.jpg)
បច្ចេកទេសនៃការប្រើតង់ជារង្វង់មូលសម្រាប់ចិញ្ចឹមត្រី។ រូបថត សហការី
ភ្នំពេញៈ ផលនេសាទប្រមូលបានក្នុងឆ្នាំ ២០២០ នេះត្រូវរំពឹងថា នឹងមានចំនួនជាង ៩៣ ម៉ឺនតោន កើនប្រមាណ ៣ ភាគរយ បើធៀបនឹងរយៈពេលដូចគ្នាឆ្នាំ ២០១៩ ក្នុងនោះផលពីវារីវប្បកម្មមានកំណើនជាង ៣០ ភាគរយ។ នេះបើយោងតាមទិន្នន័យពីរដ្ឋបាលជលផលនៃក្រសួងកសិកម្ម រុក្ខាប្រមាញ់ និងនេសាទ។
ទិន្នន័យបង្ហាញថា ក្នុងឆ្នាំ ២០២០ នេះការប្រមូលផលនេសាទសរុបនឹងបានចំនួន ៩៣៦ ៣០០ តោន កើនឡើង ៣,០៦ ភាគរយ ពីចំនួន ៩០៨ ៥០៨ តោនក្នុងឆ្នាំ ២០១៩។ សម្រាប់ឆ្នាំនេះផលវារីវប្បកម្មមានចំនួន ៤០០ ៤០០ តោន កើន ៣០,២៥ ភាគរយ ពីចំនួន ៣០៧ ៤០៨ តោន កាលពីឆ្នាំ ២០១៩ ចំណែកផលនេសាទសមុទ្រមានចំនួន ១២២ ៧០០ តោន កើនឡើង ០,៣៧ ភាគរយពីចំនួន ១២២ ២៥០ តោន និងផលនេសាទទឹកសាប (ផលនេសាទដាយត្រី ផលនេសាទក្នុងដែននេសាទ និងផលនេសាទតាមវាលស្រែ) មានចំនួនសរុប ៤១៣២០០ តោន ធ្លាក់ចុះ ១៣,៧១ ភាគរយពីចំនួន ៤៧៨ ៨៥០ តោន។
ក្នុងពេលចុះទៅពិនិត្យសកម្មភាពនៃការទិញត្រីធ្វើផ្អក ប្រហុក ត្រីងៀត និងត្រីឆ្អើរនៅក្នុងស្រុកពញាឮ ខេត្តកណ្តាលកាលពីថ្ងៃអង្គារ លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទបាននិយាយថា ផលនេសាទសរុបក្នុងឆ្នាំ ២០២០ នេះនឹងមានកំណើនតិចតួចធៀបនឹងឆ្នាំមុន ដោយក្នុងនោះផលពីការចិញ្ចឹមលក្ខណៈវារីវប្បកម្ម កំពុងបំពេញតួនាទីយ៉ាងសំខាន់ក្នុងការផ្គត់ផ្គង់ឱ្យទីផ្សារក្នុងស្រុក ដោយមានកំណើនរហូតដល់ជាង ៣០ ភាគរយ។
លោកថ្លែងថា៖ «តួលេខនេះបញ្ជាក់យ៉ាងច្បាស់ថា អនុវិស័យវារីវប្បកម្មបាននិងកំពុងបំពេញតួនាទីយ៉ាងសំខាន់ក្នុងការផ្គត់ផ្គង់ឱ្យទីផ្សារក្នុងស្រុកជំនួសឱ្យផលនេសាទដាយត្រី និងផលនេសាទក្នុងដែននេសាទ ស្របតាមបំណងប្រាថ្នារបស់សម្តេចតេជោ គឺត្រូវជំរុញផលិតកម្មស្បៀងតាមរយ:ការចិញ្ចឹមត្រីជាលក្ខណៈគ្រួសារ»។
លោកលើកឡើងទៀតថា សម្រាប់ផលនេសាទទឹកសាបឆ្នាំនេះ គឺអាចមានកម្រិតទាបជាងឆ្នាំមុនប្រមាណ ១៣ ភាគរយដែលការធ្លាក់ចុះនេះ គឺដោយសារកម្ពស់ទឹកជំនន់ទន្លេមេគង្គស្ថិតក្នុងកម្រិតទាប ហើយតាមលក្ខណៈបច្ចេកទេស រួមទាំងវិសាលភាពនៃទឹកជំនន់ក្នុងបឹងទន្លេសាប ការប្រែប្រួលអាកាសធាតុ រដ្ឋបាលជលផលព្យាករថា ផលនេសាទទឹកសាបឆ្នាំនេះអាចទាបជាងឆ្នាំ ២០១៩។
លោក ផន រ៉ានី ម្ចាស់កសិដ្ឋានចិញ្ចឹមត្រី ស៊ី អេ អិន ដែលមានផ្ទៃដីប្រហែល ២ ហិកតា ក្នុងស្រុកមេសាង ខេត្តព្រៃវែង បានប្រាប់ ភ្នំពេញ ប៉ុស្តិ៍ នាថ្ងៃទី ២៣ ខែធ្នូ ថា ការចិញ្ចឹមត្រីជាលក្ខណៈគ្រួសារនៅកម្ពុជាបានស្ទុះឡើងយ៉ាងគំហុកក្នុងឆ្នាំ ២០២០ នេះ។ ជាក់ស្តែងកសិដ្ឋានរបស់លោកបានទទួលការបញ្ជាទិញកូនត្រីជាបន្តបន្ទាប់ ដែលជំរុញឱ្យលោកគ្រោងពង្រីកផ្ទៃដីចិញ្ចឹមកូនត្រីបន្ថែមទៀតនៅឆ្នាំក្រោយ។
លោកបន្តថា កំណើនការចិញ្ចឹមនៅពេលនេះ គឺកើតឡើងចំពេលដែលកម្ពុជាកំពុងជួបប្រទះនឹងការរីករាលដាលនៃជំងឺកូវីដ១៩ ខណៈរដ្ឋាភិបាលក៏កំពុងលើកទឹកចិត្តឱ្យមានការចិញ្ចឹមត្រីក្នុងស្រុកដើម្បីធានាបានសុវត្ថិភាពស្បៀងអាហារផងដែរ។
លោកបន្ថែមថា៖ «ឆ្នាំនេះការចិញ្ចឹមត្រីកើនច្រើន ប៉ុន្តែសម្រាប់តម្លៃកូនត្រីពូជវិញមិនបានកើនឡើងទេ។ ជាមួយស្ថានភាពដូចនេះ ខ្ញុំគិតថា ការចិញ្ចឹមត្រីលក្ខណៈគ្រួសារនឹងកើនកាន់តែច្រើននៅឆ្នាំក្រោយ ដែលវានឹងចូលរួមចំណែកលើកកម្ពស់ជីវភាពប្រជាជន និងកាត់បន្ថយការនាំចូលផងដែរ» ។
លោកប្រាប់ថា កំណើនការចិញ្ចឹមត្រីពេលនេះក៏ដោយសារការចិញ្ចឹមត្រីនាពេលបច្ចុប្បន្នគឺគេមិនចាំបាច់ត្រូវជីកស្រះដូចមុនទៀតទេ ដោយគេអាចចិញ្ចឹមវាក្នុងតង់ (Biofloc) បាន។
យោងតាមលោក រ៉ានី បើទោះបីជាបច្ចុប្បន្នមានកសិដ្ឋានចិញ្ចឹមត្រី និងកន្លែងលក់កូនត្រីច្រើនកន្លែងក៏ដោយ ក៏សកម្មភាពនាំចូលកូនត្រីពីប្រទេសវៀតណាមមកកម្ពុជា គឺនៅតែមានចំនួនច្រើនតោនផងដែរជារៀងរាល់ថ្ងៃ។
ម្ចាស់កសិដ្ឋានចិញ្ចឹមត្រីមួយកន្លែងស្ថិតក្នុងស្រុកពញាក្រែក ខេត្តត្បូងឃ្មុំ លោក សុង សីហា បាននិយាយថា និន្នាការចិញ្ចឹមត្រីជាលក្ខណៈគ្រួសារកំពុងកើនឡើង ហេតុដូច្នេះទើបលោកគ្រោងពង្រីកកន្លែងចិញ្ចឹមឱ្យធំទៀតនៅរដូវវស្សាឆ្នាំក្រោយ។
លោកបន្តថា មុនឆ្នាំ ២០២០ ក្នុង ១ ឆ្នាំ លោកអាចលក់កូនត្រីបានជាមធ្យម ៥ តោន ខណៈក្នុងឆ្នាំ ២០២០ នេះជាមធ្យមកន្លែងលោកលក់បានចន្លោះពី ១៥ ទៅ ២០ តោន។ លោកបន្តថា៖ «ផលត្រីចិញ្ចឹមនឹងកើនខ្ពស់ចាប់ពីពេលនេះតទៅ ព្រោះបច្ចេកទេសចិញ្ចឹមត្រី វាមិនមានភាពស្មុគស្មាញទេ»។
លោកប្រាប់ទៀតថា បច្ចុប្បន្នកសិដ្ឋានរបស់លោកមានផ្ទៃដីប្រមាណ ១ ហិកតា ហើយ ២-៣ ខែទៀតលោកនឹងពង្រីកផ្ទៃដីចិញ្ចឹមបន្ថែមទៀតដើម្បីឆ្លើយតបនឹងតម្រូវការទីផ្សារ»។
ម្ចាស់កសិដ្ឋានចិញ្ចឹមត្រីក្នុងស្រុកពញាក្រែក ខេត្តត្បូងឃ្មុំ និងជាអ្នកនាំចូលកូនត្រីពីប្រទេសវៀតណាមមកចែកចាយលើទីផ្សារកម្ពុជា លោក វ៉ាន់ ឆេង បាននិយាយថា កំណើនតម្រូវការកូនត្រីបានកើនឡើងយ៉ាងខ្ពស់នៅក្នុងអំឡុងពេលការរីករាលដាលជំងឺកូវីដ ១៩ ដោយកាលពីឆ្នាំមុនកន្លែងលោកលក់កូនត្រីប្រមាណជាង ១០ តោន ក្នុង ១ ឆ្នាំ ប៉ុន្តែឆ្នាំនេះបានរហូតដល់ជិត ១០០ តោន។
ទោះយ៉ាងណាលោកក៏បានស្នើឱ្យរដ្ឋាភិបាលជួយរកទីផ្សារផងដែរ ខណៈបច្ចុប្បន្នមានអ្នកចិញ្ចឹមជាច្រើនរអ៊ូថា៖ «រដ្ឋជំរុញ និងលើកទឹកចិត្តឱ្យមានការចិញ្ចឹមត្រី ប៉ុន្តែនៅពេលប្រមូលផលតែងតែពិបាករកទីផ្សារ»៕
