កំណាត់ផ្លូវដែកដែលត្រូវបានស្តារឡើងវិញ។ រូបថត ក្រសួងសាធារណការ
ភ្នំពេញៈ ក្រសួងសាធារណការ និងដឹកជញ្ជូន ( MPWT) បានឲ្យដឹងថា ការបើកដំណើរការសេវាដឹកជញ្ជូនផ្លូវដែកពីខេត្តបាត់ដំបងទៅខេត្តពោធិ៍សាត់រំពឹងថានឹងដាក់ដំណើរការទៅតាមការគ្រោងទុកនៅថ្ងៃទី ២៩ ខែឧសភា ខាងមុខនេះ។
ក្រសួងកាលពីថ្ងៃអាទិត្យម្សិលមិញបានជូនដំណឹងរយៈតាមទំព័រហ្វេសប៊ុកផ្លូវការរបស់ខ្លួនថា មន្ដ្រីរបស់ក្រសួងកំពុងធ្វើការងារយ៉ាងសកម្មលើការស្ដារផ្លូវដែកដែលមានប្រវែងប្រហែល ១០៧ គីឡូម៉ែត្រនេះ។
ក្រសួងសាធារណការ និងដឹកជញ្ជូនបានឲ្យដឹងថា៖ «មន្ដ្រីយើងធ្វើការងារមិនខ្លាចនឿយហត់ទាំងថ្ងៃទាំងយប់ដើម្បីដាក់ដំណើរការ [សេវារថភ្លើងនេះ] នៅខែឧសភាឆ្នាំ ២០១៨ នេះតាមការគ្រោងទុក»។
កំណាត់ផ្លូវពីខេត្តបាត់ដំបងទៅខេត្តពោធិ៍សាត់នៅពេលកំណាត់ផ្លូវនេះប្រតិបត្តិការនឹងធ្វើឡើង បន្ទាប់ពីការបើកដំណើរការផ្លូវដែកប្រវែង ៥៨ គីឡូម៉ែត្ររវាងទីក្រុងព្រំដែនប៉ោយប៉ែត និងមង្គលបុរីកាលពីថ្ងៃទី ៤ ខែមេសា និងផ្លូវរថភ្លើងប្រវែង ៥៥ គីឡូម៉ែត្រចាប់ពីមង្គលបុរីទៅខេត្តបាត់ដំបងដែលបានបើកដំណើរការកាលពីថ្ងៃទី ២៩ ខែមេសា។
សេវារថភ្លើងនេះដែលបច្ចុប្បន្នក៏មានប្រតិបត្តិការពីប៉ោយប៉ែតទៅបាត់ដំបងដែរនោះកំពុងផ្ដល់សេវាមិនគិតប្រាក់សម្រាប់អ្នកដំណើររហូតដល់ចុងខែកក្កដា៕ LA
