.jpg)
រថយន្តចល័តរបស់ក្រុមហ៊ុន វីរៈប៊ុនថាំ លក់បន្លែ ត្រី សាច់ ជូនប្រជាពលរដ្ឋនៅតំបន់ក្រហមម្ដុំស្តឹងមានជ័យ កាលពីថ្ងៃទី ២៤ មេសា។ រូបថត យូសុះ អាប់ឌុលរ៉ាស់ហ៊ីម
ភ្នំពេញ៖ ផ្សារទំនើប Aeon Mall ផ្សារទំនើប Makro និងក្រុមហ៊ុនវីរៈ ប៊ុនថាំ អេចប្រេស ប្រកាសចូលរួមសហការជាមួយក្រសួងពាណិជ្ជកម្មបញ្ចេញទំនិញឧបភោគបរិភោគចាំបាច់លក់នៅតំបន់បិទខ្ទប់ (តំបន់ក្រហម) ដើម្បីរក្សាតម្លៃទំនិញ និងស្ថិរភាពនៃការផ្គត់ផ្គង់ទំនិញនៅលើទីផ្សារក្នុងអំឡុងពេលបិទខ្ទប់ក្រុងភ្នំពេញ និងក្រុងតាខ្មៅ (ខេត្តកណ្តាល)។
ការចូលរួមពីវិស័យឯកជននេះ ត្រូវបានធ្វើឡើងស្របពេលក្រសួងពាណិជ្ជកម្មបានដាក់ឲ្យដំណើរការទីផ្សាអនឡាញ (shop.moc.gov.kh) កាលពីថ្ងៃទី ២១ មេសាកន្លងមក។
លោក ប៉ែន សុវិជាតិ អនុរដ្ឋលេខាធិការក្រសួងពាណិជ្ជកម្មបានថ្លែងក្នុងកម្មវិធីផ្សាយផ្ទាល់ពិសេសរបស់ស្ថានីយទូរទស្សន៍កម្ពុជា ទទក នៅថ្ងៃទី ២៦ មេសាថា យ៉ាងហោចណាស់ក្រុមហ៊ុនចំនួន ៣ បានចូលរួមសហការជាមួយក្រសួងពាណិជ្ជកម្មបញ្ចេញទំនិញចាំបាច់លក់នៅតំបន់បិទខ្ទប់ និងតំបន់ក្រហម ដើម្បីរក្សាស្ថិរភាពតម្លៃ និងផ្គត់ផ្គង់ក្នុងអំឡុងពេលដ៏លំបាកនេះ។ ក្រុមហ៊ុនទាំងនោះ រួមមានផ្សារទំនើបអ៊ីអន ម៉ាក្រូ និង វីរៈ ប៊ុនថាំ អេចប្រេស ដែលនឹងលក់ចល័តនៅតាមតំបន់បិទខ្ទប់។ បច្ចុប្បន្ននេះ ក្រុមហ៊ុនទាំង ៣ បានទាក់ទងមកក្រសួងផ្ទាល់រួចហើយ ដោយពួកគេនឹងរៀបចំទំនិញនៅតាមស្តង់ និងភ្ជាប់ដំណរជាមួយនឹងផ្សារអនឡាញរបស់ក្រសួង។
លោកមានប្រសាសន៍ថា៖ «ផ្សារម៉ាក្រូ នឹងមានការរៀបចំលក់នៅនឹងកន្លែងដែលបានបញ្ជូនទំនិញមួយចំនួន បន្លែ ផ្លែឈើ និងត្រី សាច់ មកស្តង់របស់ក្រសួងសម្រាប់ផ្គត់ផ្គង់បងប្អូនយើងនៅតំបន់ក្រហម ហើយផ្សារអ៊ីអន ក៏មានបំណងមកលក់ជាមួយយើង គាត់កំពុងតែរៀបចំស្តង់សម្រាប់លក់ផងដែរ»។
លោកបន្ថែមទៀតថា៖ «យើងនឹងបន្តធ្វើជាមួយផ្សារទំនើបផ្សេងៗទៀត ដើម្បីពង្រីកបណ្តាញលក់ និងពង្រីកមុខទំនិញឲ្យបានកាន់តែច្រើន យើងគិតគូរផងដែរ ក្នុងការពង្រីកស្តង់ និងពង្រីកតាំងលក់ ប៉ុន្តែការពង្រីកទីតាំងត្រូវធ្វើឡើងដោយប្រុងប្រយ័ត្នបំផុត ព្រោះវាអាចនឹងបង្កការចម្លងជំងឺកូវីដ ១៩ នាំឲ្យបិទផ្សារដដែល»។
ក្រុមហ៊ុន វីរៈ ប៊ុនថាំ អេចប្រេស នឹងបញ្ចេញរថយន្តចល័តចំនួន ៦៤ គ្រឿង លក់គ្រឿងឧបភោគបរិភោគដែលមានបន្លែ ត្រី សាច់ ទៅតាមគោលដៅចំនួន ១៤ នៅតំបន់ក្រហម។ នេះបើតាមលោក សួរ វីរៈ អគ្គនាយកក្រុមហ៊ុន វីរៈ ប៊ុនថាំ អេសប្រេស។
លោកប្រាប់ ភ្នំពេញ ប៉ុស្តិ៍ថា៖ «យើងគិតថាប្រជាជននៅក្នុងតំបន់បិទខ្ទប់មានផលវិបាកក្នុងការទទួលបានម្ហូបអាហារស្រស់ដូចជា បន្លែ ត្រី សាច់ ដែលយើងលក់ក្នុងតម្លៃទាបសមរម្យ ដូច្នេះខ្ញុំបានសម្រេចថា នឹងចូលរួមជាមួយរដ្ឋាភិបាលក្នុងការត្រៀមរថយន្តសម្រាប់ដឹកទំនិញផ្គត់ផ្គង់ជូនប្រជាជនតំបន់បិទខ្ទប់»។
បើតាម លោក សុវិជាតិ បានឲ្យដឹងថា វិធានការរបស់ក្រសួងធ្វើឡើងក្នុងគោលបំណង ដើម្បីរក្សាស្ថិរភាពតម្លៃ ក៏ដូចជា ការបាននូវស្ថិរភាពនៃប្រភពផ្គត់ផ្គង់់ដែលត្រូវបានដឹកជញ្ជូនពីបណ្តាខេត្តនានាចូលមករាជធានីភ្នំពេញ។
លោកឲ្យដឹងថា៖ «ក្រសួងកត់សម្គាល់ថា ប្រសិនបើយើងអាចសម្របសម្រួលប្រភពផ្គត់ផ្គង់បានត្រឹមត្រូវ យើងនឹងធានាបានស្ថិរភាពតម្លៃ និងអាចទប់ស្កាត់ការឡើងថ្លៃទំនិញក្នុងកាលៈទេសៈដ៏លំបាកនេះ។ យើងមិនមែនជាប្រតិបត្តិករនៃអ្នកលក់ទំនិញទេ យើងគ្រាន់តែជាអ្នកសម្របសម្រួលកិច្ចអន្តរាគមនៃការលក់ និងស្វែងរកទីផ្សារ»។
កាលពីថ្ងៃទី ២៥ មេសា ក្រសួងពាណិជ្ជកម្មបានលក់អង្ករចំនួន ៥២២ បេ (១ បេ មានទម្ងន់ ៥០ គីឡូក្រាម) មី ១ ២៣០ កេស ទឹកត្រី ៣៨៤ យួរ ទឹកស៊ីអ៊ីវ ៣៦៦ យួរ ត្រីខកំប៉ុង ៨៩៤ កំប៉ុង ទឹកបរិសុទ្ធ ១០២ យួរ និងឆៃប៉ូវ ១៦៤ ថង់ (១ ថង់ មានទម្ងន់ ២ គីឡូក្រាម)៕
