The Phnom Penh Post Search

Search form

Logo of Phnom Penh Post newspaper Phnom Penh Post - ប្រាក់​រៀល​ឡើង​ថ្លៃ​ខណៈ​រដូវ​ប្រមូល​ផល​ចូល​មក​ដល់​




ប្រាក់​រៀល​ឡើង​ថ្លៃ​ខណៈ​រដូវ​ប្រមូល​ផល​ចូល​មក​ដល់​

ប្រាក់​រៀល​ឡើង​ថ្លៃ​ខណៈ​រដូវ​ប្រមូល​ផល​ចូល​មក​ដល់​

ភ្នំពេញៈ តម្លៃ​ប្រាក់​រៀល​កម្ពុជា​បាន​ឡើង​ថ្លៃ​បន្តិច​ធៀប​នឹង​ប្រាក់​ដុល្លារ​អាមេរិក ក្នុង​រយៈ​ពេល​ពីរ​បី​សប្តាហ៍​ចុង​ក្រោយ​នេះ​បើ​ធៀប​នឹង​ចុង​ខែ​តុលា​កន្លង​ទៅ​។

ការ​ឡើង​ថ្លៃ​នេះ​ដោយ​សារ​សកម្មភាព​សេដ្ឋ​កិច្ច​រីក​ចម្រើន និង​តម្រូវ​ការ​រូបិយប័ណ្ណ​ក្នុង​ស្រុក​កាន់​តែ​ច្រើន ក្នុង​រដូវ​ច្រូត​កាត់។

អ្នក​បម្រើ​ការ​នៅ​ក្នុង​ធនាគារ និង​សេដ្ឋវិទូ​បាន​ឲ្យ​ដឹង​ថា កំណើន​តម្រូវ​ការ​ប្រាក់​រៀល ឆ្លុះ​បញ្ចាំង​ឲ្យ​ឃើញ​ពី​កំណើន​នៃ​ការ​ជឿ​ទុក​ចិត្ត​ពី​ប្រជាជន​កម្ពុជា និង​ការ​រីក​ចម្រើន​ក្នុង​ការ​ប្រមូល​ពន្ធ​ដែល​ប្រើប្រាស់​ជា​រូបិយប័ណ្ណ​ក្នុង​ស្រុក​។

យោង​តាម​របាយ​ការណ៍​ស្តី​ពី​តម្លៃ​ទំនិញ​ប្រើ​ប្រាស់​ប្រចាំ​ថ្ងៃ​របស់​ក្រសួង​សេដ្ឋ​កិច្ច​បាន​បង្ហាញ​ថា តម្លៃ​ប្រាក់​រៀល​បាន​ឡើង​ថ្លៃ​ជាង​១​ភាគ​រយ ដោយ​មួយ​ដុល្លារ​អាមេរិក​ស្មើ​នឹង៣ ៩៩៨​រៀល ធៀប​នឹង​កាល​ពី​ចុង​ខែ​តុលា ដែល​មួយ​ដុល្លារ​អាច​ប្តូរ​បាន​៤ ០៤២​រៀល។

លោក​រ័ត្ន យូ​ម៉េង ប្រធាន​រតនា​គារ​ប្រចាំ​ធនាគារ​អេស៊ីលីដា បាន​ប្រាប់​ភ្នំពេញ ប៉ុស្តិ៍​កាល​ពី​ម្សិល​មិញ​ថា តម្រូវ​ការ​ប្រាក់​រៀល​ប្រចាំ​ខែ​វិច្ឆិកា បាន​កើន​ឡើង​នៅ​ដើម​រដូវ​ច្រូត​កាត់។

លោក​បាន​ឲ្យ​ដឹង​ថា ការ​រីក​ចម្រើន​នៃ​សេដ្ឋ​កិច្ច​កម្ពុជា បាន​ធ្វើ​ឲ្យ​ប្រាក់​រៀល​ឡើង​ថ្លៃ។ លោក​បាន​លើក​ឡើង​ថា៖ «ខ្ញុំ​គិត​ថា នៅ​ខែ​នេះ​តម្រូវ​ការ​ប្រាក់​រៀល បាន​ឡើង​ថ្លៃ​ខ្ពស់​ក្នុង​អំឡុង​រដូវ​ច្រូត​កាត់ ដោយ​សារ​ប្រជាជន​នៅ​តំបន់​ជន​បទ​ចូល​ចិត្ត​ប្រើ​ប្រាស់​ប្រាក់​រៀល​នៅ​ពេល​ទិញ​ផលិតផល»​។ លោក រ័ត្ន យូ​ម៉េង​បាន​កត់​សម្គាល់​ឃើញ​ពី​ការ​រីក​ចម្រើន​ក្នុង​ការ​ប្រមូល​ពន្ធ​ដែល​ជា​ហេតុ​ធ្វើ​ឲ្យ​មាន​កំណើន​ការ​ប្រើ​ប្រាស់​រូបិយ​ប័ណ្ណ​ក្នុង​ស្រុក នៅ​ក្នុង​ទី​ផ្សារ។

លោក ចាន់ សុផល ប្រធាន​សមាគម​សេដ្ឋកិច្ច​កម្ពុជា​បាន​លើក​ឡើង​ថា ការ​រីក​ចម្រើន​នៃ​សេដ្ឋកិច្ច​របស់​កម្ពុជា ជា​ពិសេស សេដ្ឋកិច្ច​នៅ​តំបន់​ជន​បទ​គឺ​ជា​ការ​រួម​ចំណែក​ដ៏​សំខាន់​ក្នុង​ការ​ធ្វើ​ឲ្យ​តម្លៃ​ប្រាក់​រៀល​ឡើង​ថ្លៃ។​លោក​បន្ត​ថា រូបិយប័ណ្ណ​ក្នុង​ស្រុក​ឡើង​ថ្លៃ នឹង​រួម​ចំណែក​ដល់​ការ​រីក​ចម្រើន​នៃ​សេដ្ឋកិច្ច​ហើយ​ស្រប​គ្នា​ទៅ​នឹង​ការ​ពង្រឹង​គោល​នយោបាយ​រូបិយវត្ថុ​ពី​សំណាក់​ធនាគារ​ជាតិ​នៃ​កម្ពុជា លើ​ការ​លើក​កម្ពស់​ការ​ប្រើប្រាស់​រូបិយប័ណ្ណ​ក្នុង​ស្រុក​។

លោក ចាន់ សុផល បាន​លើក​ឡើង​ថា៖ «ខ្ញុំ​បាន​កត់​សម្គាល់​ឃើញ​ថា និន្នាការ​នៃ​ការ​ប្រើប្រាស់​រូបិយវត្ថុ​ក្នុង​ស្រុក កំពុង​កើន​ឡើង។​ដូច្នេះ​ការណ៍​នេះ សង្កត់​ធ្ងន់​លើ​ទំនុក​ចិត្ត​កាន់​តែ​ច្រើន​ឡើង​ពី​សំណាក់​ប្រជាជន​របស់​យើង ដែល​ជា​ការ​បោះ​ជំហាន​ទៅ​មុខ​យ៉ាង​ល្អ»។

លោក​រ័ត្ន យូម៉េង ក៏​បាន​ចង្អុល​បង្ហាញ​ផង​ដែរ​ថា ការ​លើក​កម្ពស់​ការ​ទទួល​បាន​ប្រាក់​បញ្ញើ​នៅ​ធនាគារ ជា​ប្រាក់​រៀល ដោយ​គិត​អត្រា​ការ​ប្រាក់​ខ្ពស់ ក៏​ជា​កត្តា​រួម​ចំណែក​មួយ​ផ្សេង​ទៀត សម្រាប់​ធ្វើ​ឲ្យ​ប្រាក់​រៀល​ឡើង​ថ្លៃ​ផង​ដែរ។ លោក​ថ្លែង​ថា៖ «បច្ចុប្បន្ន ប្រាក់​បញ្ញើ​ជា​ប្រាក់​រៀល​សរុប នៅ​ក្នុង​ធនា​គារ​របស់​យើង កំពុង​កើន​ឡើង​។​ប្រាក់​រៀល​មាន​ចំនួន​ជាង​១០​ភាគ​រយ​នៃ​ប្រាក់​បញ្ញើ​សរុប។ កាល​ពី​មុន មាន​ចំនួន​តិច​ជាង ១០​ភាគ​រយ»​។

ប្រជាជន​កម្ពុជា​ភាគ​ច្រើន​ប្រើប្រាស់​ប្រាក់​រៀល ប៉ុន្តែ​ទិន្ន​ន័យ​NBC បាន​បង្ហាញ​ថា ជាង ៩០​ភាគ​រយ​នៃ​ប្រតិបត្តិការ​នៅ​កម្ពុជា គិត​ជា​ប្រាក់​ដុល្លារ​អាមេរិក​។

តាម​ការ​អង្កេត​របស់ NBC កាល​ពី​ឆ្នាំ​២០១០​បង្ហាញ​ថា ៣៧​ភាគ​រយ​នៃ​ប្រជាជន​កម្ពុជា បាន​ទទួល​ចំណូល​ជា​ប្រាក់​រៀល ២៧,៥​ភាគ​រយ ជា​ប្រាក់​ដុល្លារ និង​៣៣​ភាគ​រយ​ចម្រុះ​។ ប្រមាណ​២,២​ភាគ​រយ​នៃ​ប្រជាជន​ចាយ​ប្រាក់​បាត ០,៣​ភាគ​រយ ប្រើ​ប្រាក់​ដុង​។ ៧០​ភាគ​រយ​នៃ​ប្រជាជន​នៅ​ភ្នំពេញ​ចាយ​ដុល្លារ​៕CS

អត្ថបទគួរចាប់អារម្មណ៍