ភ្នំពេញ: មន្ត្រីជាន់ខ្ពស់នៃក្រសួងសាធារណការ និងដឹកជញ្ជូនបានឲ្យដឹងថា ផ្លូវល្បឿនលឿន (Expressway) ភ្នំពេញ-ព្រះសីហនុដែលជាតំបន់សក្តានុពលពាណិជ្ជកម្ម និងទេសចរណ៍ជាប់ឆ្នេរសមុទ្រនឹងអាចបញ្ចប់ការសាងសង់មុនកាលកំណត់ ហើយគ្រោងនឹងដាក់ឲ្យដំណើរការនៅចុងឆ្នាំ ២០២២ ខាងមុខ។
លោក វ៉ាស៊ឹម សូរិយា អ្នកនាំពាក្យក្រសួងសាធារណការ និងដឹកជញ្ជូនប្រាប់ភ្នំពេញប៉ុស្តិ៍កាលពីថ្ងៃពុធថា គិតត្រឹមដំណាច់ខែមេសាកន្លងទៅនេះ ការសាងសង់ផ្លូវល្បឿនលឿននេះសម្រេចបាន ២០,៦៥ ភាគរយហើយការដោះស្រាយផលប៉ះពាល់សម្រេចបាន ៨៨,៨៤ ភាគរយ ហើយក្រសួងនឹងខិតខំធ្វើការដោះស្រាយផលប៉ះពាល់ដែលនៅសេសសល់ឲ្យចប់សព្វគ្រប់ក្នុងពេលឆាប់ៗនេះ។
លោកបន្តថា ផ្លូវល្បឿនលឿនដំបូងគេនៅកម្ពុជានេះត្រូវបានកំណត់កាលបរិច្ឆេទសម្រាប់ដំណើរការនៅឆ្នាំ ២០២៣ ប៉ុន្តែតាមល្បឿននៃការស្ថាបនា គម្រោងនេះអាចបញ្ចប់ការសាងសង់មុនពេលវេលាកំណត់។
លោកថ្លែងថា៖ «សព្វថ្ងៃកម្មកររបស់ចិនកំពុងធ្វើការយ៉ាងសកម្មលើការសាងសង់ផ្លូវនេះ ពួកគាត់ទាំងអស់មិនបានទៅស្រុកគាត់ទេ ក្នុងអំឡុងពេលនៃការរាតត្បាតវីរុសកូរ៉ូណា។ ពួកគាត់មានវិធានការរបស់គាត់ ការពាក់ម៉ាស់ ការរក្សាអនាម័យ និងគម្លាតសង្គមត្រឹមត្រូវនាពេលនេះ»។
លោកបន្តថា៖ «ការសាងសង់ផ្លូវល្បឿនលឿនដើម្បីជួយជំរុញល្បឿនវិស័យដឹកជញ្ជូន និងពាណិជ្ជកម្មរបស់កម្ពុជា ព្រោះផ្លូវនេះឆ្ពោះទៅកាន់កំពង់ផែទឹកជ្រៅក្នុងក្រុងព្រះសីហនុ»។
គម្រោងសាងសង់ផ្លូវល្បឿនលឿនពីភ្នំពេញឆ្ពោះទៅកាន់ក្រុងព្រះសីហនុ វិនិយោគដោយក្រុមហ៊ុនរបស់ចិន Cambodia PPSHV Expressway Co.,Ltd ក្នុងតម្លៃប្រមាណ ១,៩ ពាន់លានដុល្លារ ត្រូវបានបើកការដ្ឋានសាងសង់ជាផ្លូវការនៅខែមីនា ឆ្នាំ ២០១៩ ដោយលោកនាយករដ្ឋមន្ត្រី ហ៊ុន សែន។
ផ្លូវដែលមានចម្ងាយសរុប ១៩០,៣ គីឡូម៉ែត្រ និងទទឹងផ្លូវ ២៤,៥ ម៉ែត្រ (២ គន្លងទៅ និង ២ គន្លងមក) នេះនឹងមានសួនច្បារនៅកណ្ដាលទ្រូងផ្លូវ ព្រមទាំងមានរបាំងអមសងខាងផ្លូវដើម្បីការពារសត្វពាហនៈ ឬមនុស្សឆ្លងកាត់ព្រមទាំងមានកន្លែងឈប់សម្រាក និងមិនបង្កការកកស្ទះចរាចរណ៍ឡើយ។ ការស្ថាបនាផ្លូវនេះនឹងត្រូវអនុវត្តតាមគម្រោងសាងសង់អាជីវកម្មផ្ទេរ (BOT)។
គំនូរព្រាងដែលផ្សព្វផ្សាយនាពេលកន្លងមកបង្ហាញថា ផ្លូវនេះនឹងចេញពីរាជធានីភ្នំពេញនៅត្រង់ចំណុចក្បែរទំនប់កប់ស្រូវ (ខាងស្តាំផ្លូវជាតិលេខ ៤) ទៅដល់ជិតក្រុងច្បារមនផ្លូវនេះឆ្លងកាត់ផ្លូវជាតិលេខ ៤ ងាកទៅខាងឆ្វេងដៃរហូតដល់ស្រុកព្រៃនប់ ទើបងាកមកស្តាំដៃរហូតដល់ព្រះសីហនុ។
លោក ស៊ិន ចន្ធី ប្រធានសមាគមភ័ស្តុភារកម្មកម្ពុជា (CLA) បានអះអាងថា ផ្លូវនេះនឹងជួយជំរុញវិស័យដឹកជញ្ជូនរបស់កម្ពុជាកាន់តែមានភាពប្រកួតប្រជែងជាមួយប្រទេសជិតខាងកម្ពុជា។ ផ្លូវនេះនឹងជួយកាត់បន្ថយការកកស្ទះចរាចរណ៍ និងសន្សំការចំណាយ។
លោកថ្លែងថា៖ «យើងទន្ទឹងរង់ចាំផ្លូវនេះយូរហើយ ដើម្បីប្រើប្រាស់វា ព្រោះសព្វថ្ងៃការដឹកជញ្ជូនមានការកកស្ទះខ្លាំងមែនទែន។ ខ្ញុំជឿថា ការដឹកជញ្ជូនទំនិញតាមផ្លូវនេះនឹងលឿនជាងមុន»៕