ភ្នំពេញៈ ផ្លូវល្បឿនលឿនដំបូងនៅកម្ពុជាពីភ្នំពេញទៅខេត្តព្រះសីហនុដែលចំណាយទុនវិនិយោគជាង ២ ពាន់លានដុល្លារអាចនឹងត្រូវចាប់ផ្តើមសាងសង់នៅចុងឆ្នាំ ២០១៨ នេះ ខណៈការដោះស្រាយផលប៉ះពាល់ជាមួយប្រជាពលរដ្ឋកំពុងដំណើរការទៅមុខយ៉ាងរលូន។ នេះបើតាមមន្ត្រីក្រសួងសាធារណការ និងដឹកជញ្ជូន។
លោក នូវ វឌ្ឍនៈ អគ្គនាយកបច្ចេកទេសនៃក្រសួងសាធារណការ និងដឹកជញ្ជូនបានប្រាប់ភ្នំពេញ ប៉ុស្តិ៍កាលពីថ្ងៃម្សិលមិញថា ផ្លូវល្បឿនលឿននេះអាចនឹងចាប់ផ្តើមសាងសង់នៅពេលណាមួយនៅចុងឆ្នាំ ២០១៨ ។
លោកបានបន្តថាមកដល់ពេលនេះការចរចាជាគោលការណ៍រវាងអាជ្ញាធរ និងក្រុមហ៊ុនវិនិយោគចិនស្ទើរតែបញ្ចប់ទាំងស្រុង ហើយខណៈនៅសល់តែផែនការលម្អិតតូចៗតែប៉ុណ្ណោះ។
លោកបានលើកឡើងថា៖ «បច្ចុប្បន្ននេះក្រុមការងារក្រសួង សាធារណការ និងដឹកជញ្ជូន និងក្រសួងសេដ្ឋកិច្ច និងហិរញ្ញវត្ថុកំពុងធ្វើការរួមគ្នាក្នុងការដោះស្រាយផលប៉ះពាល់ជាមួយប្រជាជនដោយក្រុមហ៊ុនវិនិយោគមានទុនបម្រុងប្រមាណ ១៥០ លានដុល្លារដើម្បីដោះស្រាយសំណង»។
យោងតាមលោក នូវ វឌ្ឍនៈ ការងារដែលកំពុងធ្វើនាពេលនេះគឺផ្តល់សំណងដល់ប្រជាជនដែលផ្លូវល្បឿនលឿនត្រូវឆ្លងកាត់លើដី ឬលំនៅឋានរបស់ពួកគេ។
លោក នូវ វឌ្ឍនៈ បានបញ្ជាក់ថាផ្លូវល្បឿនលឿននេះនឹងត្រូវសាងសង់ចេញពីរាជធានីភ្នំពេញខាងស្តាំដៃស្របតាមផ្លូវជាតិលេខ ៤។
ផ្លូវជាតិលេខ ៤ គឺជាផ្លូវសេដ្ឋកិច្ចដ៏សំខាន់របស់កម្ពុជាសម្រាប់ការដឹកជញ្ជូនទំនិញឆ្ពោះទៅកាន់កំពង់ផែសមុទ្រក្នុងខេត្តព្រះសីហនុ។
ផ្លូវល្បឿនលឿននេះនឹងមានប្រវែង ១៩០,៦៣ គីឡូម៉ែត្រដោយមានទទឹងទំហំ ២៤ ម៉ែត្រ (៤ គន្លងទៅមក) ដោយវិនិយោគស្ថិតក្រោមដំណើរការ សាងសង់ ប្រតិបត្តិករ និងផ្ទេរ (BOT) ដែលនឹងត្រូវចំណាយពេលសាងសង់ចំនួន ៤៨ ខែ។
ផ្លូវជាតិលេខ ៤ ដែលកំពុងប្រើប្រាស់រាល់ថ្ងៃមានប្រវែង ២៣០ គីឡូម៉ែត្រពីទីក្រុងភ្នំពេញ។
កាលពីពេលកន្លងមកអង្គការ JICA របស់ជប៉ុនក៏បានសិក្សាបញ្ចប់ពីផែនការសាងសង់ផ្លូវល្បឿនលឿនចេញពីរាជធានីភ្នំពេញឆ្ពោះទៅក្រុងបាវិតព្រំដែនកម្ពុជា-វៀតណាមផងដែរ ប៉ុន្តែរហូតមកដល់ពេលនេះរាជរដ្ឋាភិបាលកម្ពុជានៅមិនទាន់រកបានដៃគូសម្រាប់អភិវឌ្ឍន៍គម្រោងនេះនៅឡើយទេ៕ BP