ភ្នំពេញៈ ផលិតផលសិប្បកម្មវាយនភ័ណ្ឌ និងគ្រឿងលម្អក្នុងផ្ទះរបស់កម្ពុជាកំពុងទទួលបានការគាំទ្រក្នុងទីផ្សារប្រទេសកូរ៉េប៉ុន្តែផលិតករកម្ពុជានៅមិនទាន់ចាប់យកអត្ថប្រយោជន៍ពីឱកាសពាណិជ្ជកម្មនេះពេញលេញនៅឡើយទេ ដោយសារបញ្ហាផ្នែកផលិតកម្ម។
នៅក្នុងសិក្ខាសាលាស្តីពី «ការរចនាម៉ូដផលិតផលវាយនភ័ណ្ឌនិងការតុបតែងលម្អគេហដ្ឋាន សម្រាប់ការឈានចូលទីផ្សារកូរ៉េ» ដែលធ្វើឡើងនៅភ្នំពេញកាលពីម្សិលមិញ អ្នកស្រី Kyoung Jung A អ្នកជំនាញរចនាម៉ូដ និងជាអ្នកគ្រប់គ្រងហាងលក់ផលិតផលតែងលម្អដែលមានសាខាជាច្រើននៅ ទីក្រុងសេអ៊ូល ប្រទេសកូរ៉េបានឲ្យដឹងថា បន្ទាប់ពីបាននាំចូលផលិតផលវាយនភ័ណ្ឌផលិតនៅកម្ពុជាអស់រយៈពេលបីឆ្នាំមក អតិថិជនជាច្រើនរបស់កម្ពុជា ហើយតម្រូវការក៏មានការកើនឡើងជាលំដាប់។
ចាប់ពីខែឧសភា ឆ្នាំមុន រហូតដល់ខែឧសភាឆ្នាំនេះ អ្នកស្រីបាននាំចូលផលិតផលពីកម្ពុជាគិតជាទឹកប្រាក់ប្រមាណ១០ ម៉ឺនដុល្លារ ហើយបើមានការផ្គត់ផ្គង់ផលិតផលដែលមានគុណភាពគ្រប់គ្រាន់ចំនួននឹងអាចមានច្រើនជាងនេះ។ អ្នកស្រីថ្លែងថា៖ «ផលិតផលពីកម្ពុជាចាប់ផ្តើមមានប្រជាប្រិយជាងមុន ព្រោះមានអតិថិជនកាន់ច្រើនទិញ និងស្គាល់។ តែទោះជាយ៉ាងនេះក្តី ផលិតករគួរពង្រឹងការរចនា និងកែលម្អគុណភាពលើផលិតផលសម្រេចបន្ថែមទៀតព្រោះថា វានៅតែជាឧបសគ្គច្រើននៅឡើយ»។
សិក្ខាសាលានេះត្រូវបានរៀបចំដោយមជ្ឈមណ្ឌលពង្រឹងពាណិជ្ជកម្ម កូរ៉េ-អាស៊ាន ក្នុងបំណងពង្រឹងផលិតភាពសិប្បករកម្ពុជានិង ការយល់ដឹងពីការវិវត្តនៃទីផ្សាររបស់កូរ៉េ ដើម្បីអាចមានលទ្ធភាពក្នុងការនាំចេញទំនិញបានកាន់តែច្រើនថែមទៀត។
ថ្លែងក្នុងពិធីបើកសិក្ខាសាលានេះ លោក ម៉ៅ ថូរ៉ា រដ្ឋលេខាធិការក្រសួងពាណិជ្ជកម្មកម្ពុជា បានលើកឡើងថា ការបង្ហាញពីនិន្នាការទីផ្សារ និង ការវិវត្តថ្មីនៃទីផ្សាកូរ៉េ ជាជំហានថ្មីមួយទៀតដើម្បីបង្ហាញពីតម្រូវការជាក់ស្តែងនៃផលិតផលកម្ពុជានៅលើទីផ្សារកូរ៉េ និងការស្វែងយល់ពីភាពខ្វះចន្លោះរបស់ផលិតករយើង។
លោក ម៉ែន ស៊ីនឿន នាយកប្រតិបត្តិសមាគមសិប្បករកម្ពុជា បានប្រាប់ភ្នំពេញ ប៉ុស្តិ៍ថា រហូតមកទល់ពេលនេះផលិតផលដែលធ្វើដោយដៃត្រូវបាននាំចេញតិចតួចណាស់ទៅទីផ្សារកូរ៉េ។ ដូច្នេះលោករំពឹងថា រាល់ការផ្តល់ជំនួយបច្ចេកទេស ឬការសិក្សានានាពីនិន្នាការទីផ្សារ ពិតជាកត្តារួមផ្សំយ៉ាងសំខាន់ក្នុងការពង្រឹងផលិតភាពនាំចេញនាពេលខាងមុខ។ លោកថ្លែងថា៖ «គេអាចបង្ហាញយើងពីនិន្នាការទីផ្សារជាក់ស្តែង និងឥរិយាបថអ្នកប្រើប្រាស់។ ការផ្ទេរបទពិសោធការទទួលចំណេះដឹងថ្មីនឹងផ្តល់ប្រយោជន៍ និងពង្រឹងផលិតភាពរបស់យើងនាពេលខាងមុខ»។
អ្នកស្រី សេង តក្កនារី ប្រធានសមាគមសហគ្រិនស្រ្តីកម្ពុជា បានឲ្យដឹងថា សមាជិកក្នុងសមាគមមិនទាន់បាននាំចេញផលិតផលទៅកូរ៉េនោះទេ តែបើតាមបទពិសោធក្នុងការចូលរួមពិព័រណ៍ពាណិជ្ជកម្មជាច្រើន ដងនៅកូរ៉េ តម្រូវការពិតជាមានខ្លាំងនៅទីនោះ៕
