ក្រុងប៉េកាំងៈ សកម្មភាពរោងចក្រប្រចាំខែវិច្ឆិកាក្នុងប្រទេស ចិន បានស្ទុះងើបឡើងវិញជាលើកដំបូងក្នុងរយៈពេល ៧ ខែ បើទោះជាមានការកើនឡើងការគំរាមកំហែងដកហូតពន្ធគយថ្មីរបស់អាមេរិកក្នុងពេលប៉ុន្មានសប្តាហ៍ខាងមុខ ប្រសិនបើទីក្រុងប៉េកាំង និងទីក្រុងវ៉ាស៊ីនតោនបរាជ័យក្នុងការចុះហត្ថលេខាលើកិច្ចព្រមព្រៀងពាណិជ្ជកម្មដោយផ្នែកមួយក្តី។
ទិន្នន័យផ្លូវការដែលចេញផ្សាយដោយការិយាល័យស្ថិតិជាតិ (NBS) របស់ប្រទេសចិនបានបង្ហាញថា សន្ទស្សន៍អ្នកបញ្ជាក់ទិញ PMI ដែលត្រូវបានគេឃ្លាំមើលយ៉ាងដិតដល់ និងជាសូចនាករសំខាន់មួយដើម្បីតាមដានសកម្មភាពផលិតកម្មរបស់រោងចក្រក្នុងប្រទេសចិនបានកើនឡើងដល់ ៥០,២ នៅខែវិច្ឆិកាកើនឡើងពី ៤៩,៣ កាលពីខែមុន។
តួលេខនេះកើនខ្ពស់ជាងតួលេខ ៥០ ដែលជាកម្រិតសម្រាប់បែងចែងរវាងការកើនឡើង និងការធ្លាក់ចុះ។
សន្ទស្សន៍រងមួយនៃការបញ្ជាទិញនាំចេញថ្មីបានកើនឡើងដល់ ៤៨,៨ ដែលជាតួលេខខ្ពស់បំផុតក្នុងរយៈពេល ៧ ខែ ប៉ុន្តែនៅតែស្ថិតក្នុងតួលេខធ្លាក់ចុះ ដោយសារតម្រូវការថយចុះសម្រាប់ការនាំចេញទៅប្រទេស។
លោក Ting Lu ប្រធានសេដ្ឋវិទូប្រចាំធនាគារវិនិយោគ Nomura បានថ្លែងថា ការកើនឡើងសន្ទស្សន៍ផលិតកម្មផ្លូវការ PMI មិនមែនតំណាងឲ្យការស្ទុះងើបឡើងវិញនៃសេដ្ឋកិច្ចនោះទេ។
លោក Lu បានប្រសាសន៍ថា៖ «ការកើនឡើងសន្ទស្សន៍ផលិតកម្ម PMI ពី ៤៩,២ នៅខែកុម្ភៈដល់ ៥០,៥ នៅខែមីនាឆ្នាំនេះបានធ្វើឲ្យទីផ្សារទាំងមូលមានការរីករាយយ៉ាងខ្លាំងអំពីការស្ទុះងើបឡើងវិញខ្លាំងមួយ ប៉ុន្តែវាបានប្រែក្លាយទៅជាភាពស្រពេចស្រពិលទៅវិញ»។
លោកបន្តថា៖ «ពេលនេះមិនមានអ្វីខុសគ្នាឡើយ»។
តួលេខសន្ទស្សន៍នេះកើតមានឡើង ខណៈទីផ្សារប៉េកាំង និងទីក្រុងវ៉ាស៊ីនតោនបានងាកទៅរកកិច្ចព្រមព្រៀងដោយផ្នែកមួយចំពោះសង្គ្រាមពាណិជ្ជកម្មដែលបានអូសបន្លាយពេលជិត ២០ ខែមកហើយ។
អ្នកចរចាកំពូលរបស់ចិន និងអាមេរិកបានពិភាក្សាតាមទូរស័ព្ទកាលពីថ្ងៃអង្គារសប្តាហ៍មុន និងបានព្រមព្រៀងរក្សាការទាក់ទងគ្នាជុំវិញ «បញ្ហាដែលនៅសល់» សម្រាប់កិច្ចព្រមព្រៀង «ដំណាក់កាលទី ១» រវាងប្រទេសទាំងនេះ៕ KC