The Phnom Penh Post Search

Search form




Logo of Phnom Penh Post newspaper Phnom Penh Post - ប្រាក់​ប្រមាណ ៤ លាន​ដុល្លារ​ត្រូវ​ដក​ចេញ​ពី​ធនាគារ អេស៊ីលីដា

ប្រាក់​ប្រមាណ ៤ លាន​ដុល្លារ​ត្រូវ​ដក​ចេញ​ពី​ធនាគារ អេស៊ីលីដា

ប្រាក់​ប្រមាណ ៤ លាន​ដុល្លារ​ត្រូវ​ដក​ចេញ​ពី​ធនាគារ អេស៊ីលីដា

7-story-1
អតិថិជនកំពុងតែដកប្រាក់ចេញពីម៉ាស៊ីន ATM ហេង ជីវ័ន

ភ្នំពេញៈ អ្នក​វិភាគ​មក​ពី​ភ្នាក់ងារ​វាយ​តម្លៃ​ចំណាត់​ថ្នាក់​ឥណទាន Standard & Poor បាន​ឲ្យ​ដឹង​ថា អ្នក​ប្រើ​ប្រាស់​ធនាគារ អេស៊ី​លីដា បាន​ដក​ប្រាក់​ប្រមាណ ៤ លាន​ដុល្លារ​ពី​ម៉ាស៊ីន អេធីអឹម កាល​ពី​ល្ងាច​ថ្ងៃ​អាទិត្យ​ដោយ​សារ​ភាព​តាន​តឹង​ពី​លទ្ធផល​បោះឆ្នោត ដោយ​ជំរុញ​ឲ្យ​មាន​ការ​ភ័យ​ខ្លាច​ពី​អស្ថិរភាព។

ចំនួន​នេះ​មាន​ពី ២ ទៅ​ដល់ ៣ ដង​ខ្ពស់​ជាង​ចំនួន​ប្រចាំ​ថ្ងៃ។

លោក Ivan Tan អ្នក​វិភាគ​មក​ពី S&P នៅ សិង្ហបុរី បាន​ឲ្យ​ដឹង​តាម​សារ​អេឡិច​ត្រូនិក​កាល​ពី​ម្សិលមិញ​ថា​៖ «ការ​យល់​ដឹង​របស់​យើង​គឺ​ថា វា​ជា​ប្រតិកម្ម​ដ៏​រហ័ស​មួយ​កាល​ពី​ល្ងាច​ថ្ងៃ​អាទិត្យ​ដែល​មនុស្ស​ជា​ច្រើន​ដក​ប្រាក់ និង​ការ​ស្ដុក​អាហារ​ទុក​ក្នុង​ការ​ត្រៀម​សម្រាប់​ភាព​ចលាចល និង​ការ​ផ្អាក​ដំណើរ​ការ​សេវា»។

S&P បាន​ចេញ​សេចក្ដី​ថ្លែង​ការណ៍​មួយ​កាល​ពី​ថ្ងៃ​ទី​៣០ ខែ​កក្កដា ពីរ​ថ្ងៃ​បន្ទាប់​ពី​ការ​បោះឆ្នោត ដោយ​លើក​ឡើង​ថា ខ្លួន​រក្សា​ចំណាត់​ថ្នាក់ អេស៊ី​លីដា​នៅ​កម្រិត B ឬ​ស្ថិរភាព​ដោយ​សារ​ការ​ដក​ប្រាក់​ត្រូវ​បាន​កំណត់​ធៀប​នឹង​ទ្រព្យ​សកម្ម សន្ទនីយភាព​របស់​ធនាគារ​នេះ​។

S&P និយាយ​នៅ​ក្នុង​សេចក្ដី​ថ្លែង​ការណ៍​នេះ​ថា អេស៊ី​លីដា មាន​ម៉ាស៊ីន អេធីអឹម ១៧០ ទូទាំង​ប្រទេស ជា​ធនាគារ​ធំ​ជាង​គេ​នៅ​កម្ពុជា ដូច្នេះ​វា​មាន​ផល​ប៉ះពាល់​ខ្លាំង​បំផុត​។ គិត​ត្រឹម​ថ្ងៃ​ទី​៣០ ខែ​មិថុនា ធនាគារ​នេះ​ទទួល​បាន​ប្រាក់​បញ្ញើ ១,៥ ពាន់​លាន​ដុល្លារ​អាមេរិក។

ការ​ដក​ប្រាក់​ភាគ​ច្រើន​បាន​កើត​ឡើង​នៅ​ទីក្រុង ភ្នំពេញ​កាល​ពី​ថ្ងៃ​អាទិត្យ ដោយ​មាន​ការ​តម្រង់​ជួរ​ដ៏​វែង​នៅ​ចាំ​ដក​ប្រាក់​ពី​ម៉ាស៊ីន អេធីអឹម។

ខណៈ​បរិយាកាស​បាន​ស្ងាត់​ស្ងៀម​ចក្ខុ​វិស័យ​នៅ​មិន​ទាន់​ច្បាស់​លាស់។

លទ្ធផល​បឋម​របស់​គណបក្ស​ប្រជាជន​កម្ពុជា​គឺ​គណបក្ស​នេះ​ឈ្នះ ៦៨ ហើយ​គណបក្ស​សង្គ្រោះ​ជាតិ​បាន ៥៥ អាសនៈ ប៉ុន្តែ​លទ្ធផល​របស់​បក្ស​សង្គ្រោះ​ជាតិ​គឺ​គណបក្ស​ប្រឆាំង​ធំ​មួយ​នេះ​ឈ្នះ បាន ៦៣ អាសនៈ។ ទោះ​យ៉ាង​នេះ​ក្តី​លទ្ធផល​ផ្លូវ​ការ​មិន​ទាន់​ដឹង​នៅ​ឡើយ​ទេ​។

លោក អ៊ិន ចាន់នី ប្រធាន​ធនាគារ អេស៊ីលីដា ឲ្យ​ដឹង​ថា កាល​ពី​ថ្ងៃ​អាទិត្យ ពេល​ការ​ដក​ប្រាក់​បាន​កើន​ឡើង ម៉ាស៊ីន អេធីអឹម ជាច្រើន​អស់​ប្រាក់។ លោក​បន្ត​ថា​៖ «ដោយ​សារ នៅ​ក្នុង​ម៉ាស៊ីន អេធីអឹម យើង​មាន​ប្រាក់​រៀល និង​ដុល្លារ អតិថិជន​ភាគ​ច្រើន​ដក​យក​តែ​ប្រាក់​ដុល្លារ ដូច្នេះ​យើង​នៅ​មាន​ប្រាក់​រៀល។ វា​មិន​អស់​ប្រាក់​ទេ»៕ PB

អត្ថបទគួរចាប់អារម្មណ៍