តម្លៃប្រេងឆៅបានធ្លាក់ចុះចាប់តាំងពីថ្ងៃចន្ទសប្តាហ៍នេះ ដោយប្រែប្រួលក្នុងចន្លោះតម្លៃពី ៥៩,៦០ ទៅ ៦១ ដុល្លារ ក្នុង ១ បារ៉ែល ខណៈពេលដែលប្រទេសសេដ្ឋកិច្ចសំខាន់មួយចំនួននៅអឺរ៉ុបត្រូវបានបន្ដបិទប្រទេសរបស់ខ្លួន ដើម្បីគ្រប់គ្រងស្ថានភាពនៃផលប៉ះពាល់នៃជំងឺកូវីដ ១៩ រលកទី៣ ហើយការអនុវត្ដនេះ បាននិងកំពុងជះឥទ្ធិពលយ៉ាងខ្លាំងទៅលើការជំរុញសេដ្ឋកិច្ចរបស់ពួកគេ។
យោងតាមអត្ថបទចេញផ្សាយដោយ OilPrice.com កាលពីថ្ងៃទី ២៣ ខែមីនា ការបិទប្រទេសនៅអឺរ៉ុបបានជំរុញឱ្យមានការព្រួយបារម្ភអំពីការប្រមូលផលិតផល និងតម្រូវការប្រេង សម្រាប់រយៈពេលប៉ុន្មានសប្តាហ៍ខាងមុខនេះ។ ការកើនឡើងនូវចំនួនករណីឆ្លងវីរុសកូរ៉ូណានៅលើពិភពលោក និងផលប៉ះពាល់នៃរលកទី៣ នៅក្នុងតំបន់អឺរ៉ុបបានកាត់បន្ថយឱកាសនៃការស្តារសេដ្ឋកិច្ចឱ្យបានឆាប់រហ័ស និងមានការប្រើប្រាស់ថាមពលកម្រិតទាបនៅក្នុងតំបន់។
ជាក់ស្ដែង ប្រទេសអាល្លឺម៉ង់ ដែលជាប្រទេសមានសេដ្ឋកិច្ចធំជាងគេនៅអឺរ៉ុប កំពុងបន្ដបិទប្រទេសរបស់ខ្លួនរហូតដល់ថ្ងៃទី ១៨ ខែមេសា។ ដូចគ្នាដែរ រដ្ឋាភិបាលបារាំងក៏បានពង្រឹងការអនុវត្តវិធានការតឹងរ៉ឹងជាងមុន ដើម្បីឱ្យផលប៉ះពាល់កើតមានទាបបំផុត។ ប៉ុន្ដែវិធានការបិទប្រទេសនេះ នឹងធ្វើឱ្យតម្រូវការប្រេងធ្លាក់ចុះនៅអឺរ៉ុប និងអាចជាក្តីកង្វល់ដល់ទីផ្សារសម្រាប់រយៈពេលវែង។
នៅថ្ងៃទី ១ ខែមេសា កិច្ចប្រជុំ OPEC-JMMC បានពិភាក្សាអំពីបញ្ហាជាច្រើនទាក់ទងនឹងទីផ្សារថាមពល ជាពិសេសបរិមាណប្រេងដែលពួកគេនឹងផលិត ហើយត្រូវបានគេរំពឹងថា អង្គការ OPEC នឹងគ្រប់គ្រងផលិតកម្មប្រេងរបស់ខ្លួនឱ្យបានល្អ។ ប៉ុន្ដែ ការប្ដេជ្ញានេះបានត្រឹមតែធ្វើឱ្យពាណិជ្ជករប្រេងឈរនៅម្ខាងសិន និងឃ្លាំចាំមើលសញ្ញាដែលអាចផ្តល់ជាតម្រុយដល់យុទ្ធសាស្ត្ររបស់អង្គការ OPEC នៅពេលដែលក្រុមនេះព្យាយាមរក្សាទីផ្សារឱ្យមានតុល្យភាព និងតម្លៃនៅកម្រិតល្អបំផុត។
សម្រាប់ផ្នែកបច្ចេកទេសវិញ តម្លៃប្រេងបានប្រែប្រួលក្នុងចន្លោះ ៥៧,៣០ ទៅ ៦២ ដុល្លារ ក្នុង ១ បារ៉ែល ក្នុងខែនេះ។ ជាមួយនឹងតម្លៃជាមធ្យមប្រចាំថ្ងៃប្រហែល ៣,២០ ដុល្លារ អ្នកជួញដូរគួរលក់ប្រេងនៅតម្លៃ ៦២ ដុល្លារ ដោយកំណត់មុខងារយកប្រាក់ចំណេញនៅតម្លៃ ៦០,៨០ ដុល្លារ និងមុខងារបញ្ឈប់ហានិភ័យនៅតម្លៃ ៦២,៨០ ដុល្លារ ក្នុង ១ បារ៉ែល៕