.jpg)
ប្រាក់ចំណេញរបស់ផែស្វយ័តភ្នំពេញ ធ្លាក់ចុះ ១៤ ភាគរយក្នុងឆ្នាំ ២០២០ ដោយសារតែការរីករាលដាលជំងឺកូវីដ ១៩។ ហេង ជីវ័ន
ភ្នំពេញ៖ កំពង់ផែស្វយ័តភ្នំពេញ (PPAP) ទទួលបានប្រាក់ចំណេញចំនួន ៩ ៨៦០ ៨៧៥ ដុល្លារ នៅឆ្នាំ ២០២០ ថយចុះ ១៤ ភាគរយ ធៀបនឹង ២០១៩ ដោយសារតែការរីករាលដាលជំងឺកូវីដ ១៩ ប៉ះពាល់ដល់សេដ្ឋកិច្ចសកល។ បើយោងតាមមន្រ្តីជាន់ខ្ពស់របស់កំពង់ផែ។
លោក ហ៊ី បាវី អគ្គនាយកកំពង់ផែស្វយ័តភ្នំពេញ ដែលជាក្រុមហ៊ុនរដ្ឋចុះបញ្ជីបោះផ្សាយមូលបត្រកម្ពុជាបានលើកឡើងក្នុងមហាសន្និបាតភាគហ៊ុនិកលើកទី៦ កាលពីថ្ងៃទី ៥ ឧសភា ដែលរៀបចំតាមអនឡាញ។
លោក ហ៊ី បាវី ឲ្យដឹងទៀតថា បរិមាណកុងតឺន័រមានចំនួន ២៩០ ៨៥៧ TEUs កើនឡើង ៣,៤៩ ភាគរយ ធៀបនឹងឆ្នាំ ២០១៩។
លោកថ្លែងទៀតថា៖ «ក្នុងឆ្នាំ ២០២០ កន្លងទៅ គឺជាឆ្នាំរងផលប៉ះពាល់ពីវិបត្តិនៃជំងឺកូវដី ១៩ តែអាជីវកម្ម និងប្រតិបត្តិការរបស់យើងនៅតែស្ថិតក្នុងស្ថានភាពមួយល្អប្រសើរ និងទទួលបាននូវប្រាក់ចំណេញតាមរយៈការដាក់ចេញនូវវិធានការឆ្លើយតបភ្លាមៗ ទាន់ពេលវេលាដូចជា ការកែសម្រួលផែនការឆ្នាំ ២០២០ អនុវត្តគម្រោងណាដែលចាំបាច់ បម្រើដល់ការងារអាជីវកម្ម និងប្រតិបត្តិការ និងការកាត់បន្ថយចំណាយមិនចាំបាច់ជាដើម»។
លោកបន្ថែមទៀតថា ទន្ទឹមនឹងលទ្ធផលដែលសម្រេចបានខាងលើនេះ កំពង់ផែស្វយ័តភ្នំពេញក៏មានផែនការការងារជាអាទិភាពបន្តទៀត សម្រាប់អនុវត្តឆ្នាំ ២០២១ នេះ រួមមានការងារពង្រីកចំណតផែកុងតឺន័រ LM១៧ ជំហានទី៣ ដើម្បីពង្រីកសមត្ថភាពផ្ទុកកុងតឺន័រ ឱ្យបានដល់ចំនួន ៥០០ ០០០ TEU ក្នុង ១ ឆ្នាំ។
លោកបន្តទៀតថា លើសពីនេះ កំពង់ផែស្វយ័តភ្នំពេញនឹងបង្កើតចំណតផែរណបនៅទីតាំងគីឡូម៉ែត្រលេខ ៦ ចំណតផែទន្លេបិទ UM២ ចំណតផែកោះរកា និងការធ្វើទំនើបកម្មចំណតផែពហុបំណង TS៣ ដើម្បីឱ្យក្លាយទៅជាចំណតផែទេសចរណ៍អន្តរជាតិ TS៣ ព្រមទាំងការងារបំពាក់ឧបករណ៍ និងប្រព័ន្ធព័ត៌មានវិទ្យាក៏ដូចជាការកែសម្រួលតម្លៃអនុគ្រោះលើសេវាកម្មមួយចំនួនទៀត ដើម្បីទាក់ទាញអតិថិជនឱ្យមកប្រើសេវាកំពង់ផែនេះច្រើនថែមទៀត៕
