ក្រុងហ្ស៊ូរិចៈ ធនាគារស្វ៊ីស Credit Suisse កាលពីថ្ងៃពុធបានប្រកាសពីកំណើនប្រាក់ចំណេញខ្ពស់នៅត្រីមាសទីមួយដោយសារកំណែទម្រង់ដ៏ធំមួយដែលកំពុងអនុវត្តគិតចាប់ពីឆ្នាំ ២០១៥ មកនោះបាននាំមកនូវលទ្ធផលប្រាក់ចំណេញខ្ពស់។
ធនាគារធំជាងគេទី ២ របស់ប្រទេសស្វ៊ីស បន្ទាប់ពីធនាគារ UBS មួយនេះបានចាប់ផ្តើមយកចិត្តទុកដាក់ឡើងវិញលើសកម្មភាពរបស់ខ្លួនលើការគ្រប់គ្រងទ្រព្យសម្បត្តិជុំវិញការផ្តល់សេវាធនាគារដល់ក្រុមឈ្មួញ។
ធនាគារ Credit Suisse បានឲ្យដឹងក្នុងសេចក្តីប្រកាសមួយថា កំណែទម្រង់ដែលបានដាក់ដំណើរការ បន្ទាប់ពីធុរជនជនជាតិបារាំងលោក Tidjane Thiam បានឡើងកាន់តំណែងជានាយកប្រតិបត្តិកាលពីឆ្នាំ ២០១៥ មកនោះក៏មានពាក់ព័ន្ធនឹង «ការយកចិត្តទុកដាក់ខ្លាំងលើប្រសិទ្ធភាព» ផងដែរ។
សេចក្តីប្រកាសដដែលនេះបានបន្តឲ្យដឹងថា៖ «យើងបានផ្លាស់ប្តូរធនាគារ Credit Suisse ក្នុងរយៈពេលតិចជាង ៣ ឆ្នាំ»។
នៅត្រីមាសទីមួយក្នុងឆ្នាំ ២០១៨ នេះធនាគារនេះបានប្រកាសពីកំណើនប្រាក់ចំណេញ ១៦ ភាគរយធៀបនឹងរយៈពេលដូចគ្នាកាលពីឆ្នាំមុនដល់ ៦៩៤ លានស្វ៊ីសហ្វ្រង់ (៧០៦ លានដុល្លារ ឬ ៥៧៩ លានអឺរ៉ូ)។
សេចក្តីប្រកាសដដែលនេះបានបន្តឲ្យដឹងថា៖ «ការចំណាយប្រចាំត្រីមាស ត្រូវបានកាត់បន្ថយមកនៅត្រឹមកម្រិតទាបបំផុត» ក្នុងរយៈពេល ៥ ឆ្នាំ។
សេចក្តីប្រកាសនេះបានបន្តឲ្យដឹងថា ៨០ ភាគរយនៃលទ្ធភាពទទួលបានប្រាក់ចំណេញស្នូលរបស់ធនាគារនេះបច្ចុប្បន្នត្រូវបានបង្កើតឡើងតាមរយៈការគ្រប់គ្រងទ្រព្យសម្បត្តិ និងសកម្មភាពធនាគារវិនិយោគដែលបានកើនឡើង ៤១ ភាគរយប្រៀបធៀបនឹងឆ្នាំ ២០១៥។
លោក Thiam បានឲ្យដឹងក្នុងសេចក្តីប្រកាសដដែលនេះថា៖ «យើងមានផែនការធ្វើឲ្យឆ្នាំ ២០១៨ ក្លាយជាឆ្នាំនៃការអបអរសាទរលទ្ធផលការងាររបស់យើង»៕ BP