.jpg)
ក្រុងឡាអេៈ ក្រុមហ៊ុនផលិតគ្រឿងអេឡិចត្រូនិក Philips របស់ប្រទេសហូឡង់ កាលពីថ្ងៃចន្ទបានប្រកាសពីការថមថយប្រាក់ចំណេញ ២៧ ភាគរយនៅត្រីមាសទី ១ មួយផ្នែកបានរងផលប៉ះពាល់ដោយសារការចំណាយលើការរៀបចំរចនាសម្ព័ន្ធឡើងវិញ និងការទិញយកក្រុមហ៊ុនមួយចំនួន ខណៈក្រុមហ៊ុននេះអភិវឌ្ឍកញ្ចប់វិនិយោគរបស់ខ្លួន។
ក្រុមហ៊ុន Philips បានឲ្យដឹងក្នុងសេចក្តីប្រកាសមួយថា ប្រាក់ចំណេញសុទ្ធបានធ្លាក់ចុះនៅត្រីមាសទី ១ មកនៅត្រឹម ៩៤ លានអឺរ៉ូ (១១៥ លានដុល្លារ) ធៀបនឹងចំនួន ១២៨ លានអឺរ៉ូក្នុងរយៈពេលដូចគ្នាក្នុងឆ្នាំ ២០១៧។
ដោយមានកេរ្តិ៍ឈ្មោះល្បីល្បាញខាងផលិតអំពូល ពងមាន់ ឧបករណ៍អេឡិចត្រូនិក និងឈុតទូរទស្សន៍ ក្រុមហ៊ុនដែលមានមូលដ្ឋាននៅទីក្រុងអាំស្ទែរដាំមួយនេះបានដកខ្លួនចេញពីសកម្មភាពទាំងនេះនៅពេលមានការប្រកួតប្រជែងខ្លាំងពីតំបន់អាស៊ី។
បច្ចុប្បន្នក្រុមហ៊ុននេះយកចិត្តទុកដាក់កាន់តែខ្លាំងលើបច្ចេកវិទ្យាវេជ្ជសាស្ត្រទំនើប និងវិស័យសុខាភិបាលដូចជាការថតកាំរស្មីអ៊ិចដោយកុំព្យូទ័រ និងសម្ភារប្រើប្រាស់ក្នុងផ្ទះ។
ការលក់នៅត្រីមាសទី ១ មានចំនួន ៣,៩ ពាន់លានអឺរ៉ូធ្លាក់ចុះ ២ ភាគរយធៀបនឹងប្រាក់ចំណេញចំនួន ៤,០៣ លានអឺរ៉ូក្នុងឆ្នាំ ២០១៧។
តែក្រុមហ៊ុននេះបានបញ្ជាក់ថាការធ្លាក់ចុះប្រាក់ចំណេញនេះត្រូវបានចាត់ទុកថាជាបញ្ហាដែលបណ្តាលមកពីការប្រែប្រួលតម្លៃរូបិយប័ណ្ណ និងការធ្លាក់ចុះផ្នែកផលិតអំពូលពងមាន់ Philips Lighting ។
លោក Frans van Houten នាយកប្រតិបត្តិក្រុមហ៊ុន Philips បានឲ្យដឹងថា៖ «បើទោះជាមានកិច្ចការជាច្រើនដែលត្រូវធ្វើក៏ដោយ ក៏ឆ្នាំ ២០១៨ នេះបានចាប់ផ្តើមយ៉ាងល្អ»៕ BP
