេះ ដែលត្រូវបានជឿថាភាគច្រើនទទួលបានពីកំណើនតម្លៃភាគហ៊ុនរបស់ខ្លួនក្នុងក្នុងក្រុមហ៊ុន Uber ដែលផ្តល់សេវាកម្មហៅរថយន្តតាក់ស៊ីជិះតាមទូរស័ព្ទទំនើប។
លោក Ruth Porat ប្រធានផ្នែកហិរញ្ញវត្ថុនៅក្រុមហ៊ុន Alphabet បានឲ្យដឹងក្នុងសេចក្តីរាយការណ៍ប្រាក់ចំណេញមួយថា៖ «យើងមានកាលានុវត្តភាពដ៏អស្ចារ្យនាពេលខាងមុខ ហើយកំណើនប្រាក់ចំណេញខ្ពស់របស់យើង នឹងផ្តល់លទ្ធភាពឲ្យយើងវិនិយោគប្រកបដោយទំនុកចិត្ត»។
ក្រុមហ៊ុន Alphabet គឺជាក្រុមហ៊ុនដ៏ធំដំបូងគេនៅតំបន់ Silicon Valley ដែលរាយការណ៍ពីប្រាក់ចំណេញនៅត្រីមាសទីមួយ ហើយសេចក្តីរាយការណ៍នេះ ធ្វើឡើង នៅពេលមានក្តីបារម្ភកាន់តែខ្លាំងពីរបៀបដែលទិន្នន័យរបស់អ្នកប្រើប្រាស់ឯកជន ត្រូវបានការពារក្នុងគ្រាដែលមានការចូលលួចទិន្នន័យរបស់អ្នកប្រើប្រាស់បណ្តាញសង្គម Facebook ចំនួនរាប់លាននាក់។
សេចក្តីរាយការណ៍កាលពីថ្ងៃចន្ទបានបង្ហាញថា ផ្នែកក្រុមហ៊ុន Google នៅតែមានទំហំច្រើននៃប្រាក់ចំណូល ដោយមានចំនួន ៣០,៩៩ ពាន់លានដុល្លារ ពោលគឺកើនឡើងធៀបនឹងប្រាក់ចំណូល ២៤,៦ ពាន់លានដុល្លារកាលពីឆ្នាំមុន។
ប្រាក់ចំណូលពី «ប្រភពផ្សេងទៀត» របស់ក្រុមហ៊ុននេះ ដែលរួមមាន ផ្នែកផលិតរថយន្តដែលអាចបើកបរដោយខ្លួនឯងបានគឺក្រុមហុន Waymo និងក្រុមហ៊ុនវិទ្យាសាស្រ្តជីវិត Verily មានទំហំស្មើនឹង ១៥០ លានដុល្លារធៀបនឹងតម្លៃ ១៣២ លានដុល្លារ៕ AFP/BP
