ភ្នំពេញៈ ផ្សារទំនើបសុវណ្ណា ដែលជាការវិនិយោគរបស់ក្រុមហ៊ុន OCIC របស់លោក ពុង ឃាវសែ នឹងចាប់ផ្តើមធ្វើការកែលម្អឡើងវិញដើម្បីបង្កើនភាពទាក់ទាញ ខណៈមជ្ឈមណ្ឌលលក់ទំនិញដ៏ល្បីទី២ ដំបូង នៅក្នុងទីក្រុងភ្នំពេញមួយនេះបានមើលឃើញពីការធ្លាក់ចុះក្នុងរយៈពេលប៉ុន្មានឆ្នាំមកនេះ។ នេះបើតាមអ្នកគ្រប់គ្រងផ្សារលោកស្រី ជា សុខហៀក អគ្គនាយិកាផ្សារទំនើបសុវណ្ណា បានប្រាប់ភ្នំពេញ ប៉ុស្តិ៍កាលពីម្សិលមិញថា គម្រោងកែលម្អនេះនឹងចាប់ផ្តើមនៅខែកញ្ញា។
លោកស្រីបន្តថា៖ «ការជួសជុលឡើងវិញនឹងអាចទាក់ទាញអតិថិជនច្រើនជាងមុន។ ជាការពិតក្នុងវិស័យផ្សារទំនើបកំពុងមានការប្រកួតប្រជែងខ្លាំង តែវាជាការធ្វើឲ្យការកែលម្អផ្សារទំនើបនេះឲ្យកាន់តែមានភាពទាក់ទាញ»។
ទោះបីយ៉ាងនេះក្តី លោកស្រី មិនទាន់អាចបញ្ជាក់ពីការចំណាយលើការកែលម្អនេះទេព្រោះក្រុមការងារកំពុងសិក្សានៅឡើយ។
ម្ចាស់ហាងលក់ទំនិញទាំងអស់នៅក្នុងផ្សារទំនើបនេះត្រូវបានបង្ខំឲ្យបញ្ចប់កិច្ចសន្យាជួលទីតាំងទាំងអស់ត្រឹមខែសីហា ខណៈមានការលេចឮពាក្យចចាមអារ៉ាមថា ផ្សារទំនើបសុវណ្ណានេះនឹងត្រូវជួលទៅឲ្យវិនិយោគិនចិនដើម្បីអភិវឌ្ឍគម្រោងផ្សេង។
អ្នកគ្រប់គ្រងហាងទំនិញមួយរូបនៅផ្សារសុវណ្ណា បានប្រាប់អ្នកយកព័ត៌មានភ្នំពេញប៉ុស្តិ៍កាលពីថ្ងៃម្សិលមិញថា ម្ចាស់ផ្សារកាលពីខែឧសភា បានប្រកាសបញ្ចប់កុងត្រាហាងទំនិញលោកមុនកាលកំណត់។
លោកថ្លែងថា៖ «បើតាមលិខិតជូនដំណឹងផ្លូវការពីខាងផ្សារ គាត់សុំបញ្ចប់កុងត្រាមុនខែសីហា ដើម្បីធ្វើការជួសជុលឡើងវិញ ប៉ុន្តែយើងដឹងពីអាជីវករផ្សេងៗប្រាប់យើងថា អគារសុវណ្ណាជួលឲ្យចិន»។
អាជីវករលក់គ្រឿងអេឡិចត្រូនិកមួយរូបសុំមិនបញ្ចេញឈ្មោះបានឲ្យដឹងថា ម្ចាស់ផ្សារគ្រាន់តែជូនដំណឹងឲ្យអាជីវករទំាងអស់ឲ្យផ្អាកលក់ជាបណ្តោះអាសន្នសិន ដើម្បីជួសជុល។ អាជីវកររូបនេះបានឲ្យដឹងថា៖ «ខាងផ្សារឲ្យយើងផ្អាកលក់រយៈពេល ៦ខែ ដើម្បីជួសជុលកែលម្អ»។
លោកស្រី ជា សុខហៀក បានបដិសេធចំពោះ ពាក្យចរចាមអារ៉ាមដែលថាផ្សារទំនើបនេះនឹងត្រូវជួលទៅឲ្យអ្នកវិនិយោគចិន។
លោកស្រីបន្តថា៖ «យើងកំពុងដំណើរការបញ្ចប់កុងត្រាជាមួយអាជីវករទាំងអស់។យើងមិនអាចបកស្រាយពីពាក្យចចាមអារ៉ាមនេះទេ។ តែអ្វីជាការពិតយើងមានគម្រោងជួសជុល ព្រោះផ្សារទំនើបសុវណ្ណាមានអាយុកាលប្រមាណ ១០ ឆ្នាំ មកហើយ ដូច្នេះវាដល់ពេលត្រូវជួសជុលកែលម្អឡើងវិញ»។
ផ្សារទំនើបសុវណ្ណាមានកម្ពស់ ៥ ជាន់ ដែលបានបើកឲ្យដំណើរការនៅឆ្នាំ ២០០៨ មានហាងលក់សរុប ២០០ ជាផ្សារទំនើបធំទី២ បន្ទាប់ពីផ្សារទំនើបសូរិយាក្នុងអំឡុងពេលនោះ។
ចាប់តាំងពីវត្តមាននៃផ្សារទំនើប អ៊ីអន ម៉ល របស់ជប៉ុនចូលមកភ្លាម ផ្សារទំនើប និងមជ្ឈមណ្ឌលទំនិញវិនិយោគដោយវិនិយោគិនក្នុងស្រុកបានចាប់ផ្តើមធ្លាក់ចុះយ៉ាងគំហុក៕ LA