The Phnom Penh Post Search

Search form




Logo of Phnom Penh Post newspaper Phnom Penh Post - ប្រៃសណីយ៍​កម្ពុជា​ពង្រឹង​សេវាកម្ម​បញ្ញើ

ប្រៃសណីយ៍​កម្ពុជា​ពង្រឹង​សេវាកម្ម​បញ្ញើ

ប្រៃសណីយ៍​កម្ពុជា​ពង្រឹង​សេវាកម្ម​បញ្ញើ

ភ្នំពេញៈ មន្រ្តី​ប្រៃសណីយ៍​កម្ពុជា​ឲ្យ​ដឹង​ថា ប្រៃសណីយ៍​កម្ពុជា​កំពុង​ពង្រឹង​សេវាកម្ម​បញ្ញើ​ក្នុង​ស្រុក​ដើម្បី​ប្រកួត​ប្រជែង​ជាមួយ​សេវាកម្ម​បញ្ញើ​ក្រៅ​ផ្លូវ​ការ។

ការ​ពង្រឹង​សេវាកម្ម​នោះ​រួម​មាន​ការ​បណ្តុះ​បណ្តាល​ជំនាញ​ដល់​បុគ្គលិក​ពង្រីក​បណ្តាញ​ការិយាល័យ​ប្រៃសណីយ៍​ដល់​កម្រិត​ស្រុក​ការ​បំពាក់​ប្រព័ន្ធ​បចេ្ចកវិទ្យា និង​ការ​ផ្សព្វ​ផ្សាយ​ដល់​មហាជន​អំពី​សេវាកម្ម​បញ្ញើ​ប្រៃសណីយ៍​កម្ពុជា។

លោក អោក បូរ៉ា នាយក​ប្រតិបត្តិ​ប្រៃសណីយ៍​កម្ពុជា បាន​ឲ្យ​ដឹង​ថា សេវា​បញ្ញើ​ក្នុង​ស្រុក​ក្រៅ​ផ្លូវការ​មាន​ដូចជា​រថយន្ត​ដឹក​អ្នក​ដំណើរ និង​រថយន្ត​តាក់ស៊ី​កំពុង​ស្រូប​ទាញ​ចំណូល​យ៉ាង​ច្រើន​ពី​អាជីវកម្ម​ប្រៃសណីយ៍​ក្នុង​ស្រុក។

លោក​បន្ត​ថា ភាព​ខ្វះខាត​ជំនាញ​របស់​បុគ្គលិក​កម្រិត​នៃ​ការ​ផ្សព្វផ្សាយ​ពី​សេវាកម្ម​បញ្ញើ​ក្នុង​ស្រុក​របស់​ប្រៃសណីយ៍​កម្ពុជា កំពុង​ប្រឈម​នឹង​ការ​ប្រកួត​ប្រជែង​ខ្លាំង​ពី​សេវា​បញ្ញើ​ក្រៅ​ផ្លូវ​ការ​ដែល​មាន​ភាព​រហ័ស​និង​ងាយ​ស្រួល​ជាង។

បើ​តាម​របាយ​ការណ៍​ប្រចាំ​ឆ្នាំ​ប្រៃសណីយ៍​កម្ពុជា ក្នុង ឆ្នាំ​២០១៣ រក​ចំណូល​សរុប​បាន ៤,៥ លាន​ដុល្លារ​កើន ១២,៥ ភាគរយ​ធៀប​នឹង ឆ្នាំ​២០១២។ របាយ​ការណ៍​បង្ហាញ​ថា ចំណូល​ពី​ការ​ប្រើ​ប្រាស់​សេវាកម្ម​បញ្ញើ​ក្នុង​ស្រុក​មាន​ត្រឹម ០,០១ ភាគរយ​នៃ​ចំណូល​សរុប​ប៉ុណ្ណោះ។

លោក​ថ្លែង​ថា៖ «ប្រាក់​ចំណូល​យើង​ឆ្នាំ​នេះ​កើន​តែ​ចំណេញ​បាន​តិច​ដោយ​សារ​យើង​ដំឡើង​ប្រាក់​ខែ​បុគ្គលិក ហើយ​ម៉្យាង​យើង​ក៏​ជួប​នឹង​ការ​ប្រកួត​ប្រជែង​ច្រើន។ សូម្បី​តែ​ឡាន​តាក់ស៊ី​ក៏​ដឹក​ជញ្ជូន​សំបុត្រ​របស់​ប្រៃសណីយ៍​ដែរ។ យើង​មាន​ច្បាប់​ប៉ុន្តែ​មិន​មាន​ការ​អនុវត្ត»។ លោក អោក បូរ៉ា បាន​ឲ្យ​ដឹង​ថា ការ​ប្រើ​សេវាកម្ម​បញ្ញើ​របស់​ប្រៃសណីយ៍​កម្ពុជា មាន​ហានិភ័យ​តិច​ជាង​បញ្ញើ​ក្រៅ​ផ្លូវ​ការ។

ដើម្បី​ក្លាយ​ជា​អ្នក​ទទួល​បញ្ញើ​សំបុត្រ​ឯកសារ​ស្រប​ច្បាប់ ក្រុមហ៊ុន​បម្រើ​សេវា​ដឹក​ជញ្ជូន​ត្រូវ​តែ​មាន​អាជ្ញាប័ណ្ណ​ជា​អ្នក​ទទួល​និង​ចែក​ចាយ​បញ្ញើ​សំបុត្រ​ឬ​ឯកសារ​មុន​នឹង​មាន​សិទ្ធិ​ទទួល​និង​ចែក​ចាយ​បញ្ញើ​សំបុត្រ​ឬ​ឯកសារ។

លោក សុខ ចាន់មុនី ប្រធាន​សមាគម​រថយន្ត​ក្រុង​កម្ពុជា (CAMBA) បាន​និយាយ​ថា កន្លង​មក​ការ​ទទួល​ជា​បញ្ញើ​សំបុត្រ ឬ​ឯកសារ​ផ្សេងៗ​ភាគ​ច្រើន​ជា​ការ​យល់​ព្រម​រវាង​អ្នក​ផ្ញើ និង​អ្នក​បើកបរ​ប៉ុណ្ណោះ។

លោក​បន្ត​ថា អតិថិជន​ផ្ញើ​សំបុត្រ ឯកសារ ឬ​ទំនិញ​ផ្សេងៗ​តាម​សេវាកម្ម​បញ្ញើ​ក្រៅ​ផ្លូវ​ការ ក៏​ព្រោះ​រថយន្ត​ដឹក​ជញ្ជូន ឬ​រថយន្ត​តាក់ស៊ី អាច​ចែក​ចាយ​បញ្ញើ​បាន​លឿន​រហ័ស និង​បត់​បែន​ជាង​សេវាកម្ម​របស់​ប្រៃសណីយ៍​កម្ពុជា។

លោក​ថ្លែង​ថា៖ «គេ​ដឹក​ទៅ​ដល់​កន្លែង ទៅ​ដល់​ស្រុក និង​ភូមិ​ឃុំ​ដែល​ប្រៃសណីយ៍​ទៅ​មិន​ដល់។ ប្រសិន​បើ ប្រៃសណីយ៍​អាច​ទៅ​ដល់​តាម​ស្រុក​ភូមិ​ដែរ​នោះ​ខ្ញុំ​ជឿ​ថា​ឡាន​ក្រុង ឬ​តាក់ស៊ី មិន​ហ៊ាន​រត់​សេវា​នេះ​ទេ»៕

អត្ថបទគួរចាប់អារម្មណ៍