The Phnom Penh Post Search

Search form




Logo of Phnom Penh Post newspaper Phnom Penh Post - ផលិតកម្ម​ស្រូវ​កម្ពុជា​អាច​ប៉ះពាល់​តិច​តួច​ពី El Nino

ផលិតកម្ម​ស្រូវ​កម្ពុជា​អាច​ប៉ះពាល់​តិច​តួច​ពី El Nino

កសិករ​កំពុង​ស្ទូង​ស្រូវ​កាល​ពី​រដូវ​បង្ក​បង្កើន​ផល​ឆ្នាំ​ទៅ។ នៅ​ឆ្នាំ​នេះ​ការ​បង្ក​បង្កើន​ផល​ត្រូវ​គេ​រំពឹង​ថា​នឹង​ប្រសើរ​ជាង​ឆ្នាំ​ទៅ។
កសិករ​កំពុង​ស្ទូង​ស្រូវ​កាល​ពី​រដូវ​បង្ក​បង្កើន​ផល​ឆ្នាំ​ទៅ។ នៅ​ឆ្នាំ​នេះ​ការ​បង្ក​បង្កើន​ផល​ត្រូវ​គេ​រំពឹង​ថា​នឹង​ប្រសើរ​ជាង​ឆ្នាំ​ទៅ។ ផា លីណា

ផលិតកម្ម​ស្រូវ​កម្ពុជា​អាច​ប៉ះពាល់​តិច​តួច​ពី El Nino

ភ្នំពេញៈ ខណៈ​ប្រទេស​ថៃ​កំពុង​ប្រឈម​នឹង​ការ​កាត់​បន្ថយ​បរិមាណ​ផល​ស្រូវ ២ ភាគរយ​ដោយ​សារ​តែ​កង្វះ​ទឹក​ភ្លៀង សម្រាប់​រដូវ​បង្ក​បង្កើន​ផល​នៅ​ពេល​ខាង​មុខ ប្រទេស​កម្ពុជា​ទំនង​ជា​នឹង​ទទួល​រង​ផល​ប៉ះពាល់​តិចតួច ខណៈ​ទឹក​ភ្លៀង​ត្រូវ​បាន​គេ​រំពឹង​ថា​នឹង​ចាប់​ផ្ដើម​ធ្លាក់​នៅ​សប្ដាហ៍​នេះ។ នេះ​បើ​យោង​តាម​មន្ដ្រី​ក្រសួង​ធនធាន​ទឹក​និង​ឧតុនិយម។

អាកាសធាតុ El Nino ដែល​បង្ក​ឡើង​ដោយ​សីតុណ្ហភាព​ឡើង​ក្តៅ​ជាង​កម្រិត​មធ្យម​នៅ​មហា​សមុទ្រ​ប៉ាស៊ីហ្វិក​កំពុង​បង្ក​ឲ្យ​មាន​ការ​ផ្លាស់ប្តូរ​គំរូ​អាកាសធាតុ និង​អាច​បណ្ដាល​ឲ្យ​មាន​ទឹក​ជំនន់ និង​ភាព​រាំង​ស្ងូត​ដែល​ធ្វើ​ឲ្យ​ប៉ះពាល់​ដល់​ប្រជា​នេសាទ និង​ប្រជាជន​នៅ​ក្នុង​តំបន់​ទន្លេ​មេគង្គ។

រដ្ឋាភិបាល​បាន​ប្រកាស​ដល់​ប្រជា​កសិករ​ឲ្យ​ពន្យារ​ពេល​ការ​បង្ក​បង្កើន​ផល​ស្រូវ​រហូត​ដល់​ខែ​សីហា ដោយ​រំពឹង​ថា កង្វះ​ទឹក​ភ្លៀង និង​ភាព​រាំង​ស្ងួត​ដោយ​សារ​តែ បាតុភូត​អាកាសធាតុ El Nino នឹង​កាត់​បន្ថយ​ផលិតកម្ម​ស្រូវ ។

នៅ​ឆ្នាំ​នេះ ២ ភាគរយ​មក​នៅ​ត្រឹម ២៦ លាន​តោន។ តម្លៃ​ស្រូវ​ក៏​ត្រូវ​បាន​គេ​រំពឹង​ថា​នឹង​កើន​ឡើង​ខ្ពស់​ផង​ដែរ។ នេះ​បើ​តាម​សេចក្តី​រាយការណ៍​ពី​កាសែត​បាងកក​ប៉ុស្ដិ៍។

ប៉ុន្តែ​លោក ចាន់ យុត្ថា អ្នក​នាំ​ពាក្យ​ក្រសួង​ធនធាន​ទឹក និង​ឧតុនិយម បាន​ប្រាប់​ភ្នំពេញ​ប៉ុស្ដិ៍​កាល​ពី​ម្សិលមិញ​ថា បាតុ​ភូត​អាកាសធាតុ El Nino មាន​ផល​ប៉ះពាល់​តិច​តួច​លើ​ប្រទេស​កម្ពុជា ហើយ​ថា​នឹង​មាន​ទឹក​ភ្លៀង​គ្រប់​គ្រាន់​ចាប់​ផ្ដើម​ធ្លាក់​នៅ​សប្ដាហ៍​នេះ​រហូត​ដល់​ខែ​កញ្ញា។

លោក​លើក​ឡើង៖ «គេ​រំពឹង​ថា​នឹង​មាន​ទឹក​ភ្លៀង​ល្អ​ជាង​កាល​ពី​ឆ្នាំ​មុន។ នៅ​ឆ្នាំ​នេះ​កូន​រដូវ​ប្រាំង ដែល​ជា​ធម្មតា​ចាប់​ផ្ដើម​នៅ​ខែ​កក្កដា​ក៏​ត្រូវ​បាន​គេ​រំពឹង​ថា​នឹង​មិន​កើត​ឡើង​នោះ​ទេ»។

លោក​បន្ត​ថា៖ «ប្រទេស​កម្ពុជា​រហូត​មក​ទល់​ពេល​នេះ​បាន​ជួប​ប្រទះ​បាតុភូត​អាកាសធាតុ El Nino ក្នុង​រយៈពេល​ខ្លី​ប៉ុណ្ណោះ​កាលពី​ខែ​មេសា ដល់​ខែ​មិថុនា។ ទឹក​ភ្លៀង​បាន​ចាប់​ផ្ដើម​ចាប់​តាំង​ពី​ដើម​ខែ​កក្កដា វា​មាន​ន័យ​ថា​អាកាសធាតុ El Nino នឹង​មិន​មាន​ផល​ប៉ះពាល់​ដល់​ប្រទេស​កម្ពុជា​នោះ​ទេ»។

ក្រសួង​ធនធាន​ទឹក និង​ឧតុនិយម​បាន​ចេញ​សេចក្ដី​ជូន​ដំណឹង​មួយ​កាល​ពី​ដើម​ខែ​មេសា​ដោយ​បញ្ជាក់​ថា កម្រិត​ទឹក​ភ្លៀង​ជា​មធ្យម​ត្រូវ​បាន​គេ​រំពឹង​ថា​ចាប់​ផ្ដើម​ពី​ខែ​មេសា​ដល់​ខែ​មិថុនា។ ប៉ុន្តែ​បាន​កែ​តម្រូវ​ការ​ប៉ាន់​ប្រមាណ​របស់​ពួក​គេ​ក្នុង​រយៈពេល​មួយ​ខែ​ក្រោយ​មក​ដោយ​លើក​ឡើង​ថា ខែ​ឧសភា និង​ខែ​មិថុនា​នឹង​មាន​ទឹក​ភ្លៀង​ធ្លាក់​តិច​តួច ហើយ​ភ្លៀង​ខ្លាំង​ត្រូវ​បាន​គេ​រំពឹង​ថា​នឹង​ចាប់​ផ្ដើម​នៅ​ខែ​កក្កដា។

ការ​បង្ក​បង្កើន​ផល​ស្រូវ​នៅ​កម្ពុជា​បាន​បញ្ចប់​រួច ៣០ ភាគរយ​ហើយ​ក្នុង​ចំណោម​តំបន់​ដាំ​ដុះ​លើ​ផ្ទៃ​ដី​ជាង ២លាន​ហិតា។ នេះ​បើ​តាម​លោក ងិន ឆាយ​ប្រធាន​នាយក​ដ្ឋាន​ផលិតកម្ម​ស្រូវ​នៅ​ក្រសួង​កសិកម្ម។

លោក​ឲ្យ​ដឹង​កាល​ពី​ម្សិលមិញ​ថា៖ «ទោះ​បី​មាន​ទឹក​ភ្លៀង​ធ្លាក់​តិច​តួច​ចាប់​ពី​ខែ​មិថុនា ដែល​ជា​ធម្មតា​ជា​ការ​ចាប់​ផ្ដើម​រដូវ​ដាំ​ដុះ​ស្រូវ​ក៏​ដោយ ប៉ុន្តែ​លទ្ធផល​នៃ​ការ​ដាំ​ដុះ​ជារួម​សម្រាប់​ប្រទេស​នេះ​ត្រូវ​បាន​គេ​ចាត់​ទុក​ថា​មាន​ល្បឿន​លឿន​ខ្លាំង​ធៀប​នឹង​រដូវ​បង្ក​បង្កើន​ផល​ស្រូវ​កាល​ពី​រដូវ​មុន»។

លោក​បាន​បញ្ជាក់​ថា៖ «ក្រសួង​កំពុង​ជំរុញ​ឲ្យ​មាន​ការ​បង្កើន​តំបន់​បង្កបង្កើន​ផល​ស្រូវ​នៅ​ឆ្នាំ​នេះ ហើយ​ដោយ​មាន​ទឹក​ភ្លៀង​គ្រប់គ្រាន់ យើង​សង្ឃឹម​ថា​នឹង​ទទួល​បាន​ទិន្នផល​ស្រូវ​កាន់​តែ​ល្អ​ប្រសើរ​ជាង​ឆ្នាំ​មុន»។

ក្រសួង​កសិកម្ម​បាន​ព្យាករ​ពី​បរិមាណ​ផល​ស្រូវ​សម្រាប់​រដូវ​ដាំ​ដុះ​ឆ្នាំ ២០១៥-២០១៦ ថា​នឹង​កើន​ឡើង ៣ ភាគរយ។

ប្រសិន​បើ​ការ​ផ្គត់​ផ្គង់​ស្រូវ​កាន់​តែ​តិច​ពី​ប្រទេស​ថៃ ដែល​ជា​ដៃ​គូ​ប្រកួត​ប្រជែង​ធំ​ជាង​គេ​របស់​កម្ពុជា វា​អាច​ធ្វើ​ឲ្យ​តម្លៃ​ស្រូវ​កាន់​តែ​ខ្ពស់ នៅ​ក្នុង​ទីផ្សារ​ពិភពលោក។ ប៉ុន្តែ​លោក កាន់ គន្ធី អគ្គនាយក​ក្រុមហ៊ុន Battambang Rice Investment Co បាន​ថ្លែង​ថា ការ​កាត់​បន្ថយ​បរិមាណ​ផល​ស្រូវ ២​ភាគរយ​នៅ​ក្នុង​ប្រទេស​ថៃ​ទំនង​ជា​នឹង​មាន​ផល​ប៉ះពាល់​តិច​តួច​លើ​តម្លៃ​នៅ​ក្នុង​ទីផ្សារ​ពិភពលោក។

លោក​បញ្ជាក់​ថា៖ «ប្រទេស​ថៃ​នៅ​តែ​មាន​ស្ដុក​ស្រូវ​ប្រហែល ១៦ លាន​តោន​ដែល​ពួក​គេ​គ្រោង​នឹង​បញ្ចេញ​ចំនួន ១០ លាន​តោន​នៅ​ឆ្នាំ​នេះ និង​ចំនួន ៦ លាន​តោន​ផ្សេង​ទៀត​នៅ​ឆ្នាំ​ក្រោយ។ ការ​កាត់​បន្ថយ​បរិមាណ​ផល​នៅ​ឆ្នាំ​នេះ​នឹង​មាន​ផល​ប៉ះពាល់​តិចតួច​លើ​តម្លៃ​នៅ​ក្នុង​ទីផ្សារ​ពិភពលោក»។

លោក​បន្ថែម​ថា៖ «ខ្ញុំ​រំពឹង​ថា តម្លៃ​នឹង​មាន​ស្ថិរភាព​នៅ​ឆ្នាំ​នេះ ហើយ​បើ​ទោះ​បី​ជា​វា​នឹង​កើន​ឡើង​ក៏​ដោយ​ក៏​មិន​កើន​ឡើង​ច្រើន​ខ្លាំង​នោះ​ដែរ»៕PB

អត្ថបទគួរចាប់អារម្មណ៍