.jpg)
កម្មវិធីទូទាត់ WeChat របស់ Tencent នៅតូបលក់សាច់ជ្រូក។ AFP
ក្រុងស៊ាងហៃៈ ក្រុមហ៊ុនអ៊ីនធឺណិតឈានមុខគេ Tencent របស់ប្រទេសចិន បានឲ្យដឹងកាលពីថ្ងៃពុធថា ប្រាក់ចំណេញសុទ្ធរបស់ខ្លួនបានកើនឡើង ៣៥ ភាគរយនៅត្រីមាសទី ២ ខណៈដែលក្រុមហ៊ុនបានបន្តគេចចេញពីការបង្ក្រាបរបស់ទីក្រុងប៉េកាំងលើការលេងហ្គេមអនឡាញ និងបង្កើនកំណើនហ្គេមលើទូរស័ព្ទចល័ត។
ក្រុមហ៊ុន Tencent ដែលមានមូលដ្ឋាននៅទីក្រុងហ្សិន-ចិន និងជាប្រតិបត្តិការកម្មវិធីផ្ញើសារ និងទូទាត់ចំណាយចល័ត WeChat បានឲ្យដឹងថា ប្រាក់ចំណេញសុទ្ធមាន ២៤,១ ពាន់លានយន់ (៣,៥ ពាន់លានដុល្លារ) នៅក្នុងរយៈពេល ៣ ខែដែលបញ្ចប់ត្រឹមថ្ងៃទី ៣០ ខែមិថុនា។ បរិមាណនេះលើសពីការប៉ាន់ប្រមាណជាមធ្យមរបស់ក្រុមអ្នកវិភាគដែលធ្វើឡើងដោយទីភ្នាក់ងារព័ត៌មាន Bloomberg ដែលថាមានចំនួន ២១,១ ពាន់លានយន់។
ប្រាក់ចំណូលសរុបបានកើនឡើង ២១ ភាគរយក្នុងចំនួន ៨៨,៨ ពាន់លានយន់ភាគច្រើនត្រូវបានជំរុញដោយកំណើនហ្គេមទូរស័ព្ទចល័ត សេវាទូទាត់ពាណិជ្ជកម្ម និងអាជីវកម្មមាតិកាឌីជីថល។
ប្រាក់ចំណូលពីហេ្គមទូរស័ព្ទស្មាតហ្វូនរបស់ក្រុមហ៊ុន Tencent បានកើនឡើង ២៦ ភាគរយក្នុងរយៈពេល ៣ ខែនេះ។
ប៉ុន្តែក្រុមហ៊ុន Tencent ត្រូវបានទទួលរងផលប៉ះពាល់ដោយការបង្ក្រាបរបស់រដ្ឋាភិបាលរបស់ប្រទេសចិនលើការលេងហ្គេមដែលបានបើកដំណើរការកាលពីឆ្នាំមុន និងបានឈានទៅរកការបង្កកការអនុម័តអាជ្ញាប័ណ្ណអស់រយៈពេលជាច្រើនខែ។
ក្រុមហ៊ុនបច្ចេកវិទ្យាឈានមុខគេមួយនេះបានរក្សាកំណើនប្រាក់ចំណូលពីហ្គេម « Honour of Kings» ដែលជាហេ្គមដ៏ពេញនិយម ហើយបានចាប់ផ្ដើមគិតប្រាក់ពីអ្នកលេងហ្គេមថ្មីដែលចំណងជើងថ្មី «Peacekeeper Elite» ហ្គេម «Player-Unknown''s Battlegrounds» ដែលមានអ្នកលេងសកម្មប្រចាំថ្ងៃជាង ៥០ លាននាក់ចាប់តាំងពីដាក់ដំណើរការកាលពីខែឧសភា។
ក្រុមហ៊ុន Tencent បានឲ្យដឹងថា ខ្លួនបានដកចេញហ្គេមចាស់ៗ ហើយហ្គេមថ្មីដែលបានទទួលការអនុម័តពីរដ្ឋាភិបាលត្រូវបានអភិវឌ្ឍរួមគ្នាជាមួយកម្លាំងទ័ពអាកាសរបស់ប្រទេសចិន។
ទោះបីជាក្រុមហ៊ុនកំពុងបង្ហាញសញ្ញានៃការស្ទុះងើបឡើងវិញក៏ដោយ ក៏ការបង្ក្រាបការលេងហ្គេមបានកាត់បន្ថយតម្លៃផ្សារហ៊ុនរបស់ក្រុមហ៊ុន Tencent ប្រហែល ២៥០ ពាន់លានដុល្លារកាលពីចុងឆ្នាំមុន និងបានធ្វើឲ្យប៉ះពាល់ដល់ប្រាក់ចំណេញដល់ចុងឆ្នាំ ២០១៨។
លោក David Dai អ្នកវិភាគនៅទីក្រុងហុងកុងប្រចាំក្រុមហ៊ុន Bernstein បានប្រាប់ទីភ្នាក់ងារព័ត៌មាន Bloomberg News ថា៖ «យើងរំពឹងថាប្រាក់ចំណូលលេងហ្គេមនឹងកើនឡើងជាថ្មី ចាប់ផ្ដើមពីត្រីមាសទី ២ ទៅ»៕ LA
