ក្រុងញូវយ៉កៈ ក្រុមហ៊ុន Citigroup កាលពីថ្ងៃចន្ទបានរាយការណ៍កំណើនប្រាក់ចំណេញប្រចាំត្រីមាសទី២ ដោយសារកំណើនផ្តល់ប្រាក់កម្ចី និងការចំណាយទាបជាងមុន បើទោះជាមានក្តីបារម្ភជុំវិញការថមថយកំណើនសេដ្ឋកិច្ចក្តី។
Citigroup គឺជាក្រុមហ៊ុនហិរញ្ញវត្ថុទី១ ក្នុងចំណោមធនាគារធំៗបំផុតរបស់អាមេរិកដែលបានរាយការណ៍ពីប្រាក់ចំណេញនៅសប្តាហ៍នេះ ដោយធនាគារនេះបានកត់ត្រាប្រាក់ចំណេញសុទ្ធចំនួន ៤,៨ ពាន់លានដុល្លារ កើនឡើង ៦,៩ ភាគរយ នៅត្រីមាសទី២ ធៀបនឹងរយៈពេលដូចគ្នាកាលពីឆ្នាំមុន។
ប្រាក់ចំណេញត្រូវបានជួយជំរុញដោយកំណើនម្តងម្តាលចំនួន ៣៥០ លានដុល្លារ ដែលទទួលបានពីការបោះផ្សាយលក់មូលបត្រជាសាធារណៈលើកដំបូងរបស់គេហទំព័រជួញដូរ Tradeweb ដែលត្រូវបានដឹកនាំដោយក្រុមហ៊ុន Citigroup និងធនាគារធំៗផ្សេងទៀត។
ប្រាក់ចំណូលបានកើនឡើង ១,៦ ភាគរយដល់ ១៨,៨ ពាន់លានដុល្លារ។
លទ្ធផលនេះបានកើតមានឡើង ខណៈដែលធនាគារនានាបានព្យាយាមជចៀសឆ្ងាយចេញពីបរិយាកាសមិនល្អដែលកើតមានឡើងដោយសារសង្គ្រាមពាណិជ្ជកម្មរវាងចិន និងអាមេរិក ដែលកំពុងបន្តកើតមាន និងការរំពឹងទុកពីការទម្លាក់អត្រាការប្រាក់របស់ធនាគារកណ្តាលអាមេរិក ដោយសារកំណើនសេដ្ឋកិច្ចថមថយសម្ទុះ។ ការទម្លាក់អត្រាការប្រាក់របស់ធនាគារកណ្តាល ជាធម្មតាធ្វើឲ្យប៉ះពាល់ដល់ប្រាក់ចំណេញរបស់ធនាគារ។
លោក Michael Corbat អគ្គនាយកក្រុមហ៊ុន Citigroup ថ្លែងថា៖ «យើងបញ្ចៀសចេញពីបរិយាកាសមិនប្រាកដប្រជាដោយជោគជ័យតាមរយៈការអនុវត្តយុទ្ធសាស្រ្តរបស់យើង និងតាមរយៈការបង្ហាញការគ្រប់គ្រងការចំណាយ ឥណទាន និងហានិភ័យប្រកបដោយវិន័យ»។
ក្រុមហ៊ុន Citigroup បានរាយការណ៍ពីការធ្លាក់ចុះប្រាក់ចំណូលពីធនាគារវិនិយោគ ដោយប្រាក់ចំណូលពីសេវាប្រឹក្សា និងធានាទិញមូលបត្របានធ្លាក់ចុះ។
ប៉ុន្តែក្រុមហ៊ុននេះទទួលបានកំណើនពីការផ្តល់កម្ចីសរុប និងប្រាក់បញ្ញើសរុប។
ការចំណាយបានធ្លាក់ចុះ ដោយក្រុមហ៊ុនបានចំណាយកាន់តែតិចលើបៀវត្សរ៍ និងសំណងដល់បុគ្គលិក និងការវិនិយោគលើបច្ចេកវិទ្យា។ ក្រុមហ៊ុនក៏ចំណាយលើពន្ធតិចជាងមុនផងដែរ៕ AFP/KC