ភ្នំពេញៈ ប្រាក់ចំណេញក្នុងការិយបរិច្ឆេទ (ចំណេញបន្ទាប់ពីបង់ពន្ធរួច) របស់កំពង់ផែស្វយ័តភ្នំពេញ (PPAP) ដែលជាក្រុមហ៊ុនចុះបញ្ជីក្នុងផ្សារហ៊ុនកម្ពុជា (CSX) រយៈពេល ៩ ខែ ឆ្នាំ ២០១៩ បានកើនឡើងប្រមាណជិត ៥០ ភាគរយ បើធៀបនឹងរយៈពេលដូចគ្នាកាលពីឆ្នាំ ២០១៨។
របាយការណ៍ហិរញ្ញវត្ថុដែលត្រូវបានត្រួតពិនិត្យឡើងវិញ ដោយសវនករឯករាជ្យ BDO បានឲ្យដឹងថា សម្រាប់រយៈពេល ៩ ខែ ឆ្នាំ ២០១៩ កំពង់ផែស្វយ័តភ្នំពេញទទួលបានប្រាក់ចំណេញក្នុងការិយបរិច្ឆេទចំនួន ៨,៩៧ លានដុល្លារកើន ៤៦,៩ ភាគរយ បើធៀបរយៈពេលដូចគ្នាកាលពីឆ្នាំ ២០១៨ ដែលមាន ៥,៩៨ លានដុល្លារ។
ដោយឡែកសម្រាប់ត្រីមាសទី ៣ កន្លងមកកំពង់ផែភ្នំពេញទទួលបានប្រាក់ចំណេញក្នុងការិយបរិច្ឆេទចំនួន ៣,៤៥ លានដុល្លារធ្លាក់ចុះ ៩,១ ភាគរយ បើធៀបនឹងត្រីមាសទី ៣ ឆ្នាំ ២០១៨។ របាយការណ៍បានឲ្យដឹងដែរថា ក្នុងត្រីមាសទី ៣ PPAP ទទួលបានកុងតឺន័រឆ្លងកាត់ចំនួន ៩២ ៤៩៤ TEU កើន ៤៤,៤៣ ភាគរយ បើធៀបនឹងត្រីមាសទី ៣ ឆ្នាំ ២០១៨។
អ្នកស្រី គឹម សុផានីតា ប្រធាននាយកដ្ឋានប្រតិបត្តិការទីផ្សារនៃក្រុមហ៊ុនមូលបត្រកម្ពុជា (CSX) បានប្រាប់ភ្នំពេញប៉ុស្តិ៍កាលពីល្ងាចម្សិលមិញថា ការកើនឡើងនៃសកម្មភាពប្រតិបត្តិការរបស់កំពង់ផែស្វយ័តភ្នំពេញ និងទំនុកចិត្តរបស់វិនិយោគិនបានធ្វើឲ្យប្រាក់ចំណូល និងតម្លៃភាគហ៊ុនរបស់ PPAP កើនឡើងជាលំដាប់។ អ្នកស្រីថ្លែងថា៖ «លទ្ធផលនៃកំណើនប្រាក់ចំណេញសុទ្ធរហូតដល់ជិត ៥០ ភាគរយនេះ គឺបង្ហាញពីកិច្ចខិតខំប្រឹងប្រែង និងប្រសិទ្ធភាពរបស់ក្រុមហ៊ុន PPAP»។
បើតាមអ្នកស្រី សុផានីតា តម្លៃភាគហ៊ុនរបស់ PPAP កាលពីចុងត្រីមាសទី ៣ ឆ្នាំ ២០១៨ មានតម្លៃត្រឹមតែ ៦ ៤០០ រៀលតែប៉ុណ្ណោះ ខណៈដែលនៅចុងត្រីមាសទី ៣ ឆ្នាំ ២០១៩ បានកើនដល់ ១២ ៧៨០ រៀល៕LA