ភ្នំពេញៈ ផ្សារទំនើប Phnom Penh Mega Mall កម្ពស់ ៩ ជាន់ ដែលគ្រោងបើកដំណើរការនៅដើមឆមាសទី ២ ឆ្នាំ ២០២០ ខាងមុខនេះទទួលបានការចាប់អារម្មណ៍ពីអតិថិជនច្រើនចំពោះការជួលទីតាំងប្រតិបត្តិការអាជីវកម្មរបស់ខ្លួន។ នេះបើយោងតាមក្រុមហ៊ុន CBRE Cambodia។
ផ្សារទំនើប Phnom Penh Mega Mall ដែលមានក្រឡាផ្ទៃអគារសរុប ៤៧ ០០០ ម៉ែត្រការ៉េ ត្រូវបានចែកចេញជា ៤០០ ស្តង់ និងមានចំណតរថយន្តបាន ១ ៥០០ គ្រឿង និងម៉ូតូ ២ ០០០ គ្រឿង។
អ្នកស្រី អាន សុធីតា នាយិកាក្រុមហ៊ុនអចលនទ្រព្យ CBRE Cambodia បានប្រាប់ភ្នំពេញ ប៉ុស្តិ៍ កាលពីថ្ងៃម្សិលមិញថា ទោះបីការសាងសង់អគារនេះទើបសម្រេចបានប្រមាណ ៩៥ ភាគរយ ក្តី ប៉ុន្តែបច្ចុប្បន្នមានវិនិយោគិនក្នុងស្រុក និងបរទេសប្រមាណ ១០០ នាក់/ក្រុមហ៊ុន (ភាគច្រើនតំបន់អាស៊ី) បានមកទាក់ទងក្រុមហ៊ុន CBRE Cambodia ដើម្បីជួលទីតាំង។
អ្នកស្រីបន្តថា តាមផែនការការសាងសង់អគារផ្សារ Phnom Penh Mega Mall នឹងត្រូវបញ្ចប់ក្នុងពេលឆាប់ៗ ហើយនៅដើមឆ្នាំ ២០២០ ក្រុមហ៊ុននឹងអាចអនុញ្ញាតឲ្យអតិថិជន (អ្នកជួល) ចូលរៀបចំទីតាំងសម្រាប់ការលក់របស់ខ្លួន។
អ្នកស្រីបានថ្លែងថា៖ «ខ្ញុំគិតថាមូលហេតុចម្បងដែលធ្វើឲ្យ Phnom Penh Mega Mall មានការចាប់អារម្មណ៍ច្រើនគឺដោយសារផ្សារទំនើបនេះមានទីតាំងស្ថិតនៅមហាវិថីសហព័ន្ធរុស្ស៊ី ជិតចំណុចប្រសព្វនៃខណ្ឌទួលគោក ៧ មករា និងដូនពេញ។ Phnom Penh Mega Mall នឹងក្លាយជាផ្សារទំនើបឈានមុខគេនៅទីនោះ»។
អ្នកស្រីបន្តថា កំណើនសេដ្ឋកិច្ច និងកម្រិតជីវភាពរបស់ប្រជាជនបានធ្វើឲ្យផ្សារទំនើបៗលំដាប់អន្តរជាតិជាច្រើនបានបើកដំណើរការនៅកម្ពុជាដូចជាផ្សារទំនើប Aeon 1, Aeon 2, Makro និង The Olympia Mall ជាដើម។
ទីតាំងជួលក្នុងផ្សារទំនើប Phnom Penh Mega Mall មានតម្លៃជាមធ្យម ៣០ ដុល្លារ ក្នុង ១ ការ៉េ ក្នុងរយៈពេល ១ ខែ។ នេះបើតាមអ្នកស្រី សុធីតា។
កាលពីមុនអគារដែលចាប់ផ្ដើមសាងសង់ក្នុងឆ្នាំ ២០១២ នេះ ត្រូវម្ចាស់ក្រុមហ៊ុនអភិវឌ្ឍន៍អគារព្រមព្រៀងជួលឲ្យក្រុមហ៊ុនផ្សារទំនើប Parkson Mall ដែលមានមូលដ្ឋាននៅប្រទេស ម៉ាឡេស៊ី ដោយបានប្រកាសថា នឹងបើកក្នុងខែ វិច្ឆិកា ឆ្នាំ ២០១៥ ប៉ុន្តែក្រោយមកកិច្ចព្រមព្រៀងត្រូវបានបញ្ចប់ដោយស្ងប់ស្ងាត់ទៅវិញ។
របាយការណ៍ស្រាវជ្រាវរបស់ក្រុមហ៊ុន CBRE Cambodia បានឲ្យដឹងថា គិតត្រឹមដំណាច់ត្រីមាសទី ២ ឆ្នាំ ២០១៩ ផ្សារទំនើបដែលកំពុងបើកដំណើរការក្នុងរាជធានីភ្នំពេញមានចំនួន ១៨ ស្មើ ៣២០ ០០០ ម៉ែត្រការ៉េ កើន ១៥ ភាគរយ បើធៀបនឹងរយៈពេលដូចគ្នាកាលពីឆ្នាំ ២០១៨៕ LA
វីដេអូ៖