.jpg)
លោក ប៉ាន សូរស័ក្តិ ដើរលើកម្រាលព្រំ (ឆ្វេង) និងឯកអគ្គរដ្ឋទូតវៀតណាមប្រចាំកម្ពុជា(ស្តាំ)ចូលរួមបើកការដ្ឋានសាងសង់ផ្សារ។ ហ្វេសប៊ុកក្រសួង
ត្បូងឃ្មុំៈ ផ្សារព្រំដែនកម្ពុជា វៀតណាមដំបូង ដែលវិនិយោគទឹកប្រាក់២លានដុល្លារជាការផ្តល់ឲ្យពីរដ្ឋាភិបាលវៀតណាម បានបើកដំណើរការសាងសង់កាលពីថ្ងៃម្សិលមិញ ដោយសង្ឃឹមថានឹងជំរុញពាណិជ្ជកម្មឆ្លងកាត់ព្រំដែនរវាងប្រទេសទាំង ២។
ផ្សារនេះមានទីតាំងនៅស្រុកមេមត់ ខេត្តត្បូងឃ្មុំ នៅលើផ្ទៃដីប្រហែល២ហិកតា ដែលមានចម្ងាយប្រហែល១គីឡួម៉ែត្រពីព្រំដែនរបស់ប្រទេសទាំង ២។
ផ្សារនេះត្រូវបានសាងសង់ជាមួយនឹងជំនួយឥតសំណងពីរដ្ឋាភិបាលវៀតណាមនូវទឹកប្រាក់សរុបប្រមាណ ២លានដុល្លារ ហើយនឹងត្រូវបានប្រើប្រាស់ដើម្បីដោះដូរទំនិញទាំងកម្ពុជា និងវៀតណាម ខណៈផលិតផលវៀតណាមត្រូវបានព្យាករថា នឹងមានច្រើនលើសលប់។
លោក ប៉ាន សូរស័ក្ត រដ្ឋមន្ដ្រីក្រសួងពាណិជ្ជកម្មកម្ពុជា បានថ្លែងកាលពីម្សិលមិញ នៅក្នុងពិធីបញ្ចុះបឋមសីលាបើកការដ្ឋានសាងសង់ផ្សារឆ្លងកាត់ព្រំដែននេះថា៖ «ការបង្កើតទីផ្សារគំរូគឺជាការចាប់ផ្ដើមសករាជថ្មីនៃកិច្ចសហប្រតិបត្តិការពាណិជ្ជកម្មឆ្លងកាត់ព្រំដែនរបស់ប្រទេសទាំង២»។
លោកបានបន្ថែមថា វានឹងផ្ដល់ភាពងាយស្រួលសម្រាប់ប្រជាជននៅក្នុងសហគមន៍ ហើយនឹងរួមចំណែកក្នុងការសម្រេចបានទិសដៅសម្រាប់ការទទួលបានពាណិជ្ជកម្ម ទ្វេភាគី៥ពាន់លានដុល្លារនៅពេលអនាគត។
លោកបានបញ្ជាក់ថា៖ «វានឹងរួមចំណែកក្នុងការដោះស្រាយបញ្ហាប្រឈមលើឧបសគ្គពាណិជ្ជកម្មដែលរហូតមកដល់ពេលនេះកំពុងរារាំងដល់ការចរាចរទំនិញនៅតាមបណ្ដោយព្រំដែនកម្ពុជា វៀតណាម»។
យោងតាមលោក ស៊ាង ថៃ អ្នកនាំពាក្យក្រសួងពាណិជ្ជកម្មកម្ពុជា បានឲ្យដឹងថា ការសាងសង់នឹងចំណាយពេល១២ខែ ដោយសង្ឃឹមថា នឹងបញ្ចប់សម្រាប់ប្រតិបត្តិការ នៅដើមឆ្នាំ ២០១៩។ ប៉ុន្តែលោកមិនអាចបញ្ជាក់ចំនួនហាងលក់នៅក្នុងផ្សារនេះ និងលក្ខខណ្ឌ សម្រាប់អ្នកលក់នៅក្នុងផ្សារនេះបានទេ ដោយថ្លែងថា នឹងមានគណៈកម្មាធិការដើម្បីធ្វើការងារលើភារកិច្ចនេះនៅពេលទីផ្សារនេះជិតបញ្ចប់ការសាងសង់។
លោក សុក ហ៊ាង ប្រធានសភាពាណិជ្ជកម្ម កំពង់ចាម-ត្បូងឃ្មុំ បានថ្លែងកាលពីម្សិលមិញថា ផលិតផលវៀតណាមនឹងត្រូវបានដាក់បង្ហាញកាន់តែច្រើននៅក្នុងផ្សារនេះ បើធៀបនឹងផលិតផលកម្ពុជាដោយសារផលិតផលក្នុងស្រុកនៅមានកម្រិត ហើយភាគច្រើនជាវត្ថុធាតុដើម។ ប៉ុន្តែលោក សុក ហ៊ាង បានថ្លែងថា ផ្សារនេះនឹងផ្ដល់អត្ថប្រយោជន៍សម្រាប់អតិថិជនកម្ពុជាក្នុងការទិញទំនិញប្រើប្រាស់ប្រចាំថៃ្ងកាន់តែងាយស្រួលក្នុងតម្លៃកាន់តែទាប។
លោកថ្លែងថា៖ «ប្រជាជនរបស់យើងជារឿយៗ ឆ្លងកាត់ព្រំដែន ដើម្បីទិញទំនិញនៅក្នុងប្រទេសវៀតណាមដោយសារតែពួកគេមានផលិតផលច្រើនជាងយើង»។
លោកបានបន្ថែមថា ផ្សារថ្មីនេះនឹងជួយសម្រួលពាណិជ្ជកម្មសម្រាប់ប្រជាជនដែលរស់នៅតាមបណ្ដោយផ្សារនេះ និងបង្កើនជីវភាពរស់នៅរបស់ពួកគេ។
លោកបានបន្តថា៖ «នៅពេលយើងមានការតភ្ជាប់កាន់តែប្រសើរ ដើម្បីលក់ទំនិញ វានឹងជួយប្រជាជននៅតាមបណ្ដោយព្រំដែនក្នុងការរកប្រាក់ចំណូល»។
ពាណិជ្ជកម្មទ្វេភាគីរវាង កម្ពុជា និង វៀតណាមក្នុងរយៈពេល១១ខែក្នុងឆ្នាំ២០១៧ បានកើនឡើងដល់ ៣,៤៣ ពាន់លានដុល្លារ ដែលកើនឡើង ៣១ ភាគរយ ធៀបនឹងរយៈពេលដូចគ្នាកាលពីឆ្នាំ ២០១៦។ នេះបើយោងតាមសេចក្ដីប្រកាសព័ត៌មានបានពីក្រសួងពាណិជ្ជកម្ម៕ LA
