.jpg)
ទិដ្ឋភាពរោងចក្រផលិតស៊ីម៉ងត៍មួយកន្លែងក្នុខេត្តកំពត ដែលបានបើកដំណើរការនាពេលកន្លងមក។ រូបថត ហ៊ឹន ពិសី
ភ្នំពេញៈ រោងចក្រផលិតស៊ីម៉ងត៍ថ្មីមួយទៀតគ្រោងនឹងដាក់ឲ្យដំណើរការក្នុងខេត្តកំពតនៅខែក្រោយ ដែលនឹងធ្វើឲ្យការផលិតស៊ីម៉ងត៍ក្នុងស្រុកកើនដល់ជាង ៨ លានតោនក្នុងមួយឆ្នាំ។
រោងចក្រផលិតស៊ីម៉ងត៍របស់ក្រុមហ៊ុន ថៃប៊ុនរ៉ុង (Thai Boon Roong Cement Co., Ltd) ដែលមានទីតាំងស្ថិតក្នុងភូមិល្អាង ឃុំល្អាង ស្រុកដងទង់ ខេត្តកំពត គ្រោងនឹងបើកដំណើរការជាផ្លូវការនៅខែក្រោយដោយលោកនាយករដ្ឋមន្ត្រី ហ៊ុន សែន។ នេះបើតាមលោក ជាវ តាយ អភិបាលខេត្តកំពត។
បច្ចុប្បន្ននៅខេត្តកំពតមានរោងចក្រផលិតស៊ីម៉ងត៍ចំនួន ៣ កំពុងបើកដំណើរការជាផ្លូវការ ហើយការដាក់ឲ្យដំណើរការរោងចក្រថ្មីមួយទៀតនេះនឹងធ្វើឲ្យសមត្ថភាពផលិតតែនៅក្នុងខេត្តកំពតមួយមានរហូតដល់ ១៧ ០០០ តោនក្នុងមួយថ្ងៃ។
លោក ជាវ តាយ អភិបាលខេត្តកំពតបានប្រាប់ភ្នំពេញប៉ុស្តិ៍កាលពីថ្ងៃអង្គារថា រោងចក្រថ្មីនេះអាចមានសមត្ថភាពផលិតស៊ីម៉ងត៍បានជាមធ្យមប្រមាណ ៣ ៥០០ តោនក្នុង ១ ថ្ងៃ។ លោកបន្តថា បច្ចុប្បន្នរោងចក្រនេះកំពុងបើកដំណើរការសាកល្បង។
លោកថ្លែងថា៖ «ជាមួយនឹងបរិមាណនេះនឹងរួមចំណែកក្នុងការកាត់បន្ថយការនាំចូល និងបង្កើតការងារថ្មីៗសម្រាប់ប្រជាជន»។
រោងចក្រនេះស្ថិតក្នុងទីតាំងគម្រោងអភិវឌ្ឍន៍តំបន់សេដ្ឋកិច្ចពិសេសរបស់ក្រុមហ៊ុន ថៃប៊ុនរ៉ុង ដែលមានផ្ទៃដីសរុបជាង ១០០ ហិកតា ដោយមួយផ្នែកប្រើប្រាស់ជារោងចក្រ និងឃ្លាំងស្តុកស៊ីម៉ងត៍ និងផ្នែកនៅសល់ជាទីតាំងសម្រាប់អភិវឌ្ឍន៍តំបន់សេដ្ឋកិច្ចពិសេស។
ក្រុមហ៊ុនមិនបានបង្ហាញពីទុនវិនិយោគលើរោងចក្រផលិតស៊ីម៉ងត៍នេះទេ។ លោក ជាវ តាយ បានថ្លែងថា៖ «រហូតមកដល់ពេលនេះក្រុមហ៊ុនមិនទាន់រាយការណ៍ជាក់លាក់ពីតម្លៃវិនិយោគមកអាជ្ញាធរខេត្តនៅឡើយទេ»។
នៅពេលរោងចក្ររបស់ក្រុមហ៊ុន ថៃប៊ុនរ៉ុង បើកដំណើរការនឹងធ្វើឲ្យចំនួនរោងចក្រផលិតស៊ីម៉ងត៍នៅកម្ពុជាកើនដល់ ៥ ក្នុងនោះ ៤ នៅខេត្តកំពត និង ១ នៅខេត្តបាត់ដំបង។
លោក ទៀង សុភវិជ្ជា ប្រធានកិច្ចការសាធារណៈ និងរដ្ឋបាលនៃក្រុមហ៊ុនផលិតស៊ីម៉ងត៍ Chip Mong Insee កាលពីម្សិលមិញបាននិយាយថា ភាពល្អប្រសើរនៃវិស័យសំណង់បានធ្វើឲ្យតម្រូវការប្រើប្រាស់ស៊ីម៉ងត៍នៅកម្ពុជាកើនឡើងជាបន្តបន្ទាប់។ លោកបានបន្តថាក្នុងឆ្នាំ ២០១៩ នេះតម្រូវការស៊ីម៉ងត៍សម្រាប់ប្រើប្រាស់នៅកម្ពុជាអាចមានបរិមាណពី ៨ ទៅ ៩ លានតោនក្នុង ១ ឆ្នាំកើនឡើងពីប្រមាណ ៦ ទៅ ៧ លានតោនពីឆ្នាំ ២០១៨។
លោកថ្លែងថា៖ «នៅពេលរោងចក្ររបស់ក្រុមហ៊ុន ថៃប៊ុនរ៉ុង បើកដំណើរការជាផ្លូវការវានឹងជួយកាត់បន្ថយការនាំចូលបានច្រើនមានន័យថាយើងអាចមានភាពម្ចាស់ការលើការផលិត និងការផ្គត់ផ្គង់ស៊ីម៉ងត៍សម្រាប់តម្រូវការក្នុងស្រុកបានស្ទើរ ១០០ ភាគរយ»។
ទិន្នន័យរបស់ក្រសួងរៀបចំដែនដី នគរូបនីយកម្ម និងសំណង់ បង្ហាញថាក្នុងរយៈពេល ៩ ខែ ឆ្នាំ ២០១៩ ទុនវិនិយោគវិស័យសំណង់នៅកម្ពុជាមានតម្លៃប្រមាណ ៦,៤៩ ពាន់លានដុល្លារ កើនឡើង ៣៤,៧៣ ភាគរយ បើធៀបនឹងរយៈពេលដូចគ្នាកាលពីឆ្នាំ ២០១៨ ដែលមានតម្លៃប្រមាណ ៤,៨២ ពាន់លានដុល្លារ។
ទោះបីយ៉ាងនេះក្តីក្រៅតែពីផលិតផលស៊ីម៉ងត៍កម្ពុជានៅពឹងផ្អែកច្រើនលើការនាំចូលសម្ភារសំណង់ផ្សេងទៀត ដូចជាដែក ខណៈគ្រឿងសិង្ហារឹមនាំចូលស្ទើរទាំងស្រុង។ ទិន្នន័យពីគយវៀតណាមបានបង្ហាញថា កម្ពុជាបាននាំចូលដែកពីវៀតណាមជិត ៤០ ភាគរយ ក្នុងរយៈពេល ៧ ខែ ឆ្នាំ ២០១៩។ ទិន្នន័យបង្ហាញថា ការនាំចូលដែកពីវៀតណាមមាន ៧១៧ ៥៧២ តោន ដែលមានតម្លៃ ៤៦២,៧៣ លានដុល្លារ។
លោក ជីវ ស៊ីវផេង អ្នកគ្រប់គ្រងទូទៅនៃសមាគមអ្នកសាងសង់កម្ពុជាបាននិយាយថា ខណៈវិស័យសំណង់នៅកម្ពុជាកំពុងមានសម្ទុះកើនឡើងខ្លាំងនោះ ការបើកដំណើរការរោងចក្រផលិតស៊ីម៉ងត៍ក្នុងស្រុកនេះនឹងក្លាយជាចំណែកដ៏សំខាន់ក្នុងការកាត់បន្ថយការនាំចូលពីបរទេស។
លោក ស៊ីវផេង បានថ្លែងថា៖ «នៅពេលដែលមានរោងចក្រផលិតក្នុងស្រុកកាន់តែច្រើនបែបនេះនឹងធ្វើឲ្យតម្លៃសាងសង់ត្រូវបានកាត់បន្ថយខ្លះ ជាពិសេសវានឹងបង្កើតនូវឱកាសកាន់តែច្រើនសម្រាប់ផ្តល់នូវលំនៅឋានសម្រាប់ប្រជាជនផងដែរ»៕ LA
