ក្រុងបាងកកៈ ប្រាក់បាតរបស់ប្រទេសថៃ អាចនឹងធ្លាក់ចុះដល់កម្រិតទាបក្នុងរយៈពេល ៧ ខែរបស់ខ្លួន ដោយសារវិនិយោគិនបរទេសបន្តចាកចេញពីផ្សារហ៊ុនថៃ ដោយសារងាកទៅរកការវិនិយោគដែលអត្រាការប្រាក់ខ្ពស់ជាងមុន និងដោយសារទស្សនៈវិស័យសេដ្ឋកិច្ចប្រសើរជាងមុននៅសហរដ្ឋអាមេរិក។ នេះបើយោងតាមកាសែតបាងកកប៉ុស្តិ៍។
កាសែតបាងកក ប៉ុស្តិ៍ ដែលបានដកស្រង់ទិន្នន័យពីធនាគារកណ្តាលថៃបានរាយការណ៍កាលពីថ្ងៃអាទិត្យថា ប្រាក់បាតបានបន្តធ្លាក់ថ្លៃ ដោយមានតម្លៃ ៣២,៩១ បាតក្នុងមួយដុល្លារកាលពីថ្ងៃសុក្រសប្តាហ៍មុន ធ្លាក់ចុះ ១,៧៣ ភាគរយធៀបនឹងសប្តាហ៍មុនមួយទៀត។
មជ្ឈមណ្ឌលស្រាវជ្រាវ Kasikorn បានឲ្យដឹងថា តម្លៃរូបិយប័ណ្ណនេះកំពុងឈានទៅរកការធ្លាក់ចុះទៅរក ៣៣ បាត ដែលជាតម្លៃទាបបំផុតក្នុងរយៈពេល ៧ ខែធៀបនឹងរូបិយប័ណ្ណដុល្លារ ហើយអាចឈានដល់ចំណុចនោះនាសប្តាហ៍នេះ។ នេះបើយោងតាមកាសែតបាងកកប៉ុស្តិ៍។
មជ្ឈមណ្ឌលនេះបានព្យាករថា ប្រាក់បាតនឹងស្ថិតក្នុងចន្លោះពី ៣២,៨០ ទៅ ៣៣,៤០ បាតក្នុងមួយដុល្លារនៅសប្តាហ៍នេះ។
ការធ្លាក់ចុះនៃប្រាក់បាតកើតមានឡើងដោយសារការបន្តហូរចេញការវិនិយោគរបស់បរទេសពីផ្សារហ៊ុន និងមូលបត្របំណុលថៃ បន្ទាប់ពីធនាគារកណ្តាលអាមេរិកបានដំឡើងអត្រាប្រាក់កម្ចីគោល និងក្នុងគ្រាដែលមានក្តីបារម្ភអំពីសង្គ្រាមពាណិជ្ជកម្មរវាងអាមេរិក និងដៃគូពាណិជ្ជកម្មរបស់ខ្លួន។
កាលពីសប្តាហ៍មុន វិនិយោគិនបរទេសគឺជាអ្នកលក់សុទ្ធនូវភាគហ៊ុនពីផ្សារហ៊ុនថៃ ដែលមានតម្លៃ ១៣,៨ ពាន់លានបាត។ វិនិយោគិនទាំងនេះបានលក់ភាគហ៊ុនចេញក្នុងតម្លៃ ១៧៦ ពាន់លានចាប់តាំងពីដើមឆ្នាំមក៕ NS