ទីក្រុងឡាអេៈ រដ្ឋាភិបាលហូឡង់កាលពីថ្ងៃសៅរ៍បានផ្អាកផែនការជួយក្រុមហ៊ុនអាកាសចរណ៍ជាតិដែលទទួលរងសម្ពាធដ៏ខ្លាំង KLM ជាមួយកញ្ចប់សង្គ្រោះច្រើនពាន់លានអឺរ៉ូ បន្ទាប់ពីសហជីពបានបដិសេធចុះហត្ថលេខាលើកិច្ចព្រមព្រៀងដែលជាប់ទាក់ទិននឹងផែនការកាត់ចំណាយរយៈពេល ៥ ឆ្នាំ។
ការសម្រេចនេះបានធ្វើឱ្យអនាគតនៃក្រុមហ៊ុនអាកាសចរណ៍ហូឡង់ដែលជាផ្នែកនៃអាកាសចរណ៍បារាំង (KLM) ស្ថិតនៅក្នុងគ្រោះថ្នាក់ដោយ KLM និយាយថា វានៅមិនឆ្ងាយដោយគ្មានការរួមបញ្ចូលថវិកាសង្គ្រោះរបស់រដ្ឋាភិបាលដ៏ច្រើនដើម្បីជួយក្រុមហ៊ុនអាកាសចរណ៍ដ៏មានវ័យចំណាស់បំផុតរបស់ពិភពលោកដែលពេលនេះបានរងការវាយប្រហារដ៏ធ្ងន់ធ្ងរបំផុតដោយការរីករាលដាលវីរុសកូរ៉ូណា។
លោក Wopke Hoekstra រដ្ឋមន្ត្រីហិរញ្ញវត្ថុហូឡង់បានប្រាប់អ្នកយកព័ត៌មានក្រោយជំនួបជាមួយក្រុមហ៊ុន KLM ថា៖ «ជំនួយរដ្ឋដែលបានគ្រោងទុកមិនសម្រេចបាននោះទេ។ វាជាការខកចិត្ត ប៉ុន្តែនេះជារឿងកើតឡើងទៅហើយ»។
លោករដ្ឋមន្ត្រីបាននិយាយថា៖ «វាពិតជាសំខាន់ណាស់នាពេលដែលអ្នករាល់គ្នាមានការទទួលខុសត្រូវរបស់ខ្លួន និង ដឹងថា KLM ស្ថិតក្នុងវិបត្តិជាក់ស្តែង»។
ការសម្រេចចិត្តរបស់គណៈរដ្ឋមន្ត្រីហូឡង់កើតមានតែ ១ ថ្ងៃក្រោយការជជែកគ្នាជាមួយវត្ថុបំណងជាក់លាក់រវាង KLM និងសហភាពការងាររបស់ខ្លួនដើម្បីព្យាយាម និងសម្រេចឱ្យបាននូវកិច្ចព្រមព្រៀងលើកញ្ចប់សង្គ្រោះ ដែលលោក Hoekstra និយាយថា វាគួរសម្រេចបាន ប្រសិនបើក្រុមហ៊ុនអាកាសចរណ៍ប្រកាន់ខ្ជាប់ ចំពោះវិធានការកាត់បន្ថយដ៏តឹងតែង។
លោករដ្ឋមន្ត្រីហិរញ្ញវត្ថុបានឱ្យក្រុមហ៊ុន KLM និងសហភាពការងារដែលធ្វើជាតំណាងអាកាសយានិក ក្រុមបុគ្គលិកបម្រើការងារតាមយន្តហោះរហូតដល់ម៉ោង ១២ យប់ម៉ោងសកលត្រឹមយប់ថ្ងៃសៅរ៍ ដើម្បីចុះហត្ថលេខាលើកិច្ចព្រមព្រៀង ដើម្បីបើកផ្លូវទទួលយកផ្នែកទី ២ នៃការចាក់បញ្ចូលសាច់ប្រាក់ ៣,៤ ពាន់លានអឺរ៉ូ។
អំឡុងពេលនៃការជជែកគ្នាដែលនៅបន្តជាមួយសហភាពការងារជាច្រើន សហភាពការងារតំណាងអាកាសយានិក VNV បានបដិសេធចុះហត្ថលេខាលើអ្វីដែលពួកគេយល់ថា បានផ្លាស់ប្តូរលក្ខខណ្ឌនៅនាទីចុងក្រោយសម្រាប់កិច្ចព្រមព្រៀងនោះ។
ជម្លោះដ៏ជូរចត់ប្រមូលផ្តុំ លើប្រការ ១ ក្នុងកិច្ចព្រមព្រៀងដែលស្នើឱ្យបុគ្គលិកក្រុមហ៊ុនអាកាសចរណ៍ដែលមានបញ្ហាត្រូវកាត់បន្ថយប្រាក់ខែសម្រាប់រយៈពេល ៥ ឆ្នាំខាងមុខ។
KLM នៅក្នុងសប្តាហ៍នេះបានបង្ហាញនូវផែនការរឹតត្បិតដល់ក្រសួងហិរញ្ញវត្ថុដែលទាមទារឱ្យកាត់ការចំណាយ ១៥ ភាគរយ ហើយនិងមើលឃើញការងារ ៥០០០ កន្លែងត្រូវបានបញ្ឈប់ដោយសារផលប៉ះពាល់ជាសកលនៃការរីករាលដាលវីរុសកូរ៉ូណាលើការធ្វើដំណើរតាមផ្លូវអាកាស។
ក្រុមហ៊ុននេះក៏បានរួមបញ្ចូលនូវកិច្ចព្រមព្រៀងពីសហភាពការងារដើម្បីកាត់ប្រាក់ខែអាកាសយានិករហូតដល់ខែមីនា ឆ្នាំ ២០២២ និង ប្រាក់ខែបុគ្គលិកផ្នែកសេវាកម្មលើយន្តហោះរហូតដល់ដើមឆ្នាំ ២០២៣។
ប៉ុន្តែលោករដ្ឋមន្ត្រី Hoekstra កាលពីថ្ងៃសុក្របានទម្លាក់ចោលផែនការនោះ ដោយទទូចឱ្យមានការកាត់បន្ថយប្រាក់ខែឱ្យស្របពេលជាមួយនឹងកញ្ចប់ថវិកាសង្គ្រោះរយៈពេល ៥ ឆ្នាំរបស់រដ្ឋាភិបាល។
តំណាងសហភាពការងារ VNV បន្ទាប់ពីពេលវេលាកំណត់បានកន្លងផុតទៅភ្លាមៗបានឱ្យដឹងថា៖ «យើងមិនបានចុះហត្ថុលេខាទេ»។
តំណាងសហភាពការងារនោះដែលបដិសេធមិនបានឱ្យបញ្ចេញឈ្មោះបាននិយាយថា៖ «យើងបានព្រមព្រៀងជាមួយក្រុមហ៊ុន KLM រួចហើយកាលពីថ្ងៃទី ១ ខែតុលា ហើយពេលនេះពួកគេ (រដ្ឋាភិបាល) បានទៅសើរើកិច្ចព្រមព្រៀងឡើងវិញ»៕ RR