.jpg)
យន្តហោះរបស់ក្រុមហ៊ុន Qantas Airways ត្រៀមហោះចេញពីព្រលានស៊ីដនី។ AFP
ក្រុងស៊ីដនីៈ ក្រុមហ៊ុនអាកាសចរណ៍ Qantas Airways កាលពីថ្ងៃព្រហស្បតិ៍បានចេញផ្សាយការធ្លាក់ចុះប្រាក់ចំណេញសុទ្ធប្រចាំឆ្នាំ ៦,៥ ភាគរយ ដោយសារការធ្លាក់ចុះប្រាក់ចំណេញក្នុងគ្រាដែលប្រេងឆៅមានតម្លៃកាន់តែខ្ពស់ និងការធ្លាក់ថ្លៃប្រាក់ដុល្លារអូស្ត្រាលីកាន់តែខ្លាំង។
បើទោះជាទទួលបានប្រាក់ចំណូលខ្ពស់ក្តី ក៏ក្រុមហ៊ុនអាកាសចរណ៍របស់ប្រទេសអូស្ត្រាលីមួយនេះបានឲ្យដឹងថា ប្រាក់ចំណេញក្រោយបង់ពន្ធរបស់ខ្លួនបានធ្លាក់ចុះមកនៅត្រឹមចំនួន ៨៩១ លានដុល្លារអូស្ត្រាលី (៦០៤ ដុល្លារអាមេរិក) ខណៈកាលពីឆ្នាំមុនមានចំនួន ៩៥៣ លានដុល្លារអូស្ត្រាលី។
ក្រុមហ៊ុនដែលមានអាយុ ៩៩ ឆ្នាំនេះបានរងគ្រោះដោយសារការកើនឡើងការចំណាយលើប្រេងឥន្ធនៈចំនួន ៦១៤ លានដុល្លារអូស្ត្រាលី និងខាតបង់ពីផលប៉ះពាល់អត្រាប្តូរប្រាក់ចំនួន ១៥៤ លានដុល្លារអូស្ត្រាលី។
ប៉ុន្តែលោក Alan Joyce អគ្គនាយករបស់ក្រុមហ៊ុន Qantas មានភាពសុទិដ្ឋិនិយមចំពោះលទ្ធផលនេះដែលបានកើតមានឡើងក្នុងគ្រាដែលមានប្រាក់ចំណេញខ្ពស់កាលពីឆ្នាំមុន។
លោកបានថ្លែងបញ្ជាក់ថា៖ «បើទោះជាមានបញ្ហានានាដូចជាការចំណាយលើឥន្ធនៈ និងអត្រាប្តូរប្រាក់ បរទេសក្តី ក៏យើងនៅតែជាក្រុមហ៊ុនមួយក្នុងចំណោមក្រុមហ៊ុនអាកាសចរណ៍ដែលទទួលបានលទ្ធផលល្អបំផុតក្នុងពិភពលោកដដែល»។
ក្នុងរយៈពេល ១២ ខែគិតត្រឹមថ្ងៃទី ៣០ ខែមិថុនាប្រាក់ចំណេញមូលដ្ឋាន (underlying profit) មុនបង់ពន្ធដែលជារង្វាស់ប្រាក់ចំណេញដែលក្រុមហ៊ុនតែងតែធ្វើដោយដកចេញការចំណាយម្តងម្តាលបានធ្លាក់ចុះ ១៧ ភាគរយមកនៅត្រឹម ១,៣ ពាន់លានដុល្លារអូស្ត្រាលី។
ក្រុមហ៊ុនអាកាសចរណ៍ Qantas បានប្រកាសផ្តល់ភាគលាភចំនួន ១៣ សេនក្នុងមួយហ៊ុន និងបានប្រកាសពីការទិញយកភាគហ៊ុនពីទីផ្សារមកវិញរហូតដល់ ៧៩,៧ លានហ៊ុន។
ក្រុមហ៊ុនក៏នឹងផ្តល់ប្រាក់រង្វាន់ដល់បុគ្គលិករបស់ខ្លួនផងដែរ ដែលមានតម្លៃសរុបរហូតដល់ ៣២ លានដុល្លារ។
លោក Joyce បានថ្លែងថាចក្ខុវិស័យសម្រាប់ក្រុមហ៊ុនរបស់លោកមានភាពចម្រុះដោយទីផ្សារទេសចរណ៍ក្នុងស្រុកចុះខ្សោយ ហើយតម្រូវការធ្វើដំណើររបស់សាជីវកម្មនៅថេរ។
ទោះជាយ៉ាងណាលោកថ្លែងថា ក្រុមហ៊ុនអាកាសចរណ៍នេះមាន «ទំនុកចិត្ត» សម្រាប់ឆ្នាំខាងមុខ ដោយសារភាគច្រើនក្រុមហ៊ុនស្ថិតក្នុង «ស្ថានភាពហិរញ្ញវត្ថុរឹងមាំ»៕ KC
