ភ្នំពេញ: បន្ទាប់ពីផ្អាកដំណើរការចាប់តាំងពីខែមីនា ដោយសារការរីករាលដាលជំងឺកូវីដ ១៩ ជាសកលមកប្រៃសណីយ៍កម្ពុជាដែលជាសហគ្រាសគ្រប់គ្រងដោយរដ្ឋបានប្រកាសបើកទទួលបញ្ញើឆាប់រហ័សឡើងវិញហើយ ដើម្បីបម្រើសេចក្តីត្រូវការរបស់អតិថិជនខ្លួន។
សេចក្តីប្រកាសព័ត៌មានចេញផ្សាយកាលពីសប្តាហ៍មុនបានឲ្យដឹងថា ប្រៃសណីយ៍កម្ពុជាបានចាប់ផ្តើមបើកទទួលបញ្ញើឆាប់រហ័ស (Express Mail Service) ជាធម្មតាឡើងវិញដែលនឹងចាប់ដំណើរការចាប់ពីថ្ងៃទី ៣ ខែសីហា តទៅ។
សេចក្តីប្រកាសព័ត៌មានបន្តថា ការទទួលបញ្ញើនេះទៅកាន់ប្រទេសមួយចំនួនក្នុងតំបន់អាស៊ីប៉ាស៊ីហ្វិករួមមាន អូស្ត្រាលី ចិន (ហុងកុង តៃវ៉ាន់) ជប៉ុន កូរ៉េ អ៊ីស្រាអែល សិង្ហបុរី អារ៉ាប់ UAE វៀតណាម និងថៃ។
ចំណែកឯប្រទេសនៅតំបន់អឺរ៉ុបរួមមាន អូទ្រីស បែលហ្ស៊ិក ដាណឺម៉ាក ហ្វាំងឡង់ ស្វ៊ីស បារាំង អាល្លឺម៉ង់ អ៊ីតាលី ហូឡង់ ន័រវែស ប៉ូឡូញ ស៊ុយអែត អង់គ្លេស និងអេស្ប៉ាញ ហើយក៏ទទួលបញ្ញើទៅតំបន់អាមេរិកខាងជើងមានសហរដ្ឋអាមេរិក និងកាណាដាផងដែរ។
កាលពីថ្ងៃទី ១២ ខែមីនា ប្រៃសណីយ៍កម្ពុជាបានសម្រេចផ្អាកការទទួលបញ្ញើគ្រប់ប្រភេទទៅអន្តរជាតិដោយសារការរាតត្បាតនៃជំងឺកូវីដ ១៩។
លោក អោក បូរ៉ា អគ្គនាយកប្រៃសណីយ៍កម្ពុជាបានប្រាប់ភ្នំពេញប៉ុស្តិ៍កាលពីថ្ងៃអង្គារថា ការបើកឲ្យដំណើរការទទួលបញ្ញើឡើងវិញនេះបន្ទាប់ពីប្រៃសណីយ៍កម្ពុជារកបានដៃគូថ្មីជាមួយក្រុមហ៊ុនដឹកជញ្ជូនតាមផ្លូវអាកាស។ តារាងតម្លៃបញ្ញើក្នុងអំឡុងពេលមានការរីករាលដាលជំងឺកូវីដ ១៩ នេះនឹងឡើងថ្លៃជាងមុនចំនួន ៨ ដុល្លារ ក្នុង ១ គីឡូក្រាម។
លោកបានឲ្យដឹងថា គ្រាន់តែ ១ ថ្ងៃនៃការបើកទទួលបញ្ញើភ្លាម ប្រៃសណីយ៍កម្ពុជាទទួលបានអតិថិជនយ៉ាងគំហុកចំនួន ៣៧៣ នាក់ និងទទួលបញ្ញើទម្ងន់ ២ ៨១០ គីឡូក្រាម។
លោកថ្លែងថា៖ «យើងរំពឹងថាចំណូលយើងនឹងរក្សាបានល្អ ឬក៏កើនឡើងជាងមុនដែលយើងរំពឹងថា ចំណូលនឹងទទួលបានក្នុងរង្វង់ ១ លានដុល្លារ ក្នុង ១ ខែ ដោយសារការបញ្ជាទិញទំនិញតាមអនឡាញមានការកើនឡើងច្រើនក្នុងអំឡុងពេលរីករាលដាលកូវីដ ១៩»។
បើតាមលោក បូរ៉ា ប្រៃសណីយ៍កម្ពុជារកចំណូលបានជាង ២,៦៥ លានដុល្លារ ក្នុងរយៈពេល ៦ ខែដើមឆ្នាំ ២០២០ ធ្លាក់ចុះ ៥៥,២៣ ភាគរយ បើធៀបនឹងរយៈពេលដូចគ្នាកាលពីឆ្នាំមុនដែលមានចំនួនជាង ៥,៩៣ លានដុល្លារ។
កាលពីឆ្នាំ ២០១៩ ប្រៃសណីយ៍កម្ពុជារកចំណូលបាន ១២ ២៣៧ ៤៥៩ ដុល្លារ កើនឡើងពី ៣ ៧៧១ ៥៩៨ ដុល្លារ កាលពីឆ្នាំ ២០១១។
ប្រៃសណីយ៍កម្ពុជាក៏បានរួមវិនិយោគលើធនាគារប្រៃសណីយ៍កម្ពុជាផងដែរ ដែលធនាគារនេះបានមើលឃើញប្រាក់ចំណេញជាង ៣៦,៥២ លានដុល្លារ ក្នុងប្រតិបត្តិការរយៈពេល ៥ ឆ្នាំ។ គ្រាន់តែនៅក្នុងឆ្នាំ ២០១៨ ធនាគារនេះរកប្រាក់ចំណេញបាន ១២,៨១ លានដុល្លារ។
ធនាគារប្រៃសណីយ៍កម្ពុជាត្រូវបានគ្រប់គ្រង ៥០ ភាគរយ ដោយធនាគារកាណាឌីយ៉ា ៤៥ ភាគរយ ដោយក្រុមហ៊ុន Fullerton និងភាគហ៊ុននៅសល់ត្រូវបានគ្រប់គ្រងដោយប្រៃសណីយ៍កម្ពុជា៕