The Phnom Penh Post Search

Search form




Logo of Phnom Penh Post newspaper Phnom Penh Post - ផែ​ពហុបំណង​នឹង​ចាប់ផ្តើម​នៅ​ឆ្នាំ​២០១៤

ផែ​ពហុបំណង​នឹង​ចាប់ផ្តើម​នៅ​ឆ្នាំ​២០១៤

ផែ​ពហុបំណង​នឹង​ចាប់ផ្តើម​នៅ​ឆ្នាំ​២០១៤

131125_12
កន្លែងផ្ទុកកុងតឺន័រនៅកំពង់ផែស្វយ័តក្រុងព្រះសីហនុ ភ្នំពេញ ប៉ុស្តិ៍

ភ្នំពេញៈ គម្រោង​សាងសង់​កំពង់ផែ​ពហុបំណង​ នៅ​ខេត្ត​ព្រះសីហនុ​ នឹង​ចាប់​ដំណើរការ​ក្នុង​ឆ្នាំ​២០១៤​ ខាង​មុខ ហើយ​ការ​សាងសង់​នេះ​ត្រូវ​គេ​រំពឹង​ថា​ នឹង​ចប់​សព្វ​គ្រប់​នៅ​ចុង​ឆ្នាំ​២០១៦​ ដើម្បី​ជំរុញ​ការ​នាំ​ចេញ​របស់​កម្ពុជា​។​ នេះ​បើ​តាម​ការ​ឲ្យ​ដឹង​របស់​មន្ត្រី​កំពង់ផែ​ស្វយ័ត​ព្រះសីហនុ​។

កំពង់ផែ​ពហុបំណង​នឹង​ត្រូវ​សង់​នៅលើ​ផ្ទៃទឹក​ទំហំ​ ៣​ហិកតា ​ភ្ជាប់​ជាមួយ​ដីគោក​ដែល​មាន​ទីតាំង​ជា​ឃ្លាំង​សម្រាប់​ផ្ទុក​ទំនិញ​ ស្រាប់ ​និង​ត្រូវ​បាន​បែងចែក​ជា​ពីរ​ផ្នែក​ដែល​បម្រើ​ដល់​ការ​នាំ​ចេញ-ចូល​ ទំនិញ ​និង​ជា​ទីតាំង​ សម្រាប់​ផ្គត់ផ្គង់​សម្ភារ​ម្ហូប​អាហារ​ ទៅ​ដល់​កប៉ាល់​ខួង​ប្រេង​នៅ​សមុទ្រ​កម្ពុជា​។

ការ​សាងសង់​កំពង់ផែ ​ពហុបំណង​នឹង​ត្រូវ​ចំណាយ​ទឹកប្រាក់​ប្រមាណ​៨០​លាន​ដុល្លារ​ក្រោម​ កម្ចី​ហិរញ្ញប្បទាន​ពី​រដ្ឋាភិបាល​ប្រទេស​ជប៉ុន។ ចំណត​ផែ​ថ្មី​ដែល​មាន​ជម្រៅ​១៣,៥​ម៉ែត្រ​នឹង​អាច​ធ្វើឲ្យ​កប៉ាល់​ដឹកទំនិញ​ខ្នាត​ធំ​ចូល​ចត​និង​អាច​ដឹក​ទំនិញ​ចន្លោះ​ពី​៣​ម៉ឺន​ទៅ​៥​ ម៉ឺន​តោន​ ខណៈ​ចំណត​ផែ​នា​ពេល​បច្ចុប្បន្ន​អាច​មាន​លទ្ធភាព​ឲ្យ​កប៉ាល់​ដឹក​ទំនិញ​បាន ​ត្រឹម​តែ​១​ម៉ឺន​តោន​ប៉ុណ្ណោះ​។

លោក​ វ៉ា ​សូណាត​ អគ្គនាយករង​នៃ​កំពង់ផែ​ស្វយ័ត​ ព្រះសីហនុ​ ប្រាប់​ភ្នំពេញប៉ុស្តិ៍​ថា​កំពង់ផែ​ពហុបំណង​នេះ​ធ្វើ​ឡើង​ដើម្បី​ សម្រួល​ដល់​ការ​កើនឡើង​ការ​នាំ​ចេញ​ទំនិញ​កសិកម្ម​របស់​កម្ពុជា​ ដែល​មាន​ដូចជា ​កម្ទេច​ឈើ​អាកាស្យា ​ចំណិត​ដំឡូង​ស្ងួត ​ពិសេស​ការ​នាំ​ចេញ​អង្ករ​កម្ពុជា​។

លោក ​បាន​បន្ត​ថា​៖ «​សេដ្ឋកិច្ច​យើង​ចេះ​តែ​ទៅ​មុខ​ហើយ។ ​យើង​ឃើញ​កម្ពុជា ​មាន​ទំនិញ​នាំ​ចេញ​កាន់តែ​ច្រើន​ឡើង​ ទាំង​ផលិតផល​កសិកម្ម ​និង​សម្លៀកបំពាក់។​ ផែ​នេះ​នឹង​ជា​ផែ​ទឹកជ្រៅ​ទី​មួយ​ដែល​អាច​ទទួល​កប៉ាល់​ធំៗ ​កប៉ាល់​យក្ស ​ដែល​នឹង​អាច​ទទួល​ទំនិញ​គ្រប់​មុខ​ ទាំង​ទំនិញ​កុងតឺន័រ​ និង​ទំនិញ​រាយ ​ដែល​នឹង​អាច​សន្សំសំចៃ​ពេលវេលា​បញ្ជូន​ទំនិញ​ដាក់​លើ​កប៉ាល់​ជាង​ ទំនិញ​ច្រក​បាវ​»។

លោក​ គឹម​ សាវុធ​ ប្រធាន​សហព័ន្ធ​អ្នក​នាំ​ ចេញ​អង្ករ​កម្ពុជា ​បាន​សាទរ​ចំពោះ​ការ​សាងសង់​កំពង់ផែ​ថ្មី​នេះ ​ប៉ុន្តែ​លោក​ថ្លែង​ថា ​បញ្ហា​ប្រឈម​របស់​អ្នក​នាំ​ចេញ​ជា​ការ​ដឹកទំនិញ​ពី​ភ្នំពេញ​ទៅ​ផែ​នៅ​ ខេត្ត​ព្រះសីហនុ​។

លោក​បន្ត​ថា៖​«ខ្ញុំ​គិត​ថា ​ល្អ ​ល្អ​មែនទែន​ដែល​មាន​ផែ​ថ្មី​នេះ​។ ប៉ុន្តែ​រឿង​ដែល​សំខាន់​គឺ​បញ្ហា​សោហ៊ុយ ​ដែល​ត្រូវ​ចំណាយ ​នៅពេល​អង្ករ​ដឹក​ចេញ​ពី​រោងចក្រ​នៅ​ភ្នំពេញ​ទៅ​ដល់​ផែ ​ដូចជា​ ការ​បង់​ថ្លៃ​ ការ​លើក​ដាក់​ទំនិញ​ទៅ​ម៉ាស៊ីន​ស្កេន​ និង​ការ​លើក​ទំនិញ​ទៅ​ដាក់​មាត់ផែ»​។

លោក​ វ៉ា ​សូណាត ​បាន​ឲ្យ​ដឹង​ថា តាម​គម្រោង​ផែ​ថ្មី​នេះ​ត្រូវ​បាន​ចាប់ផ្តើម​នៅ​ឆ្នាំ ​២០១១ ​និង​ត្រូវ​បញ្ចប់​នៅ​ឆ្នាំ ​២០១៤ ​ប៉ុន្តែ​បាន​ពន្យារពេល​រហូត​មក​ដល់​ពេល​នេះ​ដើម្បី​បង្កើន​សមត្ថភាព ​ និង​ប្រសិទ្ធភាព​ការងារ​បន្ថែម​ទៀត៕

អត្ថបទគួរចាប់អារម្មណ៍