បាត់ដំបងៈ បរិមាណទិន្នផលដំឡូងមីតាមបណ្តាខេត្តជាប់ព្រំដែនជាមួយប្រទេស ថៃ បានធ្លាក់ចុះនៅក្នុងរដូវប្រមូលផល ឆ្នាំ ២០១៨-២០១៩ ខណៈតម្លៃមិនមានការប្រែប្រួលអ្វីគួរឲ្យកត់សម្គាល់នោះទេ។ នេះបើតាមមន្ត្រីកសិកម្មខេត្ត។
ជាទូទៅកសិករបានចាប់ផ្តើមប្រមូលផលដំឡូងមីចាប់ពីខែវិច្ឆិកា រហូតដល់ ខែកុម្ភៈ នៃរដូវកាលប្រមូលផលក្នុងឆ្នាំនីមួយៗ បន្ទាប់ពីការធ្វើការដាំដុះនៅក្នុងខែឧសភា។
បាត់ដំបង ជាខេត្តដែលមានការដាំដុះដំឡូងមីដ៏ធំមួយនៅភាគពាយព្យប្រទេស កម្ពុជា ប៉ុន្តែការដាំដុះនៅក្នុងឆ្នាំ ២០១៨ បានធ្លាក់ចុះគួរឲ្យកត់សម្គាល់។
លោក គឹម ហួត ប្រធានមន្ទីរពាណិជ្ជកម្មខេត្តបាត់ដំបង បានឲ្យដឹងថា ការធ្លាក់ចុះនៃការដាំដុះនេះ ដោយសារតែកសិករភាគច្រើនបានផ្លាស់ប្តូរការដាំដុះទៅតាមចរន្តទីផ្សារ។
លោកថ្លែងថា៖ «ជាធម្មតាដីសម្រាប់ដាំដំឡូងមី និងពោតក្រហមក្នុងខេត្តបាត់ដំបង តែងតែត្រូវកសិករប្រើចម្រុះគ្នា គឺនៅពេលណាតម្លៃដំឡូងមីឡើងខ្ពស់ ពួកគាត់នាំគ្នាដាំដំឡូងមី ពេលតម្លៃពោតក្រហមឡើងខ្ពស់ពួកគាត់នាំគ្នាដាំពោត»។ លោកបន្តថា ដោយសារកាលពីឆ្នាំ ២០១៨ កន្លងមកពោតមានតម្លៃខ្ពស់ ហេតុនេះផ្ទៃដីមួយចំនួនត្រូវបានកសិករយកទៅដាំពោត ជាហេតុធ្វើឲ្យទិន្នផលដំឡូងមីថយចុះ។
យោងតាម លោក គឹម ហួត នៅពេលថ្មីៗនេះក៏មានកសិករពី ២០-៣០ ភាគរយកំពុងប្រែក្លាយដីទៅដាំដំណាំរយៈពេលវែង ដែលមានដូចជា ផ្លែមៀន និងស្វាយ ផងដែរ។
លោក គឹម ហួត បានឲ្យដឹងទៀតថា ទិន្នផលដំឡូងមីនៅក្នុងខេត្តបាត់ដំបងប្រមាណ ៨០ ភាគរយត្រូវបាននាំយកទៅលក់នៅប្រទេស ថៃ ខណៈប្រមាណ ២០ ភាគរយទៀតត្រូវបានឈ្មួញដឹកយកទៅលក់នៅវៀតណាម។
សម្រាប់ទិន្នផលដំឡូងមី នៅក្នុងខេត្តបាត់ដំបង ដែលប្រមូលបានក្នុងរដូវកាលឆ្នាំ ២០១៨-២០១៩ នេះមានការធ្លាក់ចុះប្រហែលពាក់កណ្តាល បើធៀបនឹងរដូវកាលឆ្នាំ ២០១៧-២០១៨។
លោក គឹម ហួត ថ្លែងថា៖ «ដោយសារទិន្នផលប្រមូលបានក្នុងឆ្នាំនេះធ្លាក់ចុះនោះ បានធ្វើឲ្យតម្លៃកើនឡើងតិចតួចបើធៀបនឹងឆ្នាំមុន»។
ទិន្នន័យពីមន្ទីរពាណិជ្ជកម្មខេត្តបាត់ដំបង បានបង្ហាញថា ដំឡូងមីស្រស់ត្រូវបានកសិករលក់ក្នុងតម្លៃជាមធ្យម ២៧០ រៀលក្នុង ១ គីឡូក្រាម ខណៈដំឡូងមីស្ងួតមានតម្លៃ ៦៥០ រៀលដែលតម្លៃនេះប្រហាក់ប្រហែលទៅនឹងឆ្នាំ ២០១៧ ដែរ។
សម្រាប់រដូវប្រមូលផលឆ្នាំ ២០១៨-២០១៩ ខេត្តបាត់ដំបង ប្រមូលផលដំឡូងមីបានប្រមាណជាង ២ លានតោន ខណៈកាលពីរដូវកាលឆ្នាំ ២០១៧-២០១៨ ប្រមូលផលបានជិត ៥ លានតោន។ នេះបើយោងតាមទិន្នន័យពីមន្ទីរពាណិជ្ជកម្មខេត្ត។
យោងតាមតួលេខ ពីមន្ទីរកសិកម្ម ខេត្ត នៅរដូវកាលឆ្នាំ ២០១៨-២០១៩ នេះខេត្តបាត់ដំបង មានផ្ទៃដីដាំដុះដំឡូងមី ១១៣ ៤៩៨ ហិកតា ដែលក្នុង ១ ហិកតា ផ្តល់ទិន្នផលប្រមាណ ២៤,៦ តោន។
លោកស្រី ឆាយ សុភា ឈ្មួញនៅក្នុងស្រុកភ្នំព្រឹក ខេត្តបាត់ដំបង ដែលប្រមូលទិញដំឡូងមីពីកសិករ បាននិយាយថា បើទោះបីជាផលដំឡូងមី នៅឆ្នាំនេះមានបរិមាណតិចជាងឆ្នាំមុនក៏ដោយ ក៏តម្លៃមិនបានកើនឡើងខ្ពស់នោះទេ។ លោកស្រីបញ្ជាក់ថា៖ «ខ្ញុំទិញដំឡូងមីពីកសិករក្នុងតម្លៃមួយ ដែលអាចឲ្យខ្ញុំយកទៅលក់បន្តឲ្យឈ្មួញមកពីប្រទេស ថៃ បាន»។
ដោយឡែក លោក ថុន មិថុនា អនុប្រធានការិយាល័យក្សេត្រសាស្រ្ត និងផលិតភាពកសិកម្ម នៃមន្ទីរកសិកម្មខេត្តប៉ៃលិន បានប្រាប់ថា សម្រាប់ស្ថានភាពជាទូទៅនៃការបង្កបង្កើនផលដំឡូងមីនៅខេត្តប៉ៃលិននារដូវកាលឆ្នាំ ២០១៨-២០១៩ មានភាពល្អប្រសើរជាងឆ្នាំកន្លងមក។
លោកបន្តថា តាមការប៉ាន់ស្មាន ទិន្នផលឆ្នាំ ២០១៨-២០១៩ អាចនឹងទទួលជាង ១,២ លានតោន ខណៈកាលពីឆ្នាំ ២០១៧-២០១៨ បាន ១ លានតោន។
លោកបានអះអាងថា៖ «សម្រាប់រដូវកាលប្រមូលផលដំឡូងមីនៅខេត្តប៉ៃលិនឆ្នាំនេះ ខ្ញុំអាចនិយាយថា មានភាពល្អប្រសើរជាងរដូវកាលមុន ពិសេសកំណើនទិន្នផល»។
ទិន្នន័យពីមន្ទីរកសិកម្មខេត្តប៉ៃលិន បង្ហាញថា ក្នុងឆ្នាំ ២០១៨ ខេត្តប៉ៃលិន មានផ្ទៃដីដាំដំឡូងមី ៤៤ ៩០៥ ហិកតា កើនពី ៤០ ២០០ ហិកតា កាលពីឆ្នាំ ២០១៧។
តម្លៃជាមធ្យមដែលកសិករលក់នៅខេត្តប៉ៃលិន គឺ ២៩០ រៀលក្នុង ១ គីឡូក្រាមសម្រាប់ដំឡូងស្រស់ ខណៈដំឡូងមីស្ងួត មានតម្លៃ ៧១០ រៀល កើនពី ៣២០ រៀល និង ៧០០ រៀល កាលពីឆ្នាំ ២០១៧។
តួលេខក្រសួងកសិកម្ម រុក្ខាប្រមាញ់ និងនេសាទ កាលពីឆ្នាំ ២០១៧ បង្ហាញថា ការដាំដុះដំឡូងមីនៅកម្ពុជាបានកើនឡើងដល់ ៦១៤ ០០០ ហិកតា ដោយផ្ដល់បរិមាណផលប្រមាណ ១៣ ៨១៧ ០០០ តោន៕LA