.jpg)
អតិថិជនកំពុងដើរមើលស្រាបារាំងដែលដាក់តាំងបង្ហាញក្នុងស្តង់ពិព័រណ៍មួយ នៅសិង្ហបុរីកន្លងមក។ រូបថត AFP
ក្រុងប៉ារីសៈ អង្គការស្រាពិភពលោកមានមូលដ្ឋាននៅទីក្រុងប៉ារីសបានឲ្យដឹងកាលពីថ្ងៃអង្គារថា ការផលិតស្រារបស់ប្រទេសអាហ្វ្រិកខាងត្បូងនឹងធ្លាក់ចុះខ្លាំងក្នុងឆ្នាំ ២០១៨ ដោយសារប្រទេសនេះជួបវិបត្តិទឹក ដែលបំផ្លាញទីក្រុង Cape Town និងតំបន់ជុំវិញ។
អង្គការស្រាទំពាំងបាយជូរ និងស្រាអន្តរជាតិ (OIV) បានឲ្យដឹងនៅក្នុងសេចក្ដីប្រកាសព័ត៌មានមួយថា ក្រុមហ៊ុនផលិតស្រាឈានមុខគេរបស់អាហ្វ្រិកផលិតស្រានៅឆ្នាំនេះបានចំនួន ៨,៦ លានហិកតូលីត្រ (១ ហិកតូលីត្រ ស្មើនឹង ១០០ លីត្រ) ធ្លាក់ចុះ ២០,៤ ភាគរយដែលធ្លាក់ចុះចាប់ពីឆ្នាំ ២០១៧។
តំបន់ Western Cape មិនមានភ្លៀងធ្លាក់ជាង ៣ ឆ្នាំហើយដែលបង្ខំឲ្យទីក្រុងទី ២ របស់អាហ្វ្រិកខាងត្បូងមួយនេះកាត់បន្ថយការប្រើប្រាស់ទឹកនៅតាមលំនៅឋាន។
ខណៈការទទួលយកដោយប្រុងប្រយ័ត្ននូវផលប៉ះពាល់លើការបង្កើនរសជាតិទំពាំងបាយជូរ ដោយសារកង្វះទឹក ក្រុមហ៊ុនផលិតស្រាអាហ្វ្រិកកំពុងជម្នះជាមួយនឹងភាពរាំងស្ងួតដែលបានបណ្ដាលឲ្យមានការបារម្ភនៅក្នុងតំបន់ Cape Town ។
លើសពីនេះទៅទៀត ការផលិតជារួមនៅអឌ្ឍគោលខាងត្បូងនឹងរក្សាស្ថិរភាពក្នុងចំនួនប្រហែល ៥២ លានហិកតូលីត្រដែលបានផ្លាស់ប្តូរបន្តិចបន្តួចប៉ុណ្ណោះធៀបនឹងឆ្នាំមុន។
ប្រទេសអាហ្សង់ទីនដែលជាប្រទេសផលិតឈានមុខគេទី ៦ របស់ពិភពលោកនឹងមើលឃើញការផលិតរបស់ខ្លួនកើនឡើង ១៤,២ ភាគរយដល់ ១៣,៥ លានហិកតូលីត្រ។
នៅក្នុងប្រទេសស៊ីលីដែលជាប្រទេសបង្កើនភាពឈានមុខគេនៃការផលិតស្រានៅលើពិភពលោកផងដែរនឹងមើលឃើញកំណើន ១៩ ភាគរយដល់ ១១,៣ លានហិកតូលីត្រ។
អូស្ដ្រាលីជាប្រទេសផលិតស្រាទី ៥ របស់ពិភពលោកនឹងមើលឃើញការផលិតស្រារបស់ខ្លួនធ្លាក់ចុះ ៨,៧ ភាគរយមកនៅត្រឹម ១២,៥ លានហិកតូលីត្រ។
ទន្ទឹមនឹងនេះដែរ OIV បានបញ្ជាក់ពីការធ្លាក់ចុះជាប្រវត្ដិសាស្ដ្រក្នុងការផលិតដែលបានជំរុញដោយរដូវរងារយៈពេលវែងមិនធម្មតានៅក្នុងក្រុមហ៊ុនផលិតស្រាឈានមុខគេទាំង ៣ របស់ពិភពលោកគឺប្រទេសអ៊ីតាលី បារាំង និងអេស្ប៉ាញ។
ការប្រើប្រាស់លើពិភពលោកកាលពីឆ្នាំ ២០១៧ មានចំនួន ២៤៣ លានហិកតូលីត្រ។
អង្គការ OIV បានឲ្យដឹងនៅក្នុងសេចក្ដីប្រកាសព័ត៌មានមួយថា៖ «ការធ្លាក់ចុះក្នុងការប្រើប្រាស់របស់បណ្ដាប្រទេសប្រើប្រាស់ជាប្រវត្ដិសាស្ដ្រ ដូចជា បារាំង អ៊ីតាលី និងអេស្ប៉ាញ ហាក់ដូចជាមានស្ថិរភាព ខណៈដែលការប្រើប្រាស់របស់អាមេរិក ចិន និងអូស្ដ្រាលីបានបន្តកើនឡើង»៕ LA
