ក្រុងម៉ាំបៃៈ ប្រាក់រូពីរបស់ប្រទេសឥណ្ឌា បានធ្លាក់ចុះដល់តម្លៃទាបបំផុតមួយ គឺ ៧០ រូពីក្នុងមួយដុល្លារកាលពីថ្ងៃអង្គការ ខណៈរូបិយប័ណ្ណរបស់ប្រទេសកំពុងអភិវឌ្ឍន៍ខ្លាំងផ្សេងទៀតត្រូវបានលក់ចេញដោយវិនិយោគិន ដែលជំរុញដោយវិបត្តិហិរញ្ញវត្ថុរបស់ប្រទេសតួកគី។
ប្រាក់រូពីដែលស្ថិតក្រោមសម្ពាធ បានកើនធ្លាក់ចុះដល់ ៧០,០៩ រូពីក្នុងមួយដុល្លារមួយរយៈពេលខ្លីក្នុងអំឡុងពេលជួញដូរនៅពេលព្រឹក ខណៈភាពភ័យខ្លាចបានកើនឡើងថា បញ្ហារបស់រូបិយប័ណ្ណ លីរ៉ា របស់ប្រទេសតួកគី នឹងរីករាលដាលដល់ប្រទេសកំពុងអភិវឌ្ឍន៍ខ្លាំងផ្សេងទៀត។
ប្រទេសអាហ្រ្វិកខាងត្បូង អាហ្សង់ទីន ម៉ិកស៊ិក ប្រេស៊ីល និងរុស្ស៊ី បានមើលឃើញពីការធ្លាក់ចុះតម្លៃរូបិយប័ណ្ណរបស់ខ្លួនក្នុងរយៈពេលមួយសប្តាហ៍ចុងក្រោយនេះ ពីព្រោះដូចទៅនឹងប្រទេសតួកគីដែរ ប្រទេសទាំងនេះនៅតែពឹងផ្អែកខ្លាំងលើមូលធនបរទេស ជាពិសេសប្រាក់ដុល្លារ។
ប្រាក់រូពីបានស្ថិតនៅលើផ្លូវធ្លាក់ចុះក្នុងឆ្នាំ ២០១៨ នេះ បន្ទាប់ពីមានតម្លៃ ៦៣,៦៧ រូពីក្នុងមួយដុល្លារនៅដើមឆ្នាំនេះ៕ AFP/KC