.jpg)
ក្រុងស៊ីដនីៈ ការហោះហើររយៈពេលមួយម៉ោងមួយដែលតភ្ជាប់ប្រទេសមួយក្នុងចំណោមប្រទេសតូចជាងគេបំផុតក្នុងលោកជាមួយនឹងប្រទេសជិតខាងរបស់ខ្លួនគឺជាផ្លូវហោះហើរអន្តរជាតិដ៏មមាញឹកបំផុតក្នុងពិភពលោក។
យោងតាមសេចក្តីរាយការណ៍មួយរបស់ក្រុមហ៊ុន OAG Aviation Worldwide Ltd បានឲ្យដឹងថា យន្តហោះបានធ្វើដំណើរចំនួន ៣០ ៥៣៧ ជើងរវាងប្រទេសសិង្ហបុរី និងទីក្រុងគូឡាឡាំពួក្នុងរយៈពេល ១២ ខែគិតត្រឹមខែកុម្ភៈ។ ចំនួនការធ្វើដំណើរនោះស្មើនឹង ៨៤ ជើងក្នុងមួយថ្ងៃនៅប្រទេសសិង្ហបុរី ដែលមានប្រជាជនត្រឹមតែ ៥,៦ លាននាក់។
ជើងហោះហើររវាងអាកាសយានដ្ឋានសុវណ្ណភូមិរបស់ប្រទេសថៃ និងប្រទេសសិង្ហបុរីជាប់ចំណាត់ថ្នាក់ទី ១១ ដោយមានការធ្វើដំណើរចំនួន ១៤ ៨៥៩ ជើង និងមានអ្នកដំណើរចំនួន ២,៩ លាននាក់ក្នុងអំឡុងពេលដូចគ្នានេះ បន្ទាប់មកគឺជើងហោះហើររវាងអាកាសយានដ្ឋានសុវណ្ណភូមិ និងទីក្រុងហុងកុង ដោយមានការធ្វើដំណើរចំនួន ១៤ ៨៣២ ជើង និងអ្នកដំណើរចំនួន ៣,៧ លាននាក់។
នៅក្នុងបញ្ជីឈ្មោះអាកាសយានដ្ឋានធំៗទាំង ២០ ដែលភាគច្រើនគឺជាអាកាសយានដ្ឋាននៅតំបន់អាស៊ីផ្លូវហោះហើរដ៏មមាញឹកជាងគេបំផុតនៅខាងក្រៅតំបន់នេះគឺផ្លូវហោះហើររវាងទីក្រុងញូវយ៉ក និងទីក្រុងតូរ៉ុនតូ។ មានជើងហោះហើរចំនួន ១៦ ៩៥៦ ជើងតាមផ្លូវហោះហើរនេះ។ ការធ្វើដំណើររវាងទីក្រុងឌូប្ល៊ីន Dublin និងព្រលាន Heathrow ក្នុងទីក្រុងឡុងដ៍បានជាប់ចំណាត់ថ្នាក់ទី ១៤ និងជាច្រកចូលនៅតំបន់អឺរ៉ុបដ៏មមាញឹកបំផុតដោយមានជើងហោះហើរចំនួន ១៤ ៣៩០ ជើង៕ BP
