.jpg)
កម្មការិនីដេរសម្លៀកបំពាក់ដែលជាផលិតផលនាំចេញសំខាន់ទៅអង់គ្លេស។ ហុង មិនា
ភ្នំពេញៈ លោកស្រី Heather Wheeler ប្រេសិតពាណិជ្ជកម្មរបស់នាយករដ្ឋមន្ត្រីចក្រភពអង់គ្លេសប្រចាំកម្ពុជា ឡាវ និងវៀតណាមបានថ្លែងអះអាងថាលោកស្រីនឹងខិតខំកៀរគរវិនិយោគិន និងធុរជនអង់គ្លេសសិក្សាអំពីសក្តានុពលរបស់ប្រទេសកម្ពុជា ដើម្បីពង្រីកការវិនិយោគ និងធ្វើជំនួញជាមួយប្រទេសក្នុងតំបន់អាស៊ានមួយនេះឱ្យកាន់តែច្រើនបន្ថែមទៀត ដើម្បីទាញយកនូវផលចំណេញពីពន្ធអនុគ្រោះពាណិជ្ជកម្មដែលកម្ពុជាកំពុងទទួលបាន។
កម្ពុជាស្ថិតក្នុងចំណោមប្រទេសដែលមានការអភិវឌ្ឍតិចតួចទាំង ៤៦ ផ្សេងទៀតដែលបានទទួលការអនុគ្រោះពាណិជ្ជកម្ម (GSP) ពីចក្រភពអង់គ្លេស បន្ទាប់ពីក្រសួងពាណិជ្ជកម្មអន្តរជាតិអង់គ្លេសបានប្រកាសផ្តល់ឱ្យកាលពីថ្ងៃ ១៧ ខែ ធ្នូ ឆ្នាំ ២០២០។ អង់គ្លេសជាប្រទេសនាំចូលដ៏ធំបំផុតមួយរបស់កម្ពុជានៅសហគមន៍អឺរ៉ុបដែលមានចំណែកទីផ្សារប្រមាណជា ២៥ ទៅ ៣០ ភាគរយ នៃការនាំចេញសរុបទៅកាន់ទីផ្សារតំបន់មួយនេះ។
ប៉ុន្តែអង់គ្លេសបានសម្រេចចិត្តចាកចេញពីសមាជិកភាពតំបន់អឺរ៉ុបតាមរយៈប្រជាមតិកាលពីប៉ុន្មានឆ្នាំមុន។
ការលើកឡើងរបស់លោកស្រី Heather ក្នុងជំនួបពិភាក្សាការងារជាមួយលោក ប៉ាន សូរស័ក្តិ កាលពីថ្ងៃទី ១៨ ខែ កុម្ភៈ ឆ្នាំ ២០២១ តាមរយៈប្រព័ន្ធវីដេអូនៅទីស្តីការក្រសួងពាណិជ្ជកម្ម។
លោកស្រីបានកត់ស្គាល់អំពីភាពរីកចម្រើនកំណើនសេដ្ឋកិច្ចប្រចាំឆ្នាំ និងសក្តានុពលនាំចេញរបស់កម្ពុជា ព្រមទាំងកោតសរសើរចំពោះកិច្ចខិតខំប្រឹងប្រែងរបស់រាជរដ្ឋាភិបាលកម្ពុជាក្នុងការជួយសម្របសម្រួលប្រតិបត្តិការពាណិជ្ជកម្មរបស់ធុរជន និងវិនិយោគិនអង់គ្លេសនៅកម្ពុជានាពេលកន្លងមក។
លោកស្រីបញ្ជាក់ថា៖ «ខ្ញុំនឹងខិតខំប្រឹងប្រែងបន្តទាក់ទាញវិនិយោគិនអង់គ្លេសមកស្វែងយល់បន្ថែមពីសក្តានុពលដែលកម្ពុជាសម្រេចបាននាពេលបច្ចុប្បន្ន»។
លោកស្រីក៏បានគូសបញ្ជាក់អំពីផលប៉ះពាល់ដែលបណ្តាលមកពីការរីករាលដាលនៃជំងឺកូវីដ ១៩ មកលើវិស័យកាត់ដេរ និងវាយនភណ្ឌដែលជាសសរស្តម្ភមួយយ៉ាងសំខាន់សម្រាប់សេដ្ឋកិច្ចកម្ពុជា ហើយបានជម្រាបជូនលោករដ្ឋមន្ត្រីអំពីគម្រោងគាំទ្រពន្លឿនផ្នែកសេដ្ឋកិច្ច (Accelerated COVID Economic Support-ACES) ដែលផ្តល់ដោយរាជរដ្ឋាភិបាលអង់គ្លេសសម្រាប់ប្រទេសនៅអាស៊ាន។
ក្នុងជំនួបសន្ទនានោះលោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មបានអះអាងថា ចក្រភពអង់គ្លេសបានរួមចំណែកយ៉ាងសំខាន់ក្នុងការអភិវឌ្ឍធនធានមនុស្ស និងលើកស្ទួយសេដ្ឋកិច្ចកម្ពុជា តាមរយៈការផ្តល់ហិរញ្ញប្បទានដល់ការអភិវឌ្ឍវិស័យអាទិភាព ដូចជាវិស័យអប់រំ សេដ្ឋកិច្ច និងពាណិជ្ជកម្ម ព្រមទាំងតាមរយៈការផ្តល់ប្រព័ន្ធអនុគ្រោះពន្ធពាណិជ្ជកម្ម ដែលចូលជាធរមានចាប់ពីខែមករា ឆ្នាំ ២០២១ មកនេះ ក្រោយពីអង់គ្លេសចាកចេញពីសហភាព-អឺរ៉ុប។
លោករដ្ឋមន្ត្រីបញ្ជាក់ថា៖ «រាជរដ្ឋាភិបាលកម្ពុជាបានខិតខំប្រឹងប្រែងក្នុងការធ្វើកំណែទម្រង់ស្ថាប័ន និងបទប្បញ្ញត្តិនានាសម្រាប់ការធ្វើសមារណកម្មសេដ្ឋកិច្ច និងបង្ហាញឆន្ទៈដ៏មោះមុតក្នុងការពង្រីកដៃគូពាណិជ្ជកម្មតាមរយៈការបង្កើតកិច្ចព្រមព្រៀងពាណិជ្ជកម្មសេរីជាមួយដៃគូពាណិជ្ជកម្មសំខាន់ៗនៅក្នុងតំបន់»។
លោកក៏បានបង្ហាញអំពីការគាំទ្រចំពោះវឌ្ឍនភាពនៃកិច្ចការដៃគូសន្ទនារវាងចក្រភពអង់គ្លេស និងអាស៊ានដែលជាតំបន់មានសក្តានុពលដ៏ខ្លាំង ហើយបានជម្រាបភាគីអង់គ្លេសថាកម្ពុជានឹងធ្វើជាម្ចាស់ផ្ទះរៀបចំកិច្ចប្រជុំកំពូលអាស៊ី-អឺរ៉ុបលើកទី១៣ នៅឆ្នាំ ២០២១ និងធ្វើជាប្រធានកិច្ចប្រជុំកំពូលអាស៊ានលើកទី៤០ នៅឆ្នាំ ២០២២ ខាងមុខ។
យោងតាមរបាយការណ៍ពីក្រសួងសេដ្ឋកិច្ច និងហិរញ្ញវត្ថុ ទំហំពាណិជ្ជកម្មទ្វេភាគីរវាងកម្ពុជា និងចក្រភពអង់គ្លេសបានឈានដល់ ៨១៣,២២ លានដុល្លារ ក្នុងរយៈពេល ១១ ខែនៃឆ្នាំមុនគឺធ្លាក់ចុះ ១៧,៦១ ភាគរយ ពីចំនួន ៩៨៧,០៩ លានដុល្លារ ដែលកត់ត្រាក្នុងរយៈពេលដូចគ្នា។
ការនាំចេញរបស់កម្ពុជាក្នុងអំឡុងពេលនេះមានតម្លៃ ៧៦៦,៧៧ លានដុល្លារ ធ្លាក់ចុះ ១៦,០២ ភាគរយពី ៩១៣,០១ លានដុល្លារ។ ចំណែកការនាំចូលរបស់កម្ពុជាពីចក្រភពអង់គ្លេសមានតម្លៃ ៤៦,៤៥ លានដុល្លារ ក្នុងរយៈពេលដូចគ្នាកាលពីឆ្នាំមុនដោយធ្លាក់ចុះ ៣៧,៣០ ភាគរយ ធៀបនឹងរយៈពេលដូចគ្នាកាលពីឆ្នាំ ២០១៩ ដែលមាន ៧៤,០៨ លានដុល្លារ។
ក្រសួងពាណិជ្ជកម្មបានឱ្យដឹងថា ទំនិញភាគច្រើនរបស់កម្ពុជានាំចេញទៅកាន់ចក្រភពអង់គ្លេស រួមមាន សម្លៀកបំពាក់ ស្បែកជើង កង់ អង្ករ និងផលិតផលកសិកម្មផ្សេងៗទៀត ខណៈការនាំចូលពីចក្រភពអង់គ្លេសមកកម្ពុជាភាគច្រើនមានរថយន្ត និងគ្រឿងម៉ាស៊ីន៕ LA
