ភ្នំពេញៈ ប្រាសាក់ ដែលជាគ្រឹះស្ថានមីក្រូហិរញ្ញវត្ថុធំជាងគេនៅកម្ពុជា បានសម្រេចបង្កើនដើមទុនចុះបញ្ជីពី ១១០ លានដុល្លារ រហូតដល់ ១៦៨ លានដុល្លារ ជាចំនួនច្រើនជាងលក្ខខណ្ឌតម្រូវរបស់ធនាគារជាតិរហូតដល់ទៅជាង ៥ ដង។
សេចក្ដីប្រកាសមួយ ដោយធនាគារជាតិនៃកម្ពុជា (NBC) តម្រូវឲ្យគ្រឹះស្ថានមីក្រូហិរញ្ញវត្ថុទទួលបញ្ញើ (MDI) ដូចជាប្រាសាក់ ត្រូវបង្កើនទុនចុះបញ្ជីយ៉ាងហោចណាស់ ៣០ លានដុល្លារ។
លោក សាយ សូនី អនុប្រធានជាន់ខ្ពស់នៅគ្រឹះស្ថានមីក្រូហិរញ្ញវត្ថុប្រាសាក់ បានប្រាប់ភ្នំពេញប៉ុស្ដិ៍កាលពីម្សិលមិញថា សំណើរបស់ប្រាសាក់ ក្នុងការបង្កើនដើមទុនចុះបញ្ជី ត្រូវបានយល់ព្រមដោយធនាគារជាតិនៃកម្ពុជា (NBC) កាលពីថ្ងៃទី ៣១ ខែធ្នូ ឆ្នាំ ២០១៨ និងក្រសួងពាណិជ្ជកម្មកាលពីថ្ងៃអង្គារនៅសប្ដាហ៍នេះ។
លោកបន្ថែមថា ការបង្កើនដើមទុនចុះបញ្ជីបង្ហាញថា វាអាចឲ្យប្រាសាក់ បង្កើនអាជីវកម្ម មិនគ្រាន់តែបរិមាណប៉ុណ្ណោះទេ ប៉ុន្តែថែមទាំងគុណភាព និងប្រសិទ្ធភាពផងដែរ។ លោកថ្លែងថា៖ «យើងចាត់ទុកវាថាជាការសម្រេចបានដ៏សំខាន់បំផុតមួយ និងជាការចាប់ផ្ដើមដ៏អស្ចារ្យនៃឆ្នាំ ២០១៩»។ លោកបន្តថា៖ «ការបង្កើនដើមទុនចុះបញ្ជីនេះបង្ហាញពីការប្ដេជ្ញាចិត្តរបស់យើង ក្នុងការគាំទ្រគោលបំណងរបស់ NBC ដើម្បីពង្រឹងបទប្បញ្ញត្តិហិរញ្ញវត្ថុ និងគោលនយោបាយប្រុងប្រយ័ត្ន»។
លោក សូនី ឲ្យដឹងថា គិតនៅត្រឹមចុងឆ្នាំ ២០១៨ ទ្រព្យសកម្មសរុបរបស់ប្រាសាក់មានចំនួនសរុប ២,៣៧ ពាន់លានដុល្លារ។ កម្ចីមានចំនួន ១,៩៦ ពាន់លានដុល្លារ ខណៈប្រាក់បញ្ញើបានកើនឡើងសរុបដល់ ១,២៩ ពាន់លានដុល្លារ។ កាលពីចុងឆ្នាំមុន ប្រាសាក់ បានដំឡើងម៉ាស៊ីន អេធីអឹម ជាង ១២៦ គ្រឿង ម៉ាស៊ីនឆូតកាត ៤៩៨ គ្រឿង និងអ្នកប្រើប្រាស់ធនាគារចល័ត ១១,២០០ នាក់។
NBC កាលពីខែមីនា ឆ្នាំ ២០១៦ បានចេញសេចក្ដីប្រកាសមួយ ដែលតម្រូវឲ្យគ្រឹះស្ថានហិរញ្ញវត្ថុដែលប្រតិបត្តិការនៅកម្ពុជា ត្រូវបង្កើនទុនចុះបញ្ជីអប្បបរមារបស់ខ្លួន។ តាមសេចក្តីប្រកាស NBC តម្រូវឲ្យធនាគារពាណិជ្ជទាំងអស់ ដែលរួមទាំងក្រុមហ៊ុនបុត្រសម្ព័ន្ធ របស់ធនាគារបរទេស ត្រូវបង្កើនដើមទុនអប្បបរមា ស្មើនឹង ៧៥ លានដុល្លារ។ ធនាគារឯកទេស ត្រូវតម្រូវឲ្យបង្កើនដើមទុនអប្បបរមាដល់ ១៥ លានដុល្លារ ពី ៧,៥ លានដុល្លារ។ MDI តម្រូវឲ្យបង្កើនដើមទុនអប្បបរមាដល់ ៣០ លានដុល្លារ កើនឡើងពី ២,៥ លានដុល្លារ។
លោក យុន សុវណ្ណា នាយកប្រតិបត្តិ សមាគមមីក្រូហិរញ្ញវត្ថុកម្ពុជា (CMA) បានឲ្យដឹងកាលពីថ្ងៃពុធថា ការបង្កើនដើមទុនចុះបញ្ជីរបស់ប្រាសាក់ ត្រូវបានធានា ដោយសារតែថា ក្រុមហ៊ុនហិរញ្ញវត្ថុមួយនេះបានកើនឡើងយ៉ាងរហ័ស។
លោក សុវណ្ណា ឲ្យដឹងថា នៅពេលគ្រឹះស្ថានហិរញ្ញវត្ថុ កើនឡើងទាំងកម្ចី និងប្រាក់បញ្ញើកាន់តែច្រើន វាក៏នឹងនាំមកនូវហានិភ័យផងដែរ។
លោកបានបន្ថែមថា ការសម្រេចចិត្តពីក្រុមហ៊ុននេះ ក្នុងការបង្កើនដើមទុនចុះបញ្ជីរបស់ខ្លួននៅក្នុងចំនួនកាន់តែធំជាងតម្រូវការរបស់ធនាគារកណ្ដាល បានបង្ហាញថា ជាការប្ដេជ្ញាចិត្តដ៏រឹងមាំដើម្បីរក្សាស្ថានភាពល្អប្រសើរផ្នែកហិរញ្ញវត្ថុ និងធានាទំនុកចិត្តសម្រាប់សាធារណជន។
លោកថ្លែងថា៖ «សម្រាប់គ្រឹះស្ថានហិរញ្ញវត្ថុ ពេលពួកគេកំពុងរីកចម្រើនកាន់តែធំឡើងៗ ពួកគេតែងតែចង់ផ្ដល់សេវាហិរញ្ញវត្ថុពេញលេញ»។ លោកបន្ថែមថា ប្រតិបត្តិករអាចនឹងគិតថា ការស្ថិតនៅជា MDI ឬ MFI អាចកម្រិតសមត្ថភាពរបស់ពួកគេក្នុងការផ្ដល់សេវា។
លោកបញ្ជាក់ថា៖ «ជាទូទៅ MFI និង MDI តែងតែមានមហិច្ឆតា ក្នុងការប្រែក្លាយខ្លួនពួកគេទៅជាធនាគារមួយ ដូច្នេះពួកគេអាចផ្ដល់សេវាហិរញ្ញវត្ថុពេញលេញ»៕LA