ក្រុងសេអ៊ូលៈ ក្រុមហ៊ុនផលិតរថយន្តធំជាងគេរបស់កូរ៉េខាងត្បូង Hyundai Motor បានមើលឃើញកំណើនប្រាក់ចំណេញសុទ្ធជិត ២៥ ភាគរយ ក្នុងរយៈពេលពីខែមេសាដល់ខែមិថុនា ដោយសារការលក់រថយន្តប្រភេទ SUV និងការធ្លាក់ថ្លៃប្រាក់វ៉ុន។
ក្រុមហ៊ុន Hyundai បានឲ្យដឹងនៅក្នុងសេចក្តីថ្លែងការណ៍មួយថា ប្រាក់ចំណេញសុទ្ធក្នុងអំឡុងពេលនេះបានកើនឡើង ២៣,៣ ភាគរយ ធៀបនឹងរយៈពេលដូចគ្នាកាលពីឆ្នាំមុន ដល់ ៩៩៩ ពាន់លានវ៉ុន (៨៤៧ លានដុល្លារ) ដែលរក្សាបាននូវនិរន្តរភាពកំណើនប្រាក់ចំណេញរបស់ខ្លួនពីត្រីមាសទី១ ក្នុងឆ្នាំនេះ។
តួលេខនៅត្រីមាសទី១ បានបង្ហាញពីការស្ទុះងើបឡើងវិញនៃប្រាក់ចំណេញសម្រាប់ក្រុមហ៊ុន Hyundai បន្ទាប់ពីទទួលរងការខាតបង់ជាលើកដំបូងក្នុងរយៈពេល ៨ ឆ្នាំ។
ក្រុមហ៊ុនផលិតរថយន្តនេះបានឲ្យដឹងថា កំណើនប្រាក់ចំណេញសុទ្ធដែលចេញផ្សាយចុងក្រោយបំផុតនេះ «ត្រូវបានជំរុញដោយភាពប្រសើរឡើងនៃផលិតផលចម្រុះនៃរថយន្តប្រភេទ SUV ថ្មីៗ» និងបានកើតមានឡើង បើទោះបីជា «កំណើនសេដ្ឋកិច្ចពិភពលោកថយចុះ» ដែលត្រូវបានជំរុញដោយជម្លោះពាណិជ្ជកម្មរវាងចិន និងអាមេរិកក៏ដោយ។
ក្រុមហ៊ុន Hyundai បានបន្ថែមថា «ផលប៉ះពាល់រូបិយប័ណ្ណ» ដែលបណ្តាលមកពីការធ្លាក់ចុះប្រាក់វ៉ុនរបស់កូរ៉េខាងត្បូង ក៏បានចូលរួមចំណែកដល់ការកើនឡើងប្រាក់ចំណេញប្រចាំត្រីមាសនេះផងដែរ។
ប្រាក់ចំណេញប្រតិបត្តិការរបស់ក្រុមហ៊ុនផលិតរថយន្តដ៏ធំមួយបានកើនឡើង ៣០ ភាគរយ នៅត្រីមាសទី២ ឆ្នាំនេះធៀបនឹងរយៈពេលដូចគ្នា ដល់ ១,២៤ ពាន់ពាន់លានវ៉ុន ខណៈដែលប្រាក់ចំណូលបានកើនឡើង ៩,១ ភាគរយ។
ភាគហ៊ុនរបស់ក្រុមហ៊ុន Hyundai បានធ្លាក់ចុះ ១,១ ភាគរយ នៅពេលបិទការជួញដូរពីម្សិលមិញ៕ AFP/KC