.jpg)
ផ្សារគំរូព្រំដែន កម្ពុជា (ផ្សារដា) ត្រូវបានសម្ពោធដាក់ឲ្យប្រើប្រាស់ជាផ្លូវការនៅខេត្តត្បូងឃ្មុំកាលពីថ្ងៃម្សិលមិញ។ រូបថត SPM
ត្បូងឃ្មុំៈ កម្ពុជា និងវៀតណាមបានប្រកាសថា នឹងសាងសង់ផ្សារ ២ បន្ថែមទៀត នៅតាមបណ្ដោយព្រំដែន បន្ទាប់ពីការដាក់ឲ្យដំណើរការជាផ្លូវការនៃផ្សារដាស្ថិតក្នុងខេត្តត្បូងឃ្មុំកាលពីថ្ងៃអង្គារ ដើម្បីបម្រើជាទីតាំងនាំចូល នាំចេញដែលជាកិច្ចខិតខំប្រឹងប្រែងមួយក្នុងការបង្កើនទំនាក់ទំនងទ្វេភាគីរវាងប្រទេសទាំង ២។
លោកនាយករដ្ឋមន្ដ្រី ហ៊ុន សែន ដែលបានធ្វើជាអធិបតីក្នុងការបើកដាក់ឲ្យដំណើរការផ្សារដាកាលពីម្សិលមិញជំរុញឲ្យអាជ្ញាធរមូលដ្ឋានរបស់ខេត្តនេះត្រូវសហការជាមួយក្រសួងពាណិជ្ជកម្ម ដើម្បីបន្តការងារសាងសង់ផ្សារជាប់ព្រំដែន ២ ទៀតនៅខេត្តស្វាយរៀង និងខេត្តកំពត។
លោកឲ្យដឹងថា ការសាងសង់ផ្សារដាដែលក្លាយជាផ្សារគំរូដំបូងនៅព្រំដែន ត្រូវបានផ្តួចផ្ដើមចាប់តាំងពីឆ្នាំ ២០០៩ ដែលត្រូវការរយៈពេលប្រហែល ១០ ឆ្នាំ និងចំណាយពេលវេលាធ្វើទស្សនកិច្ចទៅវិញទៅមកពីគណៈប្រតិភូរវាងប្រទេសទាំង ២។
លោកថ្លែងថា៖ «ខ្ញុំសង្ឃឹមថា ផ្សារដានេះនឹងក្លាយជាផ្សារគំរូមួយសម្រាប់ពួកយើងក្នុងការដោះដូរទំនិញ។ ប្រសិនបើផ្សារនេះបរាជ័យ ផែនការដែលយើងនឹងបង្កើតនៅខេត្តផ្សេងទៀតក៏នឹងបរាជ័យផងដែរ។ នេះជាផ្សារដំបូងជាគំរូមួយ ហើយយើងនឹងបង្កើតផ្សារ ២ ទៀតនៅខេត្តស្វាយរៀង និងខេត្តកំពតដែលក្រសួងពាណិជ្ជកម្មត្រូវតែដោះស្រាយការងារនេះ»។
លោកបានបន្តថា៖ «គោលបំណងរបស់ផ្សារនេះនឹងបម្រើជាផ្សារនាំចេញទៅវៀតណាម។ យើងចង់ប្រើប្រាស់ថវិកាជាតិរបស់យើង ដើម្បីសាងសង់ផ្សារគំរូ ២ បន្ថែមទៀត។ នេះគឺជាការជំរុញរបស់ខ្ញុំជាមួយនឹងទិសដៅរបស់យើងក្នុងការប្រែក្លាយព្រំដែនជាមួយបណ្ដាប្រទេសជិតខាង ដែលធ្វើឲ្យវាត្រូវបានអភិវឌ្ឍកាន់តែច្រើន»។
លោកនាយករដ្ឋមន្ត្រី ហ៊ុន សែន ពិនិត្យមើលផលិតផលដែលដាក់តាំងលក់នៅផ្សារដាកាលពីម្សិលមិញ។ សហការី
លោក ប៉ាន សូរស័ក្តិ រដ្ឋមន្ដ្រីក្រសួងពាណិជ្ជកម្មបានឲ្យដឹងថា កម្ពុជា និងវៀតណាម បានចុះហត្ថលេខាលើអនុស្សរណៈនៃការយោគយល់គ្នាដើម្បីចាប់ផ្ដើមគម្រោងផ្សារគំរូនេះកាលពីខែកក្កដា ឆ្នាំ ២០១៧។
លោកបញ្ជាក់ថា ផ្សារដា ត្រូវបានចាប់ផ្ដើមការសាងសង់ចាប់តាំងពីខែកុម្ភៈ ឆ្នាំ ២០១៨ នៅលើផ្ទៃដី ១៩ ៦២៨ ហិកតា នៅតំបន់សេដ្ឋកិច្ចពិសេសថារីត្បូងឃ្មុំនៃស្រុកមេមត់នៅខេត្តត្បូងឃ្មុំ។ ផ្សារដាគឺជាជំនួយឥតសំណងពីរដ្ឋាភិបាលវៀតណាមមានតម្លៃប្រហែល ២ លានដុល្លារ។
លោកថ្លែងថា៖ «ផ្សារព្រំដែនកម្ពុជាមានសក្ដានុពលខ្ពស់ក្នុងការបង្កើតការងារ បង្កើនប្រាក់ចំណូលសម្រាប់ប្រជាជននៅតាមព្រំដែន និងដើម្បីបង្កើនពាណិជ្ជកម្មទ្វេភាគីរវាងប្រទេសទាំង ២។ ក្រៅពីនេះ វានឹងលើកកម្ពស់ទំនាក់ទំនងល្អក្នុងគ្រប់វិស័យរវាងប្រជាជនទាំង ២ និងលើកកម្ពស់កិច្ចសហប្រតិបត្តិការល្អរវាងរដ្ឋាភិបាលកម្ពុជា និងវៀតណាម»។
លោក ហ៊ុន សែន បានឲ្យដឹងថា ប្រទេសជិតខាងទាំង ២ នេះវៀតណាម និងថៃ គឺជាផ្សារធំជាងគេសម្រាប់កម្ពុជា ខណៈការផ្លាស់ប្តូរពាណិជ្ជកម្មទ្វេភាគីបានកើនឡើងយ៉ាងខ្លាំងក្នុងរយៈពេលជាច្រើនឆ្នាំនេះ។ ប៉ុន្តែការនាំចេញពីកម្ពុជានៅតែមានកម្រិតទាបបើធៀបនឹងការនាំចូលពីប្រទេសទាំង ២ នេះ។
ទាក់ទងនឹងឱនភាពពាណិជ្ជកម្មជាមួយវៀតណាម លោកនាយករដ្ឋមន្ដ្រីក៏បានអំពាវនាវឲ្យរដ្ឋាភិបាលវៀតណាម បង្កើនការនាំចូលពីកម្ពុជាដោយផ្ដល់លទ្ធភាពចូលទីផ្សារកាន់តែច្រើនលើផលិតផលកសិកម្មផ្សេងទៀត។
លោកបន្តថា៖ «ខ្ញុំចង់ស្នើឲ្យវៀតណាមបង្កើនការនាំចូលពីកម្ពុជា ពិតហើយយើងមើលឃើញថា វៀតណាមទិញស្រូវ និងអង្ករ ៣០ ០០០ តោន ពីកម្ពុជា និងផលិតផលផ្សេងទៀត។ ខ្ញុំស្នើឲ្យវៀតណាមទិញផលិតផលកសិកម្មផ្សេងទៀតពីកម្ពុជា។ ខ្ញុំសង្ឃឹមថា ផលិតផលទាំងនោះនឹងត្រូវបាននាំចេញទៅទីផ្សារវៀតណាម»។
លោកនាយករដ្ឋមន្ដ្រី ហ៊ុន សែន ឲ្យដឹងថា ទំហំពាណិជ្ជកម្មរវាងប្រទេសកម្ពុជា និងវៀតណាមមានចំនួន ៤,៦ ពាន់លានដុល្លារ ដែលត្រូវបានកត់ត្រាដោយគយ ប៉ុន្តែលោកបានបញ្ជាក់ថា ជាក់ស្តែងទិន្នន័យដែលមិនត្រូវបានកត់ត្រាផ្លូវការដោយគយ ដែលជាការដោះដូរដោយប្រជាជន និងប្រជាជនបានកើនឡើងដល់ជាង ៥ ពាន់លានដុល្លាររួចហើយនៅឆ្នាំនេះ៕LA
