The Phnom Penh Post Search

Search form




Logo of Phnom Penh Post newspaper Phnom Penh Post - ប្រេង​ធ្លាក់​ថ្លៃ​ខណៈ​ស្តុក​ប្រេង​កើនឡើង

ប្រេង​ធ្លាក់​ថ្លៃ​ខណៈ​ស្តុក​ប្រេង​កើនឡើង

បុគ្គលិក​ក្រុមហ៊ុន​ប្រេង Tatneft កំពុង​ខួង​ប្រេង​នៅ​ការដ្ឋាន​ក្នុង​ប្រទេស​រុស្ស៊ី​។
បុគ្គលិក​ក្រុមហ៊ុន​ប្រេង Tatneft កំពុង​ខួង​ប្រេង​នៅ​ការដ្ឋាន​ក្នុង​ប្រទេស​រុស្ស៊ី​។ bloomberg

ប្រេង​ធ្លាក់​ថ្លៃ​ខណៈ​ស្តុក​ប្រេង​កើនឡើង

ក្រុងសិង្ហបុរីៈ តម្លៃ​ប្រេង​បាន​ធ្លាក់​ចុះ​នៅ​តំបន់​អាស៊ី​កាលពី​ថ្ងៃ​ចន្ទ​ដោយសារ​ប្រាក់​ដុល្លារ​ឡើង​ថ្លៃ និង​ដំណឹង​ដែល​ស្តុក​ប្រេង​ពិភព​លោក​បាន​កើន​ឡើង​ដល់​កម្រិត​ខ្ពស់​បំផុត​ដាក់​សម្ពាធ​លើ​តម្លៃ​ប្រេង​ក្នុង​កិច្ច​សន្យា​អនាគត​។

ប្រេងឆៅ​បាន​ធ្លាក់​ចុះ​ដល់​តម្លៃ​ទាប​បំផុត​​ក្នុង​រយៈពេល​ពីរ​ខែ​កាលពី​ថ្ងៃ​សុក្រ​បន្ទាប់ពី​ទីភ្នាក់ងារ​ថាមពល​អន្តរជាតិ​ដែល​ជា​អ្នក​ព្យាករ​តម្លៃ​ប្រេង​ពិភពលោក​បាន​ឲ្យ​ដឹង​ថា​ស្តុក​ពាណិជ្ជកម្ម​ប្រេង​ពិភព​លោក​បាន​កើន​ឡើង​ដល់ ៣ ​ពាន់​លាន​ធុង។

ការ​រំពឹង​ទុក​កាន់​តែ​ខ្លាំង​ថា​អាមេរិក​នឹង​ដំឡើង​អត្រា​ការប្រាក់​ជា​លើក​ដំបូង​ក្នុង​រយៈពេល​ជិត​មួយ​ទសវត្សរ៍​នៅ​ឆ្នាំ​ក្រោយ​ក៏​នឹង​ជំរុញ​ឲ្យ​ប្រាក់​ដុល្លារ​ឡើង​ថ្លៃ​ផង​ដែរ​កាលពី​ថ្ងៃ​ចន្ទ​ដោយ​បាន​ធ្វើឲ្យ​ប៉ះពាល់​ដល់​តម្លៃ​ទំនិញ។

លោក Sanjeev Gupta ប្រធាន​ផ្នែក​ប្រេង និង​ឧស្ម័ន​នៅ​តំបន់​អាស៊ី​ប៉ាស៊ីហ្វិក​ប្រចាំ​ក្រុមហ៊ុន EY បាន​ឲ្យ​ដឹងថា៖ «​ស្តុក​ប្រេងឆៅ​កម្រិត​ខ្ពស់​បំផុត​ជាមួយ​នឹង​​ការ​មិន​​ធ្លាក់​ចុះ​ផលិតផល​ប្រេង​ទំនង​ជា​រក្សា​តម្លៃ​ប្រេង​ឲ្យ​នៅក្នុង​កម្រិត​​មួយ​ក្នុង​រយៈពេល​ប៉ុន្មាន​សប្តាហ៍​ខាង​មុខ​»។

នៅ​ម៉ោង​ប្រមាណ​ ១២ ​ថ្ងៃ​ត្រង់​ម្សិលមិញ​ប្រេងឆៅ​ប្រភេទ West Texas Intermediate (WTI) ដែល​ជា​តម្លៃ​ប្រេង​គោល​របស់​អាមេរិក​សម្រាប់​ចែកចាយ​នៅ​​ខែ​មករា​បាន​ធ្លាក់​ថ្លៃ ១,១៨ ​ដុល្លារ​នៅ​តម្លៃ ៤០,៧២ ​ដុល្លារ​ក្នុង​មួយ​ធុង​ខណៈ​ប្រេងឆៅ​ប្រភេទ Brent សម្រាប់​ចែកចាយ​នៅ​ខែ​មករា​បាន​ធ្លាក់​ថ្លៃ ៨២ ​សេន​នៅ​តម្លៃ ៤៣,៨៤ ​ដុល្លារ​ក្នុង​មួយ​ធុង។

តម្លៃ​ប្រេង​ពិភពលោក​បាន​ធ្លាក់​ចុះ​ជាង​ពាក់កណ្តាល​ក្នុង​រយៈពេល​ ១៨ ​ខែ​ចុងក្រោយ​នេះ​ដោយសារ​ផលិតកម្ម​​ប្រេង​ពិភព​លោក​បាន​កើនឡើង​ខ្ពស់​ជាង​តម្រូវការ​ហើយ​ទីភ្នាក់ងារ​ថាមពល​អន្តរជាតិ​បាន​ព្យាករ​កាលពី​ថ្ងៃ​សុក្រ​ថា​តម្រូវការ​ប្រេង​នឹង​កើន​ ១,២ ​លាន​ធុង​នៅ​ឆ្នាំ​ក្រោយ។

កំណើន​ថ្លៃ​ប្រាក់​ដុល្លារ​ដែល​បាន​កើនឡើង​កាលពី​ចុង​សប្តាហ៍​ដោយសារ​ការ​អធិប្បាយ​របស់​សមាជិក​ធនាគារ​កណ្តាល​អាមេរិក​បាន​បន្ត​ប៉ះពាល់​តម្លៃ​ប្រេង​បន្ទាប់ពី​បាន​ធ្លាក់​ថ្លៃ​រយៈពេល​បី​សប្តាហ៍​រួច​ទៅ​ហើយ​នោះ​។

ការ​ឡើង​ថ្លៃ​ប្រាក់​ដុល្លារ​កាន់តែ​ខ្លាំង​បាន​កាត់​បន្ថយ​តម្រូវការ​ទំនិញ​គិត​ជា​ប្រាក់​ដុល្លារ​ដូចជា​ប្រេង​ជាដើម​ក្នុង​ចំណោម​អ្នក​កាន់កាប់​រូបិយប័ណ្ណ​ដែល​មាន​តម្លៃ​ថោក​ជាង​៕ BP

អត្ថបទគួរចាប់អារម្មណ៍